បើតាមរបាយការណ៍វាយតម្លៃរួមរបស់អគ្គស្នងការដ្ឋាននគរបាលជាតិ នាថ្ងៃទី១៧ ខែវិច្ឆិកា ឆ្នាំ២០២៤ បានឱ្យដឹងថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក រយៈពេលបីថ្ងៃ ត្រូវបានបិទបញ្ចប់ជាមួយស្ថានភាព សន្តិសុខ សណ្តាប់ធ្នាប់ ល្អប្រសើរ ក្នុងពេលដែលប្រជាពលរដ្ឋមកពីគ្រប់មជ្ឈដ្ឋាន រួមទាំងភ្ញៀវទេសចរ បរទេស សរុបជាង ៦លាននាក់ បានដើរកម្សាន្តប្រកបដោយក្ដីសប្បាយរីករាយ យ៉ាងអនេកអនង្គដួងចិត្ត។
អគ្គស្នងការដ្ឋាននគរបាលជាតិ បានបង្ហាញរបាយការណ៍ថា ក្នុងរយៈពេលបីថ្ងៃមកនេះ ប្រជាពលរដ្ឋចូលរួមកម្សាន្ដប្រកបដោយទឹកមុខសប្បាយរីករាយ នៅក្នុងតំបន់ប្រារព្ធពិធី ក្រោមកិច្ចការពារសន្តិសុខ សណ្តាប់ធ្នាប់សាធារណៈ និងសុវត្ថិភាពរបស់កងកម្លាំងប្រដាប់អាវុធគ្រប់ប្រភេទ និងអាជ្ញាមានសមត្ថកិច្ចពាក់ព័ន្ធ ស្របតាមផែនការដែលបានដាក់ចេញ។
ក្នុងន័យនេះ គឺការដាក់ចេញនូវគោលការណ៍ណែនាំប្រកបដោយគតិបណ្ឌិតរបស់ប្រមុខរាជរដ្ឋាភិបាលកម្ពុជា ដែលមានភាពបត់បែន រស់រវើក ម៉ឺងម៉ាត់ និងហ្មត់ចត់ក្នុងការគ្រប់គ្រង់សន្តិសុខ សណ្តាប់ធ្នាប់ សាធារណៈ និងសុវត្ថិភាពសម្រាប់ការប្រារព្ធព្រះរាជពិធីបុណ្យ។
ការចង្អុលដឹកនាំដ៏ខ្ពង់ខ្ពស់របស់ថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិ ក្នុងការដាក់ចេញនូវផែនការធានាសន្តិសុខ សណ្តាប់ធ្នាប់ របៀបរៀបរយ និងសុវត្ថិភាព សម្រាប់ ព្រះរាជពិធីបុណ្យ និងការពង្រឹងវិធានការសន្តិសុខជារួមនៅទូទាំងប្រទេសសម្រាប់បម្រើឲ្យព្រឹត្តិការណ៍នេះ ក្នុងស្មារតីទទួលខុសត្រូវពីគ្រប់យន្តការ បញ្ជាការដឹកនាំគ្រប់គោលដៅ៕ ពិសិដ្ឋ CEN
