Wednesday, January 26, 2022

ផលិតកម្ម​មហាហង្ស បញ្ចេញ​រឿង​ខ្មោច​ចុងឆ្នាំ​

​ភ្នំពេញ​-​ផលិតកម្ម​មហាហង្ស​បាន​ធ្វើ​ពិធី​ក្រុង​ពាលី​រឿង​ថ្មី​របស់​ខ្លួន នឹងដាក់​តួ​នាង ម៉ៅ គីម​ធីតា ជា​តួរ​ស្រី​ជាមួយនឹង​នាយ​គ្រឿន ព្រមទាំង លោក ជា សុវណ្ណ​ន​រាហ៍ ក្នុង​រឿង បែប​រន្ធត់​ភ័យខ្លាច ក្នុង​រឿង “ ផ្ទះ​ចុង​ភូមិ​” ។​

​សម្រាប់​លោក អ៊ិន សុ​ភិន អគ្គនាយក​ផលិតកម្ម​មហាហង្ស បាន​ថ្លែងថា រឿង “​ផ្ទះ​ចុង​ភូមិ​” ជា​ប្រភេទ​រឿង​ខ្មោច​ភ័យ​រន្ធត់ និង​កំប្លែង ៩០ ភាគរយ ជា​ស្នាដៃ​និពន្ធ​ដោយ​លោក​ផ្ទាល់ និង​ដឹកនាំ​សម្ដែង​ដោយ​លោក ជុំ វិចិត្រ​។ លោក​ថា​៖” មាន​ឈុត​ឆាកកំប្លែង​ភ័យរន្ធត់​ច្រើន​បែប​ហ្នឹង​ហើយ ទើប​ខ្ញុំ​ជឿជាក់ និង​សង្ឃឹមថា នៅពេល​រឿង​ខ្ញុំ​ចាក់​បញ្ចាំង​នៅ​រោងកុន នឹង​ទទួលបាន​ការគាំទ្រ​ពី​ពុក​ម៉ែ​បងប្អូន​គ្រប់​មជ្ឈដ្ឋាន​”​។​

​រឿង “​ផ្ទះ​ចុង​ភូមិ​” ដឹកនាំ​ដោយ​លោក ជុំ វិចិត្រ ជា​រឿង​បែប​កំប្លែង ខ្មោច ស្នេហា​ព្រាត់ប្រាស់ អាថ៌កំបាំង និយាយ​ពី​ការកសាង​អំពើអាក្រក់ ការ​សងសឹក​ខ្មោច ដែល​ស្លាប់​ទៅ​ទាំងអស់​មិន​អស់ចិត្ត អបិយ​ជំនឿ និង​ជំនឿ​លើ​ព្រះពុទ្ធសាសនា​។​

​រឿង “​ផ្ទះ​ចុង​ភូមិ​” ចំណាយ​ដើមទុន​ក្នុង​ការផលិត ៥​ម៉ឺន​ដុល្លារ​អាមេរិក ដំណើរការ​ថត​នៅ​ថ្ងៃទី ១៦ ធ្នូ ស្អែក​នេះ​។ ចំណែកឯ​ទីតាំង​ថត​នៅ​ភ្នំ​បាសិត ចូលរួម​សម្ដែង​ដោយ ម៉ៅ គីម​ធីតា លោក ជា សុវណ្ណ​ន​រាហ៍ នាយ គ្រឿន សឿន ផាន​ផា​ភួង ព្រមទាំង​តារា​សម្ដែង​ស្រី​ប្រុស​ជាច្រើនរូប​ទៀត​៕ ដោយ​-​គីម ស្រីរ័ត្ន​