ខេត្តស្វាយរៀង ៖ នៅថ្ងៃទី ២៥ ខែ ធ្នូ ឆ្នាំ២០១៨ វេលាម៉ោងប្រហែលជិត ០៨យប់ នៅភូមិស្រះវង់ សង្កាត់ស្វាយរៀង ក្រុងស្វាយរៀង មានករណីចោរលួចម៉ូតូ០១គ្រឿងម៉ាកវ៉េវ ពណ៌ខ្មៅ ពាក់ស្លាកលេខ ស្វាយរៀង1F-1074 ដោយមានជនសង្ស័យមិនស្គាល់អត្តសញ្ញាណបានធ្វើសកម្មភាពលួចម៉ូតូខាងលើ ជាកម្មសិទ្ធរបស់ឈ្មោះ កែវ ជិន ភេទស្រី អាយុ ៣៦ឆ្នាំ មុខរបរលក់ពោតស្ងោរ រស់នៅភូមិចុងព្រែក សង្កាត់ស្វាយរៀង ខេត្តស្វាយរៀង។
យោងតាមសមត្ថកិច្ចបានអោយដឹងថា៖ក្រោយពីទទួលបានព័ត៌មានថា៖មានករណីបាត់ម៉ូតូនោះកំលាំងជំនាញក្រុង បានសហការជាមួយកំលាំងជំនាញខេត្ត និងប៉ុស្តិ៍រដ្ឋបាលស្វាយរៀង ចុះស្រាវជ្រាវជាបន្តបន្ទាប់រហូតមកដល់ថ្ងៃទី ២៦ ខែ ឆ្នូ ឆ្នាំ ២០១៨ វេលាម៉ោង៨ព្រឹក បានឆែកកាមេរ៉ាសុវត្ថិភាពតាមដងផ្លូវ ឃើញមុខសញ្ញាជាជនសង្ស័យ ០១នាក់ មានឈ្មោះ កែវ ចាន់រស្មី ហៅម៉ី ភេទប្រុស អាយុ ២៥ឆ្នាំ មុខរបរមិនពិតប្រាកដ រស់នៅភូមិស្រះវង់ សង្កាត់ស្វាយរៀង ក្រុងស្វាយរៀង ។
ប្រភពខាងលើបានបន្តអោយដឹងទៀតថា៖រហូតដល់ម៉ោង១១ថ្ងៃ ដដែលសមត្ថកិច្ចយើងបាននាំខ្លួនមុខសញ្ញា ជាជនសង្ស័យខាងលើ មកសួរនាំនៅអធិការដ្ឋាននគរបាលក្រុងស្វាយរៀង ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពលួចម៉ូតូខាងលើពិតប្រាកដមែន ហើយជិះយកទៅលក់នៅផ្សាក្រោលគោ ក្នុងតំលៃ ៣៣៥ដុល្លា ទាំងយប់រួចក៍ត្រឡប់មកផ្ទះវិញ ។
ប្រភពបានបន្ថែមទៀតថា៖ក្រោមការបញ្ជាដឹកនាំផ្ទាល់របស់លោកឧត្តមសេនីយ៍ត្រី កុយ សុភាព ស្នងការរងទទួលផែនព្រហ្មទណ្ឌ សហការជាមួយកំលាំងអធិការដ្ឋាននគរបាលស្រុកស្វាយជ្រំ បាននាំខ្លួនឈ្មោះ សុខ រ៉ា ភេទប្រុស អាយុ ៤៣ឆ្នាំ មុខរបរជាងជួសជុលម៉ូតូ មានទីលំនៅភូមិ ធ្លក ឃុំក្រោលគោ ស្រុកស្វាយជ្រំ ខេត្តស្វាយរៀង ពីបទទទួលផលចោរកម្ម រួមនឹងវត្ថុតាងម៉ូតូម៉ាកវ៉េវ ពណ៌ខ្មៅ ០១គ្រឿង និងបានធ្វើការចុះឆែកឆេរផ្ទះរបស់ឈ្មោះ កែវ ចាន់រស្មី ហៅម៉ី ( ជាជនសង្ស័យ ) ភូមិស្រះវង់ សង្កាត់ស្វាយរៀង ក្រុងស្វាយរៀង ប្រមូលបានសំភារៈធ្វើកម្មភាពលួចមួយចំនួន ។ បច្ចុប្បន្ន ជនសង្ស័យទាំង ០២នាក់ខាងលើ ឃាត់ខ្លួននៅអធិការដ្ឋាននគរបាលខេត្តស្វាយរៀងដើម្បីបំពេញសំណុំរឿងចាត់ការតាមច្បាប់ ៕ ដោយ ៖ វ៉ៃគោ
