ខេត្តកណ្តាល ៖ ប្រជាពលរដ្ឋរស់នៅភូមិស្លែង ឃុំត្រពាំងវែង ស្រុកណ្តាលស្ទឹង ខេត្តកណ្តាល បានបង្ហាញការព្រួយបារម្ភ និងក្តៅក្រហាយ ដោយសារតែសកម្មភាពជីករណ្តៅដីមានជំរៅជ្រៅ ហើយនៅក្បែរភូមិអ្នកស្រុកកំពុងរស់នៅអាស្រ័យផល ដោយមិនទុកជើងទេ ឡើងពីរណ្តៅដីឲ្យបានត្រឹមត្រូវទេ។
ជាងនេះទៀត សកម្មភាពរថយន្តដឹកដី របស់ឈ្មួញដីទាំងនោះ បានបង្កឲ្យមានជាធូលីហុយ ពេលរថយន្តបើកឆ្លងកាត់ លំនៅដ្ឋានអ្នកភូមិ និងមិនបានធ្វើរបងព័ទ្ធរណ្ដៅដី ដែលជីកនោះទេ ហើយរណ្តៅដីមានជំរៅជ្រៅនេះ បានបង្កជាក្តីបារម្ភ និងប្រឈមមុខខ្លាំង ចំពោះកុមារតូចៗ និងសត្វចញ្ចឹម របស់អ្នកស្រុកពួកគាត់។
ប្រភពព័ត៌មាន ឲ្យដឹងបន្តថា សកម្មភាពជីកយកអាចម៍ដីខាងលើនេះ បានកើតមានជាយូរមកហើយៗ ក្នុងរយៈពេលកន្លងមកនេះ ទោះបីអ្នកភូមិ បានទទូចដល់អាជ្ញាធរមូលដ្ឋាន ឲ្យជួយអន្តរាគមន៍ទប់ស្កាត់បែបណាក្តី ប៉ុន្តែមិនមានប្រសិទ្ធភាពនោះទេ ព្រោះក្រុមអ្នកម្ចាស់អាជីវកម្ម បានត្រូវរ៉ូវគ្នា ជាមួយមន្ត្រីជំនាញ និងអាជ្ញាធរថ្នាក់លើ ទើបបានជាឈ្មួញជីករណ្តៅយកអាចម៍ដីខាងលើនេះ អាចបន្តសកម្មភាព របស់ខ្លួន ល្មើសបទដ្ឋានបច្ចេកទេស របស់ក្រសួង ឬល្មើសច្បាប់ បានដោយរលូនរហូតមកដល់ពេលនេះ។
ឆ្លើយតបបញ្ហានេះ លោក បូ ណារ៉េត អភិបាលស្រុកកណ្ដាលស្ទឹង ខេត្តកណ្ដាល បានឲ្យដឹងថា កន្លងមកអាជ្ញាធរស្រុក ធ្លាប់បានដាក់របាយការ ជុំវិញកង្វល់ពលរដ្ឋ ជូនទៅថ្នាក់លើ ដើម្បីស្នើសុំកិច្ចអន្តរាគមន៍ទៅថ្នាក់ដឹកនាំខេត្ត និងថ្នាក់ដឹកនាំក្រសួងជំនាញពាក់ព័ន្ធ ឲ្យជួយទប់ស្កាត់ទៅលើម្ចាស់អាជីវកម្មជីកយកអាចម៍ដី ដែលមានរណ្តៅជ្រៅ ៗ ជាមុន នឹងបន្តអាជ្ញាប័ណ្ណជូនក្រុមហ៊ុនជីកយកអាចម៍ដី នៅមូលដ្ឋានខាងលើនេះដែរ។
លោកបន្តថា ករណីនេះលោកបានស្នើឲ្យមន្ត្រីជំនាញ ឲ្យចុះមកពិនិត្យ មើលដល់មូលដ្ឋាន ដែលកើតមានបញ្ហា ហើយខាងក្រសួង និងថ្នាក់ខេត្ត បានចុះមកពិនិត្យ រួចក្រោយមកក៏បានចេញអាជ្ញាប័ណ្ណបន្ត ឲ្យក្រុមហ៊ុនជីករណ្តៅដីនោះជាបន្តទៀត ដោយមិនបានឆ្លងយោបល់ពីអាជ្ញាធរថ្នាក់ស្រុកនោះទេ។
ត្រង់ចំណុចនេះ លោក បូ ណារ៉េត អភិបាលស្រុកកណ្ដាលស្ទឹង បានហៅការបន្តផ្តល់អាជ្ញាប័ណ្ណជីករណ្តៅដីខាងលើនេះ ថាបានធ្លាក់ចុះពីលើមេឃ…។
ទាក់ទិនបញ្ហានេះ ចំពោះ បទដ្ឋានបច្ចេកទេស របស់ក្រសួងជំនាញវិញ គឺច្បាប់បានកំណត់ថា ការជីករណ្តៅដីលើសពីមួយហិកតា ត្រូវសុំច្បាប់អនុញ្ញាតពីក្រសួងជំនាញ រួមមាន៖ ក្រសួងរ៉ែ និងថាមពល និងក្រសួងបរិស្ថាន។ ប៉ុន្តែបើជីករណ្តៅដីត្រឹមមួយហិកតា អាចសុំត្រឹមរដ្ឋបាលខេត្ត។ ក្នុងនោះបើក្រុមហ៊ុនជីករណ្តៅដីនោះ មានគម្រោងធ្វើបន្តអាជ្ញាប័ណ្ណបន្ត គឺត្រូវសុំច្បាប់ពីសាលាខេត្តបន្ត ហើយត្រូវតែរក្សាព្រំដី មិនរំលាយចូលគ្នាទេ ។ ពោលគឺត្រូវធ្វើឲ្យឆ្ងាយពីភូមិ របស់ប្រជាពលរដ្ឋ មិនតិចជាង ៥០០ម៉ែត្រ ឆ្ងាយពីដីអាស្រ័យផល របស់អ្នកភូមិយ៉ាងតិច ១៥ម៉ែត្រ តាមស្ថានភាពដីជាក់ស្ដែង។
ដោយឡែកចំពោះជម្រៅរណ្តៅដី គឺក្រសួង បានអនុញ្ញាតមិនលើសពី ១៥ម៉ែត្រ ទៅតាមស្ថានភាពដីជាក់ស្ដែង ប៉ុន្តែបើខាងអាជ្ញាធរខេត្ត គឺអនុញ្ញាតត្រឹមតែ ១០ម៉ែត្រ ទៅតាមស្ថានភាពដី ហើយត្រូវធ្វើជើងទេ ក្នុងរណ្តៅដី និងធ្វើរបងការពារគ្រោះថ្នាក់ផ្សេងម បើរណ្តៅដីនោះមានជំរៅជ្រៅ។ ហើយចំពោះ ការដឹកជញ្ជូនដីឬខ្សាច់វិញ ត្រូវតែស្ងួតមិនលើសទ្រុង មិនលើសទម្ងន់ និងត្រូវគ្របឲ្យជិតជាដើម៕ ដោយ៖ ដែន សីមា
