ខេត្តព្រះសីហនុ៖ សមត្ថកិច្ចនគរបាល នៃស្នងការដ្ឋានខេត្តព្រះសីហនុ បានឲ្យដឹងថា មានករណីឃាត់ខ្លួនជនជាតិឥណ្ឌាចំនួន ៣នាក់ នាខេត្តជាប់ឆ្នេរសមុទ្រមួយនេះ គឺទាក់ទងពីបទចោទប្រកាន់ឆបោក ប្តឹង ដោយភ្ញៀវទេសចរជនជាតិអូស្ត្រាលី។
លោកវរសេនីយ៍ទោ ប៉ោ ប៊ុណ្ណារ៉ា នាយការិយាល័យនគរបាលទេសចរណ៍ខេត្តព្រះសីហនុ បានប្រាប់ប្រព័ន្ធផ្សព្វផ្សាយថា ការឃាត់ខ្លួនជនបរទេសទាំង ៣នាក់នេះ ធ្វើឡើងកាលពីរសៀលថ្ងៃទី១៥ ខែធ្នូ ឆ្នាំ២០១៧ បន្ទាប់ពី សមត្ថកិច្ចនគរបាលទេសចរណ៍ បានទទួលបណ្តឹងផ្ទាល់មាត់ពីជនរងគ្រោះមកថា មានជនជាតិឥណ្ឌា ៣នាក់ បានប្រព្រឹត្តិអំពើឆបោក ដោយធ្វើការទស្សទាយគិតប្រាក់ ពីភ្ញៀវ ដែលមកលេងកម្សាន្ត នៅតាមឆ្នេរសមុទ្រ អូរឈើទាល ស្ថិតនៅ សង្កាត់លេខ៤ ក្រុង-ខេត្តព្រះសីហនុ ។
ប្រភពដដែល បានបញ្ជាក់ថា ជនរងគ្រោះបានរាយការណ៍ប្រាប់សមត្ថកិច្ចថា ខណៈពេលភ្ញៀវទេសចរអូស្ត្រាលីមួយរូប កំពុងសម្រាកកម្សាន្តនៅតំបន់ឆ្នេរសមុទ្រ ក៏មានជនជាតិឥណ្ឌា ២នាក់ បានមកចាប់ដៃគាត់ទាំងសងខាង ទាញឲ្យអង្គុយចុះ ហើយធ្វេីការទស្សន៍ទាយ និង បង្គាប់ឲ្យជនរងគ្រោះទៅរំដោះគ្រោះដោយបង្ខំអោយបង់លុយ ១៦០ដុល្លារសហរដ្ឋអាមេរិច។ បន្ទាប់មកទៀតជនជាតិឥណ្ឌាទាំង ២នាក់ ក្នុងចំណោម ៣នាក់ បានយកលុយនោះ ហុចប្រាក់ទៅឲ្យជនជាតិឥណ្ឌាម្នាក់ទៀត ដែលជាជនទីទី៣ ទុកដាក់។
ជនរងគ្រោះមានឈ្មោះ RENE WALTER GEIGER ភេទប្រុស អាយុ ១៩ឆ្នាំ ជនជាតិ អូស្ត្រាលី ជាភ្ញៀវទេសចរ ស្នាក់នៅភូមិ៤ សង្កាត់៤ ក្រុងព្រះសីហនុ។
លោកវរសេនីយ៍ទោប៉ោ ប៊ុណ្ណារ៉ា បានបន្តថាក្រោយពេលទទួលបានព័ត៌មាននេះភ្លាម កម្លាំងនគរបាលទេសចរណ៍ បាននាំជនរងគ្រោះទៅចង្អុលបង្ហាញមុខ ជនសង្ស័យ ហេីយសមត្ថកិច្ចក៏បានឃាត់ខ្លួនជនជាតិឥណ្ឌាទាំង ៣នាក់មកសួរនាំ រួមមាន៖
១-ឈ្មោះ SING SAWAN ភេទប្រុស អាយុ ២៣ឆ្នាំ ជនជាតិ ឥណ្ឌា កាន់លិខិត ឆ្លងដែនលេខ L995625 មានសុពលភាព ថ្ងៃទី៣.៧.២០២៤ មុខរបរទេសចរណ៍ ។
២-ឈ្មោះ NISHAN SINGH ភេទប្រុស អាយុ១៨ឆ្នាំ ជនជាតិ ឥណ្ឌា កាន់លិខិតឆ្លងដែនលេខ M 8535094 មានសុពលភាព ២៧.៥.២០២៥ មុខរបរ ទេសចរណ៍។
៣-ឈ្មោះ RANDHAWA SINGH ភេទប្រុស អាយុ ២៩ឆ្នាំ ជនជាតិឥណ្ឌាកាន់លិខិតឆ្លងដែនលេខk0333465 មានសុពលភាព ថ្ងៃទី៦.៥.២០២២ ។ អ្នកទាំង៣ ស្នាក់នៅផ្ទះជួល ក្រុមទី១៦ ភូមិទី១ សង្កាត់២ ក្រុង-ខេត្តព្រះសីហនុ។
ទាក់ទងបញ្ហានេះ លោកឧត្តមសេនីយ៍ត្រី កុល ផាលី ស្នងការរងទទួលការងារព្រហ្មទណ្ឌ បានឲ្យដឹងដែរថា ករណីនេះ សមត្ថកិច្ចបានស៊ើបអង្កេតស្រាវជ្រាវរួចហើយ ដោយមានសាក្សី និងភស្តុតាងគ្រប់គ្រាន់ អាចដាក់បន្ទុកលេីជាតិឥណ្ឌាទាំង ៣នាក់ ពីបទល្មើសឆបោក។
ក្នុងនោះមាន វត្ថុតាង ដែលសមត្ថកិច្ចចាប់យកបាន គឺលុយចំនួន ១៦០ដុល្លារ។
លោក កុល ផាលី បន្តថា ចំពោះជនសង្ស័យជនជាតិឥណ្ឌាទាំង ៣នាក់ខាងលើ សមត្ថកិច្ចកំពុងចាត់ការតាមនិតិវិធី នៅការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាកខេត្តព្រះសីហនុ៕ ដោយ៖ ដែន សីមា
