នេះមិនដឹងថា ជាការសម្តែង ឬ ជាល្បិចដាក់អន្ទាក់យ៉ាងណានោះទេ ដែលរថយន្តស៊េរីទំនើប១គ្រឿង MAZDA CX9 ស្លាកលេខកម្ពុជា HUAQI.CO បានចតចោលលើផ្លូវ ជាមួយនឹងលុយដុល្លារជាច្រើនដុំ ប្រហែលទើបមកពីធនាគារ ខណៈម្ចាស់មិនដឹងចាកចេញទៅណាបាត់។ ហេតុការណ៍ដ៏មិននឹកស្មានដល់នេះ បានបង្កការភ្ញាក់ផ្អើល ស្ថិតនៅផ្លូវព្រះរោត្តម ខាងត្បូងអគារព្រីនស៍ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីល្ងាចថ្ងៃទី២៤ ខែធ្នូ ឆ្នាំ២០២៤ ។
នេះបើតាមគណនីហ្វេសប៊ុកឈ្មោះ Kim Srin ដែលបានឃើញហេតុការណ៍នេះផ្ទាល់ បានបង្ហោះរូបភាព និងភ្ជាប់សារទាំងហួសចិត្តបែបនេះថា «ឱម្ចាស់អើយម្ចាស់ មើលងាយចោរពេកទេដឹង យកឡានមកចតចោលលើផ្លូវ ហើយម្ចាស់មិនដឹងទៅណាបាត់។ នេះសំណាងចេះមានសមត្ថកិច្ចប្រចាំការល្បាតឃើញ ចុះបើចោរឃើញវាមិនសប្បាយចិត្តយ៉ាងណាទេន៎»។
តែទោះជាយ៉ាងណា ក្រោយចាកចោលឡានជាច្រើនម៉ោង បន្សល់ទុកលុយដុល្លារច្រើនដុំក្នុងរថយន្តយ៉ាងចំហរ ម្ចាស់គណនីខាងលើ ក៏បានបញ្ជាក់ឲ្យដឹងថា ទីបំផុត ម្ចាស់បានមកយកឡានវិញហើយ ប៉ុន្តែ មិនបានបញ្ចេញពីអត្តសញ្ញាណម្ចាស់ជាជនជាតិខ្មែរ ឬបរទេសនោះទេ ខណៈថតបង្ហាញរថយន្តបានផ្លាស់ទៅកាន់ចំណតទីតាំងថ្មី ដែលមានសន្តិសុខយាមកាមត្រឹមត្រូវ។
ពិតណាស់ ក្រោយពីបានឃើញបែបនេះ បងប្អូនមហាជនអ្នកលេងបណ្តាញសង្គម បានចូលទៅបញ្ចេញមតិឡើងព្រោងព្រាតតែម្តង។ ក្នុងនោះ ពលរដ្ឋម្នាក់បានលើកឡើងថា សង្ស័យសម្តែង ឬ ដាក់អន្ទាក់ទេដឹង បានដល់ថ្នាក់នុងលោក នេះគេហៅថាមានមាសអត់ក្រដាស់ខ្ចប់ហើយ។
រីឯអ្នកដទៃទៀត ក៏បានបញ្ចេញមតិលេងសើចថា «Gift ចុងឆ្នាំ ហេតុអីអ្នកឃើញមុនគេមិនមែនជាខ្ញុំ?», «ធ្វើអោយអាម្មណ៍គេគ្រប់គ្នា ស្ងប់ស្ងាត់បានអត់ចុងឆ្នាំហើយ រន្ធត់តាំងដើមឆ្នាំនៅញ៉េញ៉ៃចុងឆ្នាំទៀត ជីវិតអត់លុយក៏ពិបាក មានលុយហើយក៏ពិបាកទៀត មិចតេស, ចោរ ចឹងៗអីមើលមិនឃើញទេ,…៕
