NASA បានបើកយុទ្ធនាការរុករក អនុភពមួយដែលមានបរិមាណរ៉ែ តម្លៃដល់ទៅ 10.000លានប៊ីលានដុល្លារ វាគ្រប់គ្រាន់ដើម្បីផ្តួលរំលំសេដ្ឋកិច្ចពិភពលោក។
តាម Daily Star អនុភពមានឈ្មោះថា “16 Psyche ដែលមានទទឹងប្រហែល ២៥២ គីឡូម៉ែត្រ ស្ថិតនៅចម្ងាយពីផែនដី ឆ្ងាយជាងប្រវែងពីផែនដីទៅដល់ព្រះអាទិត្យ៣ដង។ NASA មានគម្រោងបាញ់បង្ហោះយានអវកាស ទៅស្រាវជ្រាវផ្ទៃ នៃអនុភពនេះ នាឆ្នាំ 2022។
ព័ត៌មានស្ទាបស្ទង់មុននោះឲ្យដឹងថា អនុភព 16 Psyche គឺជារ៉ែធម្មជាតិដ៏មហាសម្បើមក្នុងអវកាស។ បរិមាណរ៉ែ រួមមាន ៖ មាស ប្លាទីន ដែក nickel ។ល។ គឺមាននៅក្នុងអនុភព 16 Psyche ហើយតាមការប៉ាន់ស្មាននោះមានតម្លៃទៅ 10.000លានប៊ីលានដុល្លារ។
ទឹកប្រាក់ដ៏ធំសម្បើមនេះ គឺគ្រប់គ្រាន់សម្រាប់ផ្តួលរំលំខឿនសេដ្ឋកិច្ចពិភពលោក ដែលបច្ចុប្បន្នប៉ាន់ស្មានមានតម្លៃ 73.700 ប៊ីលានដុល្លារ ។
តាម Lindy Elkins-Tanton អ្នកវិទ្យាសាស្ត្ររបស់ NASA ធ្វើការក្នុងគម្រោង 16 Psyche និយាយថា ៖ “ប្រសិនបើយើងអាចទាញអនុភពនេះវិលត្រឡប់មកផែនដី តើយើងនឹងបន្តធ្វើអ្វីទៀត?”។
“ពិតជាពិបាកលាក់បាំងទំហំលោហៈដ៏ធំសម្បើមនេះ ហើយក៏ពុំអាចបញ្ចៀសថា វាពុំឥទ្ធិពលដល់ខឿនសេដ្ឋកិច្ចពិភពលោកនោះ។ មូលហេតុគឺបរិមាណលោហៈក្នុងអនុភព 16 Psyche គ្រប់គ្រាន់នឹងធ្វើឲ្យវិស័យអាជីវកម្មផលិតរ៉ែ ត្រូវបិទទ្វាររាប់រយឆ្នាំឯណោះ”។ Lindy ពោលបន្តថា “អាចចាត់ទុកបានថា ប្រភពផ្គត់ផ្គង់លោហៈដ៏ធំសម្បើមនេះ ដោះស្រាយបានរាល់បញ្ហារបស់មនុស្សលោកក្នុងអំឡុងពេលមួយយ៉ាងវែង”។
ក្រៅពីគោលបំណងទាញយកបរិមាណរ៉ែ ដ៏ធំសម្បើមនេះ NASA សង្ឃឹមថា តាមរយៈសកម្មភាពនេះវានឹងជួយឲ្យអ្នកជំនាញការអវកាសយល់កាន់តែច្បាស់ជាងមុនអំពីរបៀបការពារផែនដីជាមួយការប៉ះទង្គិចជាមួយអនុភពនានា។
ជាមួយផ្ទៃទទឹងទំហំប្រមាណ ២៥២គីឡូម៉ែត្រ អនុភព 16 Psyche នេះធំជាង១៧ដង ប្រៀបនឹងដុំអាចម៍ផ្កាយដែលបានធ្លាក់ចុះមកផែនដី កាលពីប្រមាណ ៦៥លានឆ្នាំមុន ជាហេតុធ្វើឲ្យពពួកដាយណូស័រងាប់ខ្ទេចគ្មានសល់៕ ចន្ទ្រា
