នៅថ្ងៃទី៦ ខែធ្នូ ឆ្នាំ២០២៣ មន្ត្រីប៉ូលិស PCT5 រួមជាមួយរដ្ឋបាលចំណីអាហារ និងឱសថ (FDA) បានចុះឆែកឆេរផ្ទះមួយនៅសង្កាត់ Chomthong នៃទីក្រុងបាងកក បន្ទាប់ពីមានសេចក្តីរាយការណ៍មកថា ផ្ទះមួយត្រូវបានគេប្រើប្រាស់ជារោងចក្រផលិតគ្រឿងសម្អាងខុសច្បាប់ដែលមិនត្រូវតាមស្តង់ដារ FDA ហើយកម្មករបានប្រើវែកកូរឡេនៅលើឥដ្ឋ ដែលខុសពីរូបភាពផ្សាយពាណិជ្ជកម្មតែម្តង។
មន្រ្តី PCT5 បានឲ្យដឹងថា រោងចក្រនោះជាផ្ទះ២ជាន់ មិនមានប្រព័ន្ធការពារសុវត្ថិភាពអ្វីទាំងអស់។ ពេលសមត្ថកិច្ចឆែកឆេររកឃើញបុគ្គលិកជាច្រើននាក់ កំពុងអង្គុយចាក់ផលិតផលចូលក្នុងប៊ីដុង និងមិនបានពាក់ឧបករណ៍ការពារណាមួយ កូរជាមួយឡេនៅលើឥដ្ឋ ដែលប្រឡាក់ប្រឡូកខ្លាំង ផ្ទុយពីរូបភាពក្នុងប្រព័ន្ធផ្សព្វផ្សាយ ខណៈដែលកម្មករស្តង់ដារស្លៀកឯកសណ្ឋានពណ៌ស និងមួក ព្រមទាំងស្រោមដៃកៅស៊ូការពារការចម្លងរោគ។
លើសពីនេះ ធុងកូរឡេមួយចំនួនក៏ត្រូវបានគេរកឃើញមានសត្វកណ្តុរងាប់ និងខ្លះទៀតត្រូវបានគេរកឃើញខ្ចប់ក្នុងប្រអប់ត្រៀមសម្រាប់ចែកចាយ។ ដូច្នេះហើយ អាជ្ញាធរសម្រេចធ្វើការរឹបអូស ដែលរួមមានដូចជា៖ ១. ធុងលាយនឹងផលិតផលខុសច្បាប់ចំនួន ១១, ធុងសម្រាប់វេចខ្ចប់ចំនួន ២. ឧបករណ៍ផលិតដូចជា វែក, ផើង, ឆ្នាំងខ្ទះ និងធាតុផ្សំជាច្រើនទៀត ៣. ផលិតផលឡេម៉ាស្សាជើង ៨៣ ប៊ីដុង ៤. ដបទឹកអប់ និងជែលផ្កាឈូកខុសច្បាប់ចំនួន 580 ដប (ផលិតក្នុងផ្ទះ) ៥. ផលិតផលសម្រាប់ងូតទឹក 73 ប៊ីឡុង ៧. ផលិតផលទឹកអប់ 2,976 ដុំ។
ជនជាប់ចោទឈ្មោះ ធី ធីវ៉ាត អាយុ ៦៣ ឆ្នាំ ត្រូវបានចោទប្រកាន់ពីបទជាអ្នកផលិតគ្រឿងសម្អាងក្លែងក្លាយ ផលិតមិនតាមការកំណត់ ហើយគ្មានស្លាកភាសាថៃទៀតផង។ ក្នុងការចាប់ខ្លួនលោក ធីធីវ៉ាត់ បានសារភាពចំពោះការចោទប្រកាន់ទាំងអស់។
យ៉ាងណាមិញ ចំពោះប្រភពនៃការចាប់ខ្លួននេះ គឺមកពីស្ត្រីរងគ្រោះម្នាក់ ដែលបានសុំជំនួយពីទំព័រល្បីមួយ បន្ទាប់ពីធ្វើការនៅរោងចក្រ ហើយត្រូវទឹកក្តៅឧណ្ណៗ បណ្តាលឲ្យមានស្នាមរបួសពេញខ្លួន។ ប៉ុន្តែបានទទួលប្រាក់សំណងត្រឹមតែ ១ ពាន់បាតពីនិយោជក ហើយសុំដាក់លិខិតលាលែង។ បច្ចុប្បន្ននាងនៅតែមិនអាចរស់នៅបានធម្មតាបានទេ រួមទាំងការមានកូនអាយុ២ខែដែលត្រូវចិញ្ចឹមក៏លំបាកខ្លាំងផងដែរ ទើបឈានដល់ការតាមរករោងចក្រនេះ៕ រក្សាសិទ្ធិដោយ៖ លឹម ហុង
