យុវជនឥណ្ឌាម្នាក់នេះ ទោះបីពិន្ទុប្រឡងចូលសាលាពេទ្យមានចំនួនលើសពីសំណូមពរក្តី ប៉ុន្តែដោយសារតែគាត់មានកម្ពស់តែ៩៥សង់ទីម៉ែត្រ គេមិនអនុញ្ញាតឱ្យចូលរៀន ទ្រាំមិនបានក៏ដាក់ពាក្យបណ្តឹងទៅតុលាការកំពូល ហើយក៏ឈ្នះក្តី។
តាមនោះ Ganesh Baraiya អាយុ១៧ឆ្នាំ បានចុះឈ្មោះប្រឡងចូលរៀនផ្នែកឱសថសាស្ត្រនិងវះកាត់ ។ គាត់ទទួលបានពិន្ទុរហូត២៣៣ពិន្ទុ ក្នុងពេលដែលពិន្ទុកំណត់តែត្រឹម៨៨ពិន្ទុប៉ុណ្ណោះ។
ប៉ុន្តែបន្ទាប់ពីពិនិត្យឯកសាររបស់គាត់ សាលាបានសម្រេចចិត្តបដិសេធ ព្រោះតែដោយសារកម្ពស់ទាបពេក ពិបាកក្នុងការរៀបចំឧបករណ៍សម្រាប់វះកាត់ ក៏ដូចជាការករណីខ្លះពុំអាចធ្វើទៅបាន។
យុវជនខាងលើក៏សម្រេចចិត្តដាក់ពាក្យបណ្ដឹងទៅតុលាការកំពូលកាលពីខែមុន។ ក្រោយពេលពិនិត្យលើផ្លូវច្បាប់ តុលាការសម្រេចអនុញ្ញាតឱ្យយុវជននេះបានចូលរៀន។ដូច្នេះGanesh នឹងក្លាយជាវេជ្ជបណ្ឌិតមាឌតូចក្នុងពិភពលោក។ Ganesh ពោល៖ ខ្ញុំសប្បាយចិត្តយ៉ាងខ្លាំង ព្រោះទទួលបានយុត្តិធម៌ ។ឥឡូវខ្ញុំអាចសម្រេចសុបិនរបស់ខ្លួនតាំងពីតូច។ ខ្ញុំដឹងថាខ្ញុំខុសប្លែកពីគេ តែខ្ញុំក៏ចង់ទទួលបានជីវិតស្រស់ស្អាតមួយដូចអ្នកដទៃ និងធ្វើឱ្យឳពុកម្តាយមោទនភាព។
Ganesh គឺជាក្មេងឆ្លាតវៃ រហ័សរហួនតាំងពីតូច វាចំណាយពេលច្រើនទៅលើការសិក្សា ទោះបីជារងការពេបជ្រាយយ៉ាងច្រើនក្តី។
មុននោះ ក្រុមសៀកមួយបានទាក់ទងនឹងឪពុក Ganesh ដោយសុខចិត្តផ្តល់បៀវត្ស១.០០០ផោនអង់គ្លេស ដែលស្មើនឹង៦ដងនៃប្រាក់បៀវត្សរបស់ខ្លួនដើម្បីទៅចូលរួមក្នុងក្រុមសៀក។ឳពុក Ganesh បានបដិសេធ ហើយលោកតែងបារម្ភខ្លាចក្រុមសៀកចាប់ជំរិតកូនរបស់ខ្លួន ទើបលោកតែងជូនកូនទៅរៀន ហើយអង្គុយក្បែរកូនតែម្តង៕សូយន
