ភ្នំពេញ៖ អាជ្ញាធររាជធានីនឹងមានវិធានការក្តៅ ចំពោះអ្នកដែលនៅតែរឹងទទឹងរំលោភយកចិញ្ចើមផ្លូវធ្វើជាកម្មសិទ្ធិផ្ទាល់ខ្លួន ។ការបញ្ជាក់បែបនេះរបស់លោកឃួង ស្រេង អភិបាលរាជធានីភ្នំពេញនិងជាប្រធានគណៈបញ្ជាការឯកភាពរាជធានីភ្នំពេញ ត្រូវបានធ្វើឡើងកាលពីរសៀលថ្ងៃទី៣០ វិច្ឆិកា២០១៧ ក្នុងកិច្ចប្រជុំ គណៈបញ្ជាការឯកភាពរាជធានីភ្នំពេញ។
លោក ម៉េត មាសភ័ក្ដី អ្នកនាំពាក្យរដ្ឋបាលរាជធានីភ្នំពេញបានឱ្យដឹងក្រោយកិច្ចប្រជុំនេះថា ក្នុងអង្គប្រជុំខាងលើលោកអភិបាលរាជធានីភ្នំពេញបានបញ្ជាអោយសមត្ថកិច្ចពាក់ព័ន្ធទាំងអស់ពិសេស គណៈបញ្ជាការឯកភាពខណ្ឌ ត្រូវការពង្រឹងលើការរៀបចំសណ្តាប់ធ្នាប់សាធារណៈនៅលើផ្លូវធំៗទាំង១១ខ្សែ ដែលរដ្ឋបាលរាជធានីភ្នំពេញបានដាក់ចេញជាផែនការជាអាទិភាពនាពេលកន្លងមកនេះ។
លោកម៉េត មាសភ័ក្ដី បានបញ្ជាក់ថា កន្លងមកនេះពាក់ព័ន្ធនឹងផ្លូវធំៗទាំង១១ខ្សែខាងលើ រដ្ឋបាលរាជធានីភ្នំពេញក៏ដូចជាអាជ្ញាធរខណ្ឌបានចេញសេចក្តីជូនដំណឹងដល់ប្រជាពលរដ្ឋនិងអាជីវករដែលរំលោភយកចំណីចិញ្ចើមផ្លូវ ទ្រូវផ្លូវយកមកធ្វើជាកម្មសិទ្ធិរបស់ខ្លួនច្រើនលើកច្រើនសារហើយដែរ ពោលគឺពួកគាត់អាចប្រើប្រាស់បានតែចិញ្ចើមផ្លូវត្រឹម១ភាគ៣ប៉ុណ្ណោះ ដោយទុក២ភាគ៣ទៀតសម្រាប់អ្នកថ្មើរជើង។ ប៉ុន្តែទោះបីជាយ៉ាងណាក្តីអ្នករំលោភបំពាននៅតែមាន ។ដូច្នេះទេ ក្នុងកិច្ចប្រជុំនេះ លោកអភិបាលរាជធានីភ្នំពេញ បានអោយអភិបាលខណ្ឌដែលពាក់ព័ន្ធនឹងផ្លូវធំៗទាំង១១ខ្សែនេះ កោះហៅប្រជាពលរដ្ឋនិងអាជីវករដែលនៅតែរំលោភផ្លូវនិងចិញ្វើមផ្លូវទាំងអស់នោះ មកប្រជុំប្រាប់ពួកគាត់ជាចុងក្រោយ ។មានន័យថា បើពួកគាត់តាំងលក់ទំនិញ ការចតរថយន្តលើ ចិញ្ចើមផ្លូវ ទ្រូងផ្លូវសាធារណៈទៀត ដាច់ខាតត្រូវតែមានវិធានការរដ្ឋបាលហើយ ពោលគឺយើងនឹងអាចស្ទូចរថយន្តមករក្សាទុក ដើម្បីមានវិធានការទៅតាមច្បាប់ ហើយការតាំងលក់ទំនិញ ដែលរំលោភក៏នឹងមានវិធានការក្តៅដូចគ្នានេះដែរ ហើយអាចនឹងឈានដល់ការបិទអាជីវកម្មថែមទៀត។
ក្នុងកិច្ចប្រជុំនោះដែរ លោកឃួង ស្រេងក៏បានជម្រុញអោយអាជ្ញាធរមានវិធានការចំពោះការតម្លើងថ្លៃផ្ទះជួល តម្លើងថ្លៃទឹកភ្លើងចំពោះ កម្មករដែលកំពុងស្នាក់នៅបំរើការងារផងដែរ ។លោកបញ្ជាក់ថា តាមអនុសាសន៍សម្តេចតេជោហ៊ុន សែន គឺមិនអោយតម្លើងថ្លៃផ្ទះជួល តម្លើងថ្លៃទឹក ភ្លើងលើកម្មករដែលកំពុងស្នាក់នៅបំរើការងារឡើយ ហើយការយកលុយភាស៊ីពីអ្នកលក់ដូរ តាមកញ្ច្រែង ល្អី តូចតាចនៅតាមផ្សារក៏មិនត្រូវយកលុយដែរ ។ ក្រៅពីនេះលោកឃួង ស្រេង ក៏បានណែនាំអោយមន្ត្រីយើងទាំងអស់ជៀសអោយឆ្ងាយពីការយកលុយសេវារដ្ឋបាលពីប្រជាពលរដ្ឋ ខុសពីច្បាប់ដែលបានកំណត់ផងដែរ ៕ ដោយ៖កូឡាប
