ព្រះសីហនុ៖ អ្នកឃ្លាំមើលផែនការអភិវឌ្ឍសង្គម និងភ្ញៀវទេសចរចម្រុះជាតិសាសន៍ បង្ហាញការព្រួយបារម្ភខ្លាច នៅថ្ងៃអនាគត មិនមានឆ្នេរខ្សាច់ ឬឆ្នេរឆ្នេរសមុទ្រ សម្រាប់ផ្តល់ជូនភ្ញៀវទេសចរ ដែលចូលមកដល់ខេត្តព្រះសីហនុ ដើម្បីចូលទៅកម្សាន្តឲ្យបានទូលំទូលាយទៀតទេ ព្រោះរាល់ថ្ងៃនេះ ឆ្នេរសមុទ្រខេត្តព្រះសីហនុ ភាគច្រើន ត្រូវរដ្ឋាភិបាល វិនិយោគទៅឲ្យក្រុមហ៊ុនអភិវឌ្ឍសង់សណ្ឋាគារធំៗ និងហ៊ុមព័ទ្ធឆ្នេរមិនឲ្យមនុស្សដើរឆ្លងកាត់ទៀតទេ។
ត្រង់ចំណុចនេះ មន្ត្រីអង្គការក្រៅរដ្ឋាភិបាល និងភ្ញៀវទេសចរមួយចំនួន បានអះអាងថា បច្ចុប្បន្ននេះ សង្កេតឃើញថា ឆ្នេរសមុទ្រភាគច្រើន នាខេត្តព្រះសីហនុ ត្រូវបានក្រុមហ៊ុនឯកជនសំណង់សំណង់ធំស្កឹមស្កៃប្រណិតៗជាច្រើនកន្លែង និងមានទីតាំងជាប់ឆ្នេរសមុទ្រ ហើយបានហ៊ុមព័ទ្ធរបង មិនឲ្យប្រជាពលរដ្ឋ ឬភ្ញៀវទេសចរឆ្លងកាត់ទេ។
ទាក់ទិនបញ្ហានេះ លោក យន្ត មីន អភិបាលខេត្តព្រះសីហនុ បានពន្យល់ថា រាល់សំណង់សណ្ឋាគារខ្នាតធំៗ ទំនើបៗ ដែលកំពុង់សាងសង់នៅតាមឆ្នេរសមុទ្រនាមូលដ្ឋាននេះ នឹងជួយឲ្យប្រជាពលរដ្ឋ ពិសេសយុវជន ក្រោយបញ្ចប់ការសិក្សា អាចមានការងារធ្វើ និងមានប្រាក់បៀវត្សន៍ខ្ពស់ និងជួយបង្កើនប្រាក់ចំណូលគ្រួសាររបស់ពួកគេ នាថ្ងៃអនាគត។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ លោកស្រី ជៀប សុធារី បង្ហាញការព្រួយបារម្ភខ្លាចថា នាថ្ងៃអនាគត ទំនងជាមូលដ្ឋាននេះ មិនមានឆ្នេរសមុទ្រឲ្យបានទូលំទូលាយ សម្រាប់ផ្តល់ជូនភ្ញៀវទេសចរជាតិអន្តរជាតិ ដែលចូលទៅទស្សនា ឬសំរាកលំហែតាមឆ្នេរសមុទ្រ ឲ្យបានច្រើនទីតាំងទៀតទេ។
អ្នកឃ្លាំមើលសង្គមរូបនេះ បានកត់សម្គាល់ថា រាល់ថ្ងៃនេះឆ្នេរសមុទ្រ ឬឆ្នេរខ្សាច់ភាគច្រើននាខេត្តព្រះសីហនុ ត្រូវរាជរដ្ឋាភិបាល ក៏ដូចជារដ្ឋបាលខេត្តព្រះសីហនុ បានវិនិយោគ ទៅឲ្យក្រុមហ៊ុនឯកជន ដើម្បីអភិវឌ្ឍសង់សណ្ឋាគារធំៗ មានរយៈពេលវែង ដែលនាំឲ្យឆ្នេរសមុទ្រនាមូលដ្ឋានខេត្តទេសចរណ៍មួយនេះ រួមតូចចង្អៀតនាថ្ងៃអនាគត។
លោកស្រី កត់សម្គាល់ថា នៅក្នុងអាណត្តិ ដែល លោក យន្ត មីន បានមកដឹកនាំជាអភិបាលខេត្តព្រះសីហនុ លោកស្រីសង្កេតឃើញថា ឆ្នេរសមុទ្រខេត្តនេះភាគច្រើន នាមូលដ្ឋាននេះ ត្រូវបានវិនិយោគទៅឲ្យក្រុមហ៊ុនឯកជន ហើយត្រូវក្រុមហ៊ុនទាំងនោះ បានហ៊ុមព័ទ្ធរបង មិនឲ្យទេសចរអាចដើរឆ្លងកាត់ទៀតទេ។
ផ្តើមពីបញ្ហានេះ អ្នកឃ្លាំមើលសង្គមរូបនេះ បង្ហាញការព្រួយបារម្ភខ្លាចទៅថ្ងៃអនាគត ខេត្តព្រះសីហនុ នឹងមិនមានឆ្នេរខ្សាច់ ឬឆ្នេរសមុទ្រ ឲ្យបានច្រើនកន្លែង សម្រាប់ផ្តល់ជូនភ្ញៀវទេសចរ ដែលចូលមកទស្សនាខេត្តនេះ សំរាកលំហែលើឆ្នេរខ្សាច់ និងចុះងូតទឹកសមុទ្រ ឲ្យបានទូលំទូលាយទៀតទេ ព្រោះត្រូវរដ្ឋាភិបាល វិនិយោគទៅឲ្យក្រុមហ៊ុនឯកជនភាគច្រើន។
លោកស្រី សុធារី បានអះអាងថា បច្ចុប្បន្ននេះមានឆ្នេរសមុទ្រ ឬឆ្នេរខ្សាច់មួយចំនួនរួមមាន៖ ឆ្នេរនៅម្តុំជិតបរិវេណសាលាខេត្តព្រះសីហនុ ចាប់ពីឆ្នេរថ្មី ឆ្នេរប៉ោកី ឆ្នេរមាស ឆ្នេរជ័យជំនះឆ្នេរហាវៃ ឆ្នេរលំហែកាយ ឆ្នេរឯករាជ្យ និងឆ្នេរសុខាជាដើម ត្រូវក្រុមហ៊ុនសង់សំណង់សណ្ឋាគារធំស្កឹមស្កៃ នៅជាប់ឆ្នេរសមុទ្រ និងធ្វើរបងហ៊ុមព័ទ្ធឆ្នេរមិនឲ្យមនុស្សដើរឆ្លងកាត់ទេ។
មន្ត្រីឃ្លាំមមើលសង្គម មានមន្ត្រីអង្គការលីកាដូ និងសមាគមអាដហុក ប្រចាំខេត្តព្រះសីហនុ ជាដើម បានបង្ហាញទស្សនៈប្រហាក់ប្រហែលគ្នាថា មិនជំទាស់ផែនការអភិវឌ្ឍ របស់រាជរដ្ឋាភិបាល និងរដ្ឋបាលខេត្តព្រះសីហនុ ដែលបានខិតខំស្វែងរកអ្នកវិនិយោគទុនធំៗ ឲ្យចូលមកអភិវឌ្ឍមូលដ្ឋាននេះទេ ប៉ុន្តែគួរតែកុំឲ្យការផ្តល់សិទ្ធិវិនិយោគនោះ កុំប៉ះពាល់ ឬបំផ្លាញដល់ឆ្នេរសមុទ្រធ្ងន់ធ្ងរដល់ឆ្នេរសមុទ្រកម្ពុជា ដែលជាប់ចំណាត់ថ្នាក់ ជាឆ្នេរស្រស់ស្អាតលំដាប់ពិភពលោក បែរជាត្រូវរួមតូចចង្អៀត ឬមិនមានឆ្នេរសមុទ្រ ឲ្យបានទូលំទូលាយ សម្រាប់ផ្តល់ជូនភ្ញៀវទេសចរ ជាតិអន្តរជាតិ ដែលនឹងមានកំណើនខ្ពស់នាមូលដ្ឋាននេះ នៅថ្ងៃអនាគត។
ឆ្លើយតបញ្ហានេះ អភិបាលខេត្តព្រះសីហនុ លោក យន្ត មីន កន្លងមកនេះ បានផ្តល់សម្ភាសឲ្យប្រព័ន្ធផ្សព្វផ្សាយដឹងថា រដ្ឋបាលខេត្ត ក៏ដូចជាប្រមុខដឹកនាំរាជរដ្ឋាភិបាល បានខិតខំស្វែងរកអ្នកវិនិយោគធំៗ ឲ្យចូលមកបណ្តាក់ទុន ឬបង្កើតរបររកទទួលទាន នាមូលដ្ឋាននេះ មានវិនិយោគទៅលើសំណង់សណ្ឋាគារប្រណិតៗ លើគម្រោងវិនិយោគរាប់រយលានដុល្លារសហរដ្ឋអាមេរិក ដើម្បីជម្រុញឲ្យខេត្តព្រះសីហនុ មានការរីកចំរើន បានឆាប់ ឲ្យស្របតាមគោលនយោបាយ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញ។
បញ្ហានេះ លោក យន្ត មីន មានជំនឿថា តាមរយៈសំណង់អាគារធំស្កឹមស្កៃ ឬប្រណិតៗ ដែលភាគច្រើនជាក្រុមវិនិយោគធំៗ មកពីបរទេស កំពុងតែធ្វើសកម្មភាពរាល់ថ្ងៃនេះ នឹងអាចជួយឲ្យប្រជាពលរដ្ឋ ពិសេសយុវជនរស់នៅខេត្តព្រះសីហនុ អាចមានការងារធ្វើមានប្រាក់បៀវត្សន៍ខ្ពស់ ដើម្បីរួមចំណែកបង្កើនប្រាក់ចំណូលចិញ្ចឹមគ្រួសារ មានការរីកចម្រើននាថ្ងៃអនាគត។
ឆ្នេរសមុទ្រប្រទេសកម្ពុជា សរុបមានប្រវែង ៤៤០គីឡូម៉ែត្រ។ ខេត្តមានមូលដ្ឋានជាប់ឆ្នេរសមុទ្រ រួមមាន៖ ខេត្តកោះកុង ខេត្តព្រះសីហនុ ខេត្តកំពត និងខេត្តកែប។ ខេត្តទាំង ៤នេះ ត្រូវបានដាក់បញ្ចូលជាសមាជិកពេញសិទ្ធិរបស់ក្លឹបឆ្នេរសមុទ្រ ដែលស្រស់ស្អាតបំផុតនៅលើសកលលោក កាលពីថ្ងៃទី២៦ ខែឧសភា ឆ្នាំ២០១១ នៅប្រទេសសេណេហ្គាល់ (Senegal)៕ ដោយ៖ ដែន សីមា
