កាសែត Metro បានចុះផ្សាយព័ត៌មានកាលពីថ្ងៃទី៦ កញ្ញា ម្សិលមិញនេះ ឲ្យដឹងថា ស្ត្រីជាកូនម្នាក់ឈ្មោះ Ayda Celine បានតម្លើងកាមេរ៉ានៅក្នុងបន្ទប់មើលថែឪពុករបស់នាងវ័យ ៨២ ឆ្នាំ នៅក្នុងទីក្រុង Sydney (អូស្ត្រាលី), ទីកន្លែងដែលនាងបានរកឃើញឪពុករបស់នាងត្រូវបានវាយធ្វើបាបដោយអ្នកមើលថែប្រុសម្នាក់ឈ្មោះ Prakush Paudyal ។
តាមរយៈវីដេអូឃ្លីប ឪពុករបស់នាង ត្រូវបានចាប់អូសចេញពីលើគ្រែទាំងបង្ខំ ទៅនឹងកម្រាល និងក្រោយមក គាត់ត្រូវបានវាយដុំជាមួយស្បែកជើងជាច្រើនលើក គួរឲ្យអាសូរមែនទែន ។
នាង Ayda Celine កូនស្រីរបស់លោកតាឈ្មោះ Nabulsi បានប្រាប់ 9 News ថា នាងបានកត់សម្គាល់ឃើញស្លាកស្នាមជាំនៅលើខ្លួនឪពុករបស់គាត់ មុនពេលតម្លើងកាមេរ៉ា ដើម្បីតាមដានករណីសង្ស័យនេះ ។
នាងនិយាយថា៖ «គាត់បានត្អូញត្អែរអំពីការឈឺចាប់ ហើយនៅពេលខ្ញុំស្រាតខោរបស់គាត់ ខ្ញុំបានស្លាកស្នាមជាំទាំងដុំៗ ដែលបានកើតឡើងនៅទីនោះមួយរយៈ» ។
«ខ្ញុំត្រូវបានគេពន្យល់ឲ្យដឹងថា គាត់អាចធ្លាក់ ដូច្នេះ ខ្ញុំក៏បណ្តោយឲ្យទៅតាមហ្នឹងទៅ» ។
នៅពេលវេលានោះកន្លងផុតទៅ ហើយគាត់ពុំព្រមចាកចេញពីបន្ទប់របស់គាត់ ឬ ហូបអ្វីៗទាំងអស់ ហេតុនេះ ក៏ជំរុញឲ្យនាងត្រូវតម្លើងកាមេរ៉ា ។ នាងនិយាយថា នាងធ្វើបែបនេះ ព្រោះតែនាង «មិនទុកចិត្តថា ពួកគេកំពុងមើលថែគាត់» ហើយអះអាងថា គាត់ត្រូវបានទុកឲ្យអង្គុយជាមួយខោទ្រនាប់ប្រឡាក់ «អស់រយៈពេលច្រើនម៉ោង» ។
ហេតុការណ៍នេះ ត្រូវបានចោទប្រកាន់ថា បានកើតឡើងរវាងថ្ងៃទី២៦ និង ២៩ កញ្ញា ។
Prakash Paudyal អាយុ ៣៥ ឆ្នាំ មកពី Hornsby ត្រូវបានចោទប្រកាន់ពីបទប្រើអំពើហិង្សា និងប្រើប្រាស់អាវុធដោយចេតនា ដើម្បីប្រព្រឹត្តបទល្មើសមិនគួរគប្បីធ្វើនេះ ៕ ឧត្តម (metro.co.uk)
