ខេត្តព្រះសីហនុ ៖ មន្ត្រីនាំពាក្យសាលាខេត្តព្រះសីហនុ បានឲ្យដឹងថា ថ្ងៃចន្ទ ទី២៨ ខែមករា ឆ្នាំ២០១៩នេះ អភិបាលខេត្តព្រះសីហនុ លោក យន្ត មីន និងលោក ចេវ គឹមហេង តំណាងរាស្ត្រខេត្តព្រះសីហនុ អមដំណើរដោយមន្ត្រីមួយចំនួន នៃរដ្ឋបាលខេត្តព្រះសីហនុ បានចុះសួរសុខទុក្ខយុវជនម្នាក់ ដែលត្រូវបានកម្លាំងចម្រុះ បាញ់ឲ្យរងរបួសធ្ងន់ធ្ងន់ ក្នុងអំឡុងពេលចុះបំពេញការងារ ឬតួនាទី អនុវត្តសាលដីកា លើករណីដីធ្លី នៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ កាលពីថ្ងៃទី២៤ ខែមករា ឆ្នាំ២០១៩ ហើយកើតមានអំពើហឹង្សាជាមួយប្រជាពលរដ្ឋ ដែលប្រមូលផ្តុំគ្នាតវ៉ា ចំពោះវត្តមាន របស់មន្ត្រីតុលាការ និងសមត្ថកិច្ចស្ថាប័នពាក់ព័ន្ធ។
យុវជនម្នាក់ ដែលត្រូវគ្រាប់កាំភ្លើង របស់កម្លាំងសមត្ថកិច្ច មានឈ្មោះ ពៅ សារ័ត្ន ត្រូវបានគ្រូពេទ្យ នៃមន្ទីរពេទ្យបង្អែកខេត្តព្រះសីហនុ បញ្ជូនមកសម្រាកព្យាបាលជំងឺ និងវះកាត់ក្បាលគ្រាប់ ដែលបៀម នៅក្នុងឆ្អឹងខ្នងធ្ងន់ធ្ងរ នៅមន្ទីរពេទ្យព្រះកុសុមៈ ឬមន្ទីរពេទ្យព្រះសង្ឃ រាជធានីភ្នំពេញ បន្ទាប់ពីសមត្ថកិច្ចចម្រុះខេត្តព្រះសីហនុ បាញ់រះ ដោយហឹង្សាមកលើហ្វូងប្រមូលផ្តុំ របស់ប្រជាពលរដ្ឋតវ៉ាលើករណីទំនាស់ដីធ្លី នៅក្បែរវត្តអូរត្រេះ ត្រង់ចំណុចពយម៉ាចូវ មានទីតាំងស្ថិតក្នុងភូមិគគី ឃុំបិតត្រាង ស្រុកព្រៃនប់ កាលពីថ្ងៃទី២៤ ខែមករា ឆ្នាំ២០១៩។
លោក ពៅ សារ័ត្ន ជាជនរងគ្រោះដោយសារការប៉ះទង្គិចគ្នា រវាងកម្លាំងសមត្ថកិច្ច និងប្រជាពលរដ្រស់នៅតំបន់ពយម៉ាចូវ កាលពីថ្ងៃទី២៤ ខែមករា ក្នុងអំឡុងសមត្ថកិច្ចចម្រុះ បានចុះអនុវត្តសាលដីកា ករណីដីធ្លី នៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ។ បច្ចុប្បន្ន លោក ពៅ សារ័ត្ន កំពុងសម្រាកព្យាបាលរបួស នៅក្នុងមន្ទីរពេទ្យព្រះកុសមៈ ឬហៅថា មន្ទីពេទ្យព្រះសង្ឃ ក្នុងរាជធានីភ្នំពេញ។
ក្រោយការបាញ់រះ របស់កម្លាំងចម្រុះខេត្តព្រះសីហនុ មានកម្លាំងកងរាជអាវុធហត្ថ កម្លាំងយោធា និងកម្លាំងនគរបាលខេត្តព្រះសីហនុ បង្ក្រាបដោយហឹង្សា ទៅលើការប្រមូលផ្តុំគ្នា របស់ប្រជាពលរដ្ឋ តវ៉ាលើករណីទំនាស់ដីធ្លី នៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ កាលពីថ្ងៃទី២៤ ខែមករា គឺមានពលរដ្ឋរងគ្រោះមួយចំនួន បានព្យាយាមផ្ញើរូបវីដេអូឃ្លីបមួយចំនួន នៃសកម្មភាពបាញ់រះ និងប្រើអំពើហឹង្សាវាយទាត់ធាក់ របស់កម្លាំងកងរាជអាវុធហត្ថខេត្តព្រះសីហនុ បង្ក្រាបទៅលើប្រជាពលរដ្ឋ ពួកគាត់ឲ្យជួយចុះផ្សាយផងដែរ។
សកម្មភាពបង្ក្រាបដោយហឹង្សា របស់កងកម្លាំងចម្រុះខេត្តព្រះសីហនុ គឺបានកើតឡើងបន្ទាប់ពីក្រុមប្រជាពលរដ្ឋ បានប្បូលផ្តុំគ្នាតវ៉ាដុតកង់ឡាន គប់ដុំថ្ម និងគប់ដបសាំងមកលើកម្លាំងមាន សមត្ថកិច្ច ដែលចុះទៅអនុវត្តសាលដីការ របស់តុលាការកំពូល លើករណីដីធ្លីនៅតំបន់ពយម៉ាចូវ ក្បែរវត្តអូរត្រេះ ដែលមានវិវាទនាពេលកន្លងមក។ ក្រោយមានសកម្មភាពប្រើអាវុធវែងខ្លី បាញ់រះទៅលើហ្វូងប្រជាពលរដ្ឋ ដែលប្រមូលផ្តុំគ្នាតវ៉ាកាលពីថ្ងៃទី២៤ ខែមករា ឆ្នាំ២០១៩រួចមក ក៏មានប្រជាពលរដ្ឋមួយចំនួន បានផ្ញើរូបវីដេអូឃ្លីបមួយចំនួន មកឲ្យប្រព័ន្ធផ្សព្ធផ្សាយ ដោយស្នើឲ្យជួយចុះផ្សាយជូនពួកគាត់ដោយអនុគ្រោះ ដើម្បីឲ្យថ្នាក់ដឹកនាំស្ថាប័នកំពូលៗថ្នាក់ជាតិ ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានឃើញ និងធ្វើការពិចារណា ចំពោះសកម្មភាព របស់កងរាជអាវុអាវុធហត្ថខេត្តព្រះសីហនុ និងកម្លាំងប្រដាប់អាវុធស្ថាប័នមួយចំនួនទៀត ដែលបានប្រើអំពើហឹង្សាបាញ់រះ និងវាយទាត់ធាក់ ទៅលើប្រជាពលរដ្ឋ ដែលប្រមូលផ្តុំគ្នាតវ៉ាលើករណីទំនាស់ដីធ្លី នៅតំបន់ពយម៉ាចូវ ស្ថិតក្នុងភូមិគគី ឃុំបិតត្រាង ស្រុកព្រៃនប់។
វីដេអូឃ្លីបខ្លះបានបង្ហាញឲ្យឃើញបុរសម្នាក់ត្រូវកម្លាំងកងរាជអាវុធហត្ថខេត្តព្រះសីហនុ និងកម្លាំងយោធាជាដើម បានប្រើកាំភ្លើងបាញ់គំរាមប្រជាពលរដ្ឋ និងបានចាប់ចងដៃ និងដាក់ខ្លោះដៃទាំងពីរជាប់ទៅក្រោយខ្នង នៅនឹងកន្លែងកើតហេតុចំនួន ៧នាក់។ ក្នុងនោះមានយុវជនម្នាក់ ត្រូវគ្រាប់កាំភ្លើង និងមានយុវនម្នាក់ទៀត ត្រូវបានសមត្ថកិច្ចរុញឲ្យដេកផ្គាប់មុខទៅលើដី រួចត្រូវកម្លាំងកងរាជអាវុធហត្ថ វាយទាត់ធាក់ ក្នុងអំឡុងពេល ដែលមន្ត្រីសាលាដំបូងខេត្តព្រះសីហនុ បានដឹកនាំកម្លាំងចម្រុះចុះអនុវត្តសាលដីកា របស់តុលាការកំពូល លើករណីសំណុំរឿងដីធ្លី នៅមូលដ្ឋានស្រុកព្រៃនប់ ក្បែរឆ្នេរអូរត្រេះ ជូនអ្នកមានទ្រព្យដ៏សម្បើម និងមានឥទ្ធិពលដ៏មហិមានៅក្នុងប្រទេសកម្ពុជា..។
ទាក់ទិនបញ្ហានេះ លោកស្រី ជៀប សុធារី អ្នកសម្របសម្រួលសមាគមអាដហុក ប្រចាំខេត្តព្រះសីហនុ បានមានប្រសាសន៍ថា ក្នុងអំឡុងពេល ដែលសមត្ថកិច្ចចម្រុះចុះអនុវត្តសាលដីកា របស់តុលាការកំពូល លើករណីដីធ្លីនៅតំបន់ពយម៉ាចូវ រហូតមានអំពើហឹង្សា ហើយឈានដល់កម្លាំងចម្រុះផ្ទុះអាវុធបង្ក្រាបការប្រមូលផ្តុំ របស់ប្រជាពលរដ្ឋនោះ គឺពេលនោះកម្លាំសមត្ថកិច្ចបានចាប់ខ្លួនប្រជាពលរដ្ឋឃាត់ខ្លួន៤នាក់ យកទៅសួរនាំនៅស្នងការដ្ឋាននគរបាលខេត្តព្រះសីហនុ។ ហើយយុវជនចំនួន ២នាក់ ផ្សេងទៀត ដែលរងរបួស ក៏ត្រូវបានរថយន្តសង្គ្រោះដឹកយកទៅកាន់មន្ទីរពេទ្យបង្អែកខេត្តព្រះសីហនុ។ ប៉ុន្តែក្រោយមក មនុស្សទាំង ៤នាក់ ដែលសមត្ថកិច្ចនគរបាលនាំខ្លួនទៅសាកសួរនោះ ក៏ ត្រូវបានសមត្ថកិច្ចដោះលែងឲ្យមានសេរីភាពវិញ។
ប្រជាពលរដ្ឋទាំង៤នាក់ ដែលសមត្ថកិច្ចឃាត់ខ្លួនមានឈ្មោះ ៖
១. ឈ្មោះ ឆែម ទុនរ៉ាស៊ី ភេទប្រុស អាយុ២២ឆ្នាំ
២. ឈ្មោះ សៅ សុធារិទ្ធិ ភេទប្រុស អាយុ១៩ឆ្នាំ
៣. ឈ្មោះ យឿន យ៉ន ភេទប្រុស អាយុ៤០ឆ្នាំ
៤. ឈ្មោះ កើត សំណាង ភេទប្រុស មិនចាំអាយុ
លោកស្រី សុធារី បានឲ្យដឹងបន្តថា សកម្មភាពខាងលើនេះ ក៏បានបណ្តាលឲ្យរងរបួសយុវជនចំនួន២នាក់ ក្នុងនោះយុវជនម្នាក់បានរងរបួសធ្ងន់ ដោយត្រូវគ្រាប់កាំភ្លើងចំស្មាខាងឆ្វេង ហើយបានបញ្ជូនចេញពីមន្ទីរពេទ្យបង្អែកខេត្តព្រះសីហនុ យកទៅសង្គ្រោះបន្ទាន់ នៅមន្ទីរពេទ្យលោកសង្ឃ ឬមន្ទីរពេទ្យព្រះកុសមៈ នៅរាជធានីភ្នំពេញ។
អ្នកឃ្លាំមើលសង្គមរូបនេះ ក៏បានឲ្យដឹងដែរថា ជនរងគ្រោះដោយត្រូវគ្រាប់កាំភ្លើង របស់សមត្ថកិច្ចចម្រុះខេត្តព្រះសីះនុ របួសធ្ងន់ខាងលើនេះ តាមសេចក្តីរាយការណ៍បឋមបានឲ្យដឹងថា ត្រូវបានក្រុមគ្រូពេទ្យវះកាត់យកក្បាលគ្រាប់ ដែលបៀមជាប់នៅឆ្អឹងខ្លងដោយជោគជ័យរួចហើយៗ អាការៈជំងឺ ឬរបួសក៏បានធូរស្រាលបន្តិចហើយដែរ។
បញ្ហានេះដែរ សមត្ថកិច្ចស្នងការដ្ឋាននគរបាលខេត្តព្រះសីហនុ ក៏បានឱ្យដឹងដែរថា កម្លាំងនគរបាលមិនបានកសាងសំណុំរឿងបញ្ជូនប្រជាពលរដ្ឋណាម្នាក់ ដែលបានឃាត់ខ្លួននោះ បញ្ជូនទៅកាន់សាលាដំបូងខេត្តព្រះសីហនុនោះទេ ពោលគឺក្រោយពេលសមត្ថកិច្ចសាកសួរបុរសទាំង៤នាក់ ដែលឃាត់ខ្លួននោះ ក៏បានអនុញ្ញាតឲ្យវិលត្រឡប់ទៅផ្ទះរៀងៗខ្លួនវិញ ។
មន្ត្រីនគរបាលខេត្តព្រះសីហនុឲ្យដឹងដូច្នេះ រួចបញ្ជាក់ថា ចំពោះចំណាត់ការចុះអនុវត្តការងារ ឬចុះអនុវត្តសាលដីកាតុលាការកំពូល របស់មន្ត្រីសាលាដំបូងខេត្តព្រះសីហនុ លើករណីដីធ្លីនៅភូមិគគី ឃុំបិតត្រាង ស្រុកព្រៃនប់ ក៏បានបន្តសកម្មភាពដោយរលូន ជាមួយការដាក់ពង្រាយកម្លាំងចម្រុះ ដើម្បីចុះការពារយាមកាមនៅជុំវិញ បរិវេណទីតាំងដីតំបន់ពយម៉ាចូវ ក្បែរវត្តអូរត្រេះយ៉ាងតឹងរឹងបំផុត៕ ដោយ ៖ ដែន សីមា
