ខេត្តព្រះសីហនុ ៖ មន្ត្រីមន្ទីរសាធារណការ និងដឹកជញ្ជូនខេត្តព្រះសីហនុ បានឲ្យដឹងថា កំណាត់ផ្លូវជាតិលេខ៤ នាក្រុងព្រះសីហនុ ចាប់ពីផ្លូវចំណោតលោកយាយម៉ៅ ចុះឆ្ពោះ ទៅដល់ផ្លូវបំបែកកែងរ៉ា មានប្រវែងជាង ២០០ម៉ែត្រ ត្រូវបានចាក់អ៊ុតកៅស៊ូបន្ថែម នៅព្រឹកថ្ងៃទី២៣ ខែតុលា ឆ្នាំ២០១៨នេះ។
ប្រធានមន្ទីរសាធារណការ និងដឹកជញ្ជូនខេត្តព្រះសីហនុ លោក ណុប ហេង ឱ្យដឹងថា ការងារស្ថាបនាផ្លូវខាងលើនេះ គឺជាគម្រោងពង្រឹងគុណភាពផ្លូវ ដែលឯកឧត្តមយន្ត មីន អភិបាលខេត្តព្រះសីហនុ បានជម្រុញឱ្យមន្ទីរជំនាញត្រូវធ្បើការងារនេះ ជាបន្ទាន់ ដោយចាក់អ៊ុតជាកៅស៊ូកម្រាស ៨ហ៊ុន ទទឹង ៧ម៉ែត្រ ពីលើបេតុង ដែលចាក់ក្រាលពីមុន ដោយទុកចំណែកបេតុងខ្លះនៅចិញ្ចើមផ្លូវសម្រាប់ការពារលំហូរទឹកភ្លៀង។
ជាបន្តបន្ទាប់មកនេះ ប្រជាពលរដ្ឋមួយចំនួន បានរិះគន់ថា បញ្ហាផ្លូវចំណោតលោកយាយម៉ៅ ចុះមកកំពង់ផែឧស្សាហ៍ បានកើតមានគ្រោះថ្នាក់ចរាចរណ៍ បណ្តាលឱ្យមានមនុស្សស្លាប់ និងរបួសជាច្រើនករណី ដោយសារតែការចាក់ក្រាលបេតុងធ្វើឱ្យងាយរអិល និងបង្កជាគ្រោះថ្នាក់កើតឡើង។
យ៉ាងនេះក្តី លោក ណុប ហេង បានច្រានចោល ហើយបានបញ្ជាក់ថា បញ្ហាគ្រោះថ្នាក់ចរាចរណ៍ភាគច្រើន នៅត្រង់ចំណុច ចំណោតលោកយាយម៉ៅនោះ គឺបណ្តាលមកពីកត្តាអ្នកបើកបរ មិនប្រុងប្រយ័ត្ន។
លោកសង្កត់ធ្ងន់ថា បើទោះជាផ្លូវកៅស៊ូក៏ដោយ ផ្លូវបេតុងក៏ដោយ បើកាលណាអ្នកបើកបរមានការប្រុងប្រយ័ត្ន និងកុំបើកលឿន ពេលចុះចំណោត ឬកុំវ៉ាជែងទីចង្អៀត និងបើកបរមានការយោគយល់គ្នា នោះ បញ្ហាគ្រោះថ្នាក់ចរាចរណ៍ នឹងអាចកាត់បន្ថយ៕ ដោយ ៖ ដែនសីមា
