ភ្នំពេញ ៖ ក្រសួងការបរទេសនិងសហប្រតិបត្តិការអន្តរជាតិ នឹងរៀបចំកិច្ចប្រជុំពិគ្រោះយោបល់រវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស ដែលកំពុងបំពេញការងារនៅកម្ពុជា ដើម្បីផ្លាស់ប្តូរទស្សនទានដោយស្មោះត្រង់ និងពង្រឹងកិច្ចសហប្រតិបត្តិការរវាងរាជរដ្ឋាភិបាល និងអង្គការមិនមែនរដ្ឋាភិបាលបរទេស នៅថ្ងៃទី២៩ខែមករាឆ្នាំ២០១៩ នៅទីស្តីការក្រសួងការបរទេស។
យោងតាមការជូនដំណឹងរបស់ក្រសួងការបរទេស នៅថ្ងៃទី២៨ ខែមករា ឆ្នាំ២០១៩នេះ បានឲ្យដឹងថា លោកប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នឹងអញ្ជើញធ្វើជាអធិបតីក្នុងពិធីបើកកិច្ចប្រជុំនេះ។ លោករដ្ឋមន្ត្រី នឹងថ្លែងសុន្ទរកថាបើក ដោយផ្តោតទាំងស្រុងលើវត្តមាន និងការរួមចំណែក របស់អង្គការមិនមែនរដ្ឋាភិបាលបរទេសក្នុងស្រុក នៅក្នុងកិច្ចអភិវឌ្ឍសេដ្ឋកិច្ច-សង្គមកម្ពុជា ព្រមទាំងសិទ្ធិ និងកាតព្វកិច្ចរបស់ពួកគេ ក្រោមច្បាប់ស្តីពីសមាគមនិងអង្គការមិនមែនរដ្ឋាភិបាល។
អញ្ជើញចូលរួមក្នុងកិច្ចប្រជុំនេះ រួមមាន តំណាងក្រសួង និងស្ថាប័នពាក់ព័ន្ធនានា របស់កម្ពុជា និងតំណាងអង្គការមិនមែនរដ្ឋាភិបាលបរទេស សរុបទាំងអស់ប្រមាណ៣០០នាក់ ។
គួរកត់សម្គាល់ថា នេះគឺជាកិច្ចប្រជុំលើកទី១ ដែលក្រសួងការបរទេស រៀបចំឡើង ក្នុងគោលបំណងផ្លាស់ប្តូរទស្សនទានដោយស្មោះត្រង់ និងពង្រឹងកិច្ចសហប្រតិបត្តិការ រវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស៕ ដោយ ៖ កូឡាប
