ប្រទេសកូរ៉េខាងជើងសន្យាថានឹងបំផ្លាញចោលរោងចក្រអាវុធនុយក្លេអ៊ែរបស់ខ្លួនទាំងអស់។ នេះបើតាមការបញ្ជាក់របស់បេសកជនពិសេសរបស់អាមេរិចប្រចាំប្រទេសកូរ៉េខាងជើងឈ្មោះ Stephen Biegun។
លោកបញ្ជាក់ថា កូរ៉េខាងជើងបានធ្វើការសន្យាខាងលើចំពោះលោក Mike Pompeo រដ្ឋមន្ត្រីការបរទេសអាមេរិច ដែលបានធ្វើដំណើរទស្សនៈកិច្ចនៅកូរ៉េខាងជើងកាលពីខែ តុលាកន្លងទៅ។
ទោះយ៉ាងណា លោកបញ្ជាក់ថា កូរ៉េខាងជើងត្រូវតែបង្ហាញបញ្ជីទាំងស្រុងនៃអាវុធនុយក្លេអ៊ែររបស់ខ្លួន មុនពេលសម្រេចបានដំណោះស្រាយ។
កាលពីខាងដើម ប្រធានាធិបតីអាមេរិច ដូណាល់ ត្រាំ បានអះអាងពីការរីកចម្រើនដ៏ខ្លាំង ក្នុងកិច្ចចរចាររវាងប្រទេសទាំងពីរ។
នៅថ្ងៃព្រហស្បតិ៍ម្សិលមិញនេះ លោក ត្រាំ បានអះអាងថា គាត់នឹងប្រកាសពីការបរិច្ឆេត និងទីកន្លែងនៃកិច្ចប្រជុំកំពូលលើកទី ២ជាមួយនឹងមេដឹកនាំកូរ៉េខាងជើង គីម ជុងអ៊ុន។
មេដឹកនាំប្រទេសទាំងពីរធ្លាប់បានជួបគ្នាម្តងរួចមកហើយកាលពីខែមិថុនា ក្នុងប្រទេសសិង្ហបុរី ទោះយ៉ាងណា ដំណើរការក្នុងការលុបបំបាត់ចោលអាវុធនុយក្លេអ៊ែរនៅឧបទ្វីបកូរ៉េ ត្រូវបានគេមើលឃើញថារីកចម្រើនតិចតួចប៉ុណ្ណោះ។
ប្រទេសកូរ៉េខាងជើងតែងតែអះអាងថា កម្មវិធីអាវុធនុយក្លេអ៊ែរគឺសំខាន់ខ្លាំងណាស់ចំពោះការរស់រាននៃរបបខ្លួន ហើយដូច្នេះវានឹងមិនធ្វើការបោះបង់ចោលឡើយ ប្រសិនជានៅតែមានការគំរាមកំហែងផ្នែក នុយក្លេអ៊ែរពីសហរដ្ឋអាមេរិច។
ក្នុងសុន្ទករថា លោក Stephen Biegun និយាយថា ប្រធានាធិបតី ត្រាំ ត្រៀមខ្លួនរួចរាល់ក្នុងការបញ្ចប់សង្គ្រាមនេះ។
គាត់និយាយថា “ពួកយើងនឹងមិនឈ្លានពានកូរ៉េខាងជើងនោះទេ។ ពួកយើងនឹងមិនស្វែងរកការផ្តួលរំលំរបបកូរ៉េខាងជើងនោះទេ”។
លោកបន្ថែមថា លោក គីម ជុងអ៊ុនបានប្តេជ្ញាចិត្តក្នុងកិច្ចពិភាក្សាជាមួយនឹងរដ្ឋមន្ត្រីការបរទេសអាមេរិច ក្នុងការបំផ្លាញចោលនូវរាល់ឧបករណ៍ និងគ្រឿងទាំងឡាយដែលបំរើដល់ការផលិតអាវុធនុយក្លេអ៊ែរ។
ទោះយ៉ាងណា លោកបានអះអាងជាថ្មីថា អាមេរិចនឹងមិនដកទណ្ឌកម្មប្រឆាំងកូរ៉េខាងជើងឡើយ រហូតដល់មានការលុបបំបាត់ចោលអាវុធនុយក្លេអ៊ែរទាំងស្រុង៕ សុភ័ក្ត្រ
ប្រភព៖ BBC
