អង្គការសមាគមចំនួន២២ស្ថាប័ននៅថ្ងៃទី១៤ ខែវិច្ឆិកា ឆ្នាំ២០១៧ បានអំពាវនាវឲ្យមានការដោះលែងសកម្មជនបរិស្ថានពីររូប ដែលត្រូវបានតុលាការខេត្តកោះកុងឃុំខ្លួន បន្ទាប់ពីពួកគេបានទៅថតនាវាក្រុមហ៊ុនឯកជនមួយ ដែលកំពុងធ្វើសកម្មភាពបូមខ្សាច់។
នៅក្នុងសេចក្តីថ្លែងការណ៍ ក្រុមអង្គការសង្គមស៊ីវិល បានហៅការចាប់ខ្លួននោះ ធ្វើតាមអំពើចិត្ត និងជាចេតនាប៉ុនប៉ងបិទសំឡេងអ្នកការពារសិទ្ធិមនុស្សផ្នែកបរិស្ថាន។
សូមបញ្ជាក់ថា យុវជន២រូប ជាសមាជិកអង្គការមាតាធម្មជាតិ ត្រូវបានកម្លាំងនគរបាលការពារក្រុមហ៊ុន Koh Kong SEZ ឃាត់ខ្លួន បញ្ជូនឲ្យប៉ុស្តិ៍នគរបាលឃុំព្រែកខ្សាច់សាកសួរ ពីបទថតរូបទីតាំងឯកជន តាមបណ្តឹងរបស់ក្រុមហ៊ុនមួយនេះ ។ យុវជន២រូបនោះ មានឈ្មោះ ឌឹម គុណឌី អាយុ ២២ ឆ្នាំ និងឈ្មោះ ហ៊ុន វណ្ណៈ អាយុ ៣៦ ឆ្នាំ ត្រូវបាននគរបាល ប្រចាំការនៅក្រុមហ៊ុន Koh Kong SEZចំនួន៣នាក់ ឃាត់ខ្លួន នៅចំណុចពយអៅបៀ ស្ថិតក្នុងភូមិព្រែកខ្សាច់ ឃុំព្រែកខ្សាច់ ស្រុកគិរីសាគរ ខេត្តកោះកុង ខណៈពេលដែលយុវជន២រូបនោះ ចុះទៅថតនៅកន្លែងគំនរខ្សាច់ក្រុមហ៊ុនខាងលើ កាលពីវេលាម៉ោង១០ និង៤៥ នាទី ព្រឹក ។ អ្នកទាំង២ ត្រូវបានតុលាការ ខេត្តកោះកុងចេញដីកាឃុំខ្លួន ។ ដោយ៖បញ្ញាស័ក្តិ
ខាងក្រោមនេះជាខ្លឹមសារទាំងស្រុងនៃសេចក្តីថ្លែងការណ៍៖
