សៀមរាប ៖ លោកឧត្តមសេនីយ៍ឯក ឌី វិជ្ជា បានណែនាំមន្ត្រីនគរបាល ក្រោយបញ្ចប់វគ្គបំប៉នជំនាញ និងផ្តល់បទ ពិសោធន៍ ការងារសន្តិសុខ ត្រូវយកចំណេះដឹងក្នុងវគ្គសិក្សា យកទៅអនុវត្តជាក់ស្តែងនៅមូលដ្ឋាន ក្នុងកិច្ចការពារបង្ការទប់ស្កាត់ និងបង្ក្រាបរាល់បទល្មើសគ្រប់ប្រភេទសំដៅរក្សាបាននូវស្ថេិរភាព សន្តិសុខ សុវត្ថិភាព និងសណ្តាប់ធ្នាប់សង្គម ជូនប្រជាពលរដ្ឋ។
មន្ត្រីនគរបាល នៃស្នងការដ្ឋាននគរបាលខេត្តសៀមរាបរៀនវគ្គបំប៉នជំនាញ និងផ្តល់បទពិសោធន៍ ការងារសន្តិសុខ រយៈពេល២ថ្ងៃចាប់ពីថ្ងៃទី១៨-១៩ ខែកុម្ភៈ ឆ្នាំ២០១៩ ត្រូវបានប្រារព្ធបិទ នារសៀល ថ្ងៃទី១៩ ខែកុម្ភៈ ឆ្នាំ២០១៩ នៅសាលប្រជុំស្នងការដ្ឋាននគរបាលខេត្តសៀមរាប។
លោក ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិប្រធាននាយកដ្ឋានកណ្តាលសន្តិសុខបានថ្លែងថា ដើម្បីតម្រង់ទិសក្នុងការអនុវត្តការងារជំនាញសន្តិសុខដល់មន្ត្រីនគរបាលយើងឲ្យកាន់តែយល់ច្បាស់ អំពីតួនាទីនិងភារកិច្ចជំនាញយើងបានបើកវគ្គបំប៉ននេះ ក្នុងគោលបំណងសំខាន់គឺឲ្យថ្នាក់ដឹកនាំនិងមន្ត្រីនគរបាលយើងទាំងថ្នាក់ខេត្តថ្នាក់ ក្រុង ស្រុក ដែលទទួលការងារសន្តិសុខទាំងអស់ បានស្វែងយល់និងត្រួតពិនិត្យវាយតម្លៃការអនុវត្តការងារជំនាញរបស់ខ្លួន កន្លងមកនិងទទួលបាននូវបទពិសោធន៍ថ្មីៗល្អៗ លើការងារជំនាញសន្តិសុខដើម្បីបំពេញបន្ថែមនៅកង្វះខាត ក្នុងការអនុវត្តជំនាញក្នុងការងារគ្រប់គ្រង់និងក្តាប់សភាពការណ៍ បម្រើការងារជំនាញសន្តិសុខឲ្យកាន់តែមានប្រសិទ្ធិភាព និងតម្លាភាពដូចនេះ ក្រោយពីការបញ្ចប់វគ្គសិក្សា និងវិលត្រឡប់ទៅអគ្គភាពវិញ សូមឲ្យកម្លាំងទាំងអស់ត្រូវយកចំណេះដឹងក្នុងវគ្គសិក្សា យកទៅអនុវត្តជាក់ស្តែងនៅមូលដ្ឋាន ក្នុងកិច្ចការពារបង្ការទប់ស្កាត់ និងបង្ក្រាបរាល់បទល្មើសគ្រប់ប្រភេទសំដៅរក្សាបាននូវស្ថេិរភាព សន្តិសុខ សុវត្ថិភាព និងសណ្តាប់ធ្នាប់សង្គម ជូនប្រជាពលរដ្ឋក្នុងខេត្ត ឲ្យបានកាន់តែល្អប្រសើរទ្វេរឡើងថែមទៀត ៕ ដោយ ៖ កូឡាប
