អ្នកបំរើការងារតាមផ្ទះជនជាតិភីលីពីនម្នាក់ ត្រូវបានគេប្រហារជីវិតនៅក្នុងប្រទេសអារ៉ាប់ប៊ី សៅអូឌីពីបទមនុស្សឃាត។
ស្ត្រីបំរើការងារក្នុងផ្ទះវ័យ ៣៩ឆ្នាំខាងលើ ត្រូវបានគេរកឃើញមានទោសពីបទមនុស្សឃាត និងត្រូវបានកាត់ទោសប្រហារជីវិតតែម្តង ក្រោយពេលក្រុមប្រឹក្សាច្បាប់កំពូលរបស់ប្រទេសនេះបានកំណត់ថា ករណីរបស់ស្ត្រីភីលីពីនខាងលើមិនអាចដោះស្រាយដោយការសងសំណង់ឡើយតាមច្បាប់អ៊ីស្លាម Sharia។ នេះបើតាមការបញ្ជាក់របស់ក្រសួងការបរទេសនៃប្រទេសនេះ។
តួយ៉ាងពត៌មានលំអិតផ្សេងទៀតនៃការប្រហារជីវិតស្ត្រីភីលីពីននោះ មិនត្រូវបានគេដឹងឡើយ។
ការផ្តល់សំណងជាលុយក្រោយពេលមានការសម្លាប់នរណាម្នាក់ គឺជាវិធានការស្របច្បាប់របស់ច្បាប់អ៊ីស្លាម ដែលជនជាប់ចោទអាចផ្តល់ប្រាក់សំណងទៅដល់សាច់ញាតិរបស់ជនរងគ្រោះបាន។
ការប្រហារជីវិតបានធ្វើឡើងនៅថ្ងៃអង្គារកន្លងទៅនេះ។ នេះបើតាមការបញ្ជាក់របស់ឯកអគ្គរាជទូតរបស់ប្រទេសភីលីពីន ប្រចាំប្រទេសអារ៉ាប់ប៊ី សៅអូឌី។
ឯកអគ្គរដ្ឋទូត Adnan Alonto បាននិយាយថា ស្ត្រីភីលីពីននោះទទួលបានជំនួញផ្នែកកុងស៊ុល ពេលកំឡុងការកាត់ក្តីរបស់គាត់ រួមមានការផ្តល់មេធាវី និងការសួរសុខទុក្ខពីសំណាក់បុគ្គលិកស្ថានកុងស៊ុល ហើយរដ្ឋាភិបាលឲ្យបានផ្តល់ពត៌មានថ្មីៗដល់ក្រុមគ្រួសារគាត់ផងដែរ។
សូមបញ្ជាក់ថា មានជនជាតិភីលីពីនប្រមាន ២,៣លាននាក់ កំពុងធ្វើការនៅបរទេស ហើយប្រទេសអារ៉ាប់ប៊ី សៅអូឌី ជាប្រទេសនៅក្នុងតំបន់ដែលមានកម្មករភីលីពីនច្រើនជាងគេបំផុត៕ សុភ័ក្ត្រ
ប្រភព៖ CNN
