ភ្នំពេញ ៖ លោកអភិបាលរាជធានីភ្នំពេញ ក្នុងនាមជាសមាជិកអចិន្ត្រៃយ៍សមាគមអភិបាលក្រុងនិយាយភាសាបារាំង (AIMF) បានសុំស្នើឲ្យលោកព្យែបៃយេ (Pierre BAILLET) លេខាធិការអចិន្ត្រៃយ៍សមាគមអភិបាលក្រុងនិយាយភាសាបារាំង បើកកិច្ចប្រជុំនៅរាជធានីភ្នំពេញក្នុងបំណងបង្កើតការិយាល័យតំណាងសម្រាប់តំបន់អាស៊ីអាគ្នេយ៍ នៅក្នុងរាជធានីភ្នំពេញ ដើម្បីបង្កភាពងាយស្រួល ក្នុងការទំនាក់ទំនងផ្ទាល់ រវាងការិយាល័យ នៅក្នុងទីក្រុងភ្នំពេញ និងការិយាល័យកណ្តាល នៅក្នុងទីក្រុងប៉ារីស ប្រទេសបារាំង ។
នៅក្នុងជំនួបនាព្រឹកថ្ងៃទី១៨ ខែធ្នូ ឆ្នាំ២០១៧នេះ ឃួង ស្រេង អភិបាលរាជធានីនៅសាលារាជធានីភ្នំពេញ បានលើកឡើងថា រាជធានីភ្នំពេញ បានចូលជាសមាជិកក្នុងគណៈកម្មការអចិន្ត្រៃយ៍អន្តរជាតិក្នុងបណ្តាលប្រទេសអភិបាលក្រុងប្រើប្រាស់ភាសាបារាំងក្នុងអំឡុងឆ្នាំ១៩៩០មកម្ល៉េះ។ ជំនួបនោះធ្វើឡើងក្នុងបំណងផ្លាស់ប្តូរកម្មវិធីផ្សេងៗ នៃសមាគមអភិបាលក្រុងនិយាយភាសាបារាំងនៅកម្ពុជា តាមដានការផ្លាស់ប្តូរយោបល់គ្នា ដែលបានពិភាក្សាគ្នាកាលពីខែកុម្ភៈឆ្នាំ២០១៦ និងការធ្វើបច្ចុប្បន្នភាពនៃសមាគម និងការធ្វើមហាសន្និបាតបន្ទាប់របស់សមាគម។
បើតាមលោកម៉េត មាសភ័ក្តី អ្នកនាំពាក្យរដ្ឋបាលរាជធានីភ្នំពេញ បានថ្លែងថា គោលបំណងរបស់សមាគមនេះ គឺសមាគមចង់បង្កើតការិយាល័យតំណាងរបស់ខ្លួន សម្រាប់អាស៊ីអាគ្នេយ៍ ដោយសមាគមមានគំនិតនិងឆន្ទៈជ្រើសរើសយករាជធានីភ្នំពេញ ធ្វើជាទីក្រុងសម្រាប់ដាក់ជាការិយាល័យតំណាង។ ហើយកិច្ចការនេះលោកអភិបាលរាជធានីគាំទ្រ និងស្វាគមន៍ បង្កលទ្ធភាពគ្រប់បែបយ៉ាងដើម្បីឲ្យការរៀបចំការិយាល័យតំណាងរបស់សមាគមអភិបាលក្រុងនិយាយភាសាបារាំង អាចដំណើរទៅបាននៅទីក្រុងភ្នំពេញ ក្នុងន័យកិច្ចសហប្រតិបត្តិការ ក៏ដូចជាបង្កលទ្ធភាពកាន់តែងាយស្រួល សម្រាប់ការងារទំនាក់ទំនងផ្ទាល់ ប៉ែកខាងអាស៊ីអាគ្នេយ៍ និងការិយាល័យកណ្តាលនៅទីក្រុងប៉ារីស ប្រទេសបារាំង ។
ក្នុងជំនួបនេះលោកឃួង ស្រេង អភិបាលរាជធានី បានស្នើដល់សមាគមឲ្យមានកិច្ចប្រជុំមួយនៅទីក្រុងភ្នំពេញ ដោយសារតែខានបើកកិច្ចប្រជុំជាច្រើនឆ្នាំមកហើយ ហើយបើតាមប្រវត្តិរាជធានីភ្នំពេញ ជារាជធានីតែមួយគត់ដែលបានចូលជាសមាជិកគណៈកម្មការអចិន្ត្រៃយ៍របស់សមាគមអន្តរជាតិ នៃបណ្តាអភិបាលក្រុងប្រើប្រាស់ភាសាបារាំង តាំងពីឆ្នាំ១៩៩០មក ហើយកិច្ចការងារមានការសហការជាមួយគ្នាបានយ៉ាងល្អប្រសើរ ។
បើតាមលោកអ្នកនាំពាក្យ បានស្រង់សម្តីលោកព្យែបៃយេ មកបញ្ជាក់ថា “លោកព្យែបៃយេ ក៏បានស្នើសុំឲ្យអភិបាលរាជធានីភ្នំពេញ ធ្វើការផ្សព្វផ្សាយអំពីបេសកកម្ម ក៏ដូចជាកិច្ចការដែលសមាគមត្រូវធ្វើឲ្យបានទូលំទូលាយទៅដល់ប្រទេសក្នុងតំបន់អាស៊ី ក្នុងបង្កើតឲ្យមានការយល់ដឹងអំពីកិច្ចការរបស់សមាគម និងកៀរគរឲ្យមានការចូលរួមជាសមាជិកសម្រាប់អភិបាលរាជធានី ឬក៏អភិបាលក្រុងប្រើប្រាស់ភាសាបារាំង នៅក្នុងតំបន់អាស៊ីផ្ទាល់តែម្តង”។
លោកម៉េត មាសភ័ក្តី បានថ្លែងបន្តថា បន្ទាប់ពីកិច្ចពិភាក្សាបានបញ្ចប់ លោកអភិបាលរាជធានីភ្នំពេញ ក៏បានអញ្ជើញគណៈប្រតិភូធ្វើទស្សនកិច្ច ទស្សនាប្លង់ម៉ាកែតដែលរាជធានីភ្នំពេញបានរៀបចំឡើង ។ ប្លង់ម៉ាកែតនេះបានរៀបចំឡើង ជាប្លង់របស់រាជធានីភ្នំពេញ ដែលជាការចាប់ផ្តើមដំបូងរបស់ប្រទេសបារាំង ហើយគណៈប្រតិភូបានវាយតម្លៃខ្ពស់ក្នុងនាមរាជធានីភ្នំពេញ ជាសមាជិកជាន់ខ្ពស់មួយរូប គឺសមាជិកគណៈកម្មការអចិន្ត្រៃយ៍។
លោកអភិបាលរាជធានី បានលើកឡើងពីស្ថានភាពទូទៅរបស់រាជធានីភ្នំពេញ បច្ចុប្បន្ននេះ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ព្រមទាំងជាមួយការខិតខំប្រឹងប្រែងរបស់ថ្នាក់ដឹកនាំរដ្ឋបាលរាជធានីភ្នំពេញ គ្រប់ជំនាន់ រាជធានីប្រវត្តិសាស្ត្រមួយនពេះ ត្រូវបានអភិវឌ្ឍខ្លួនប្រែក្លាយមុខមាត់ រីកចម្រើនយ៉ាងឆាប់រហ័ស ទៅជាទីក្រុងសក្តានុពល និងមានប្រជាប្រិយនៅអាស៊ី នាពេលបច្ចុប្បន្ន ។ រាជធានីភ្នំពេញ ជាមជ្ឈមណ្ឌលប្រមូលផ្តុំលើគ្រប់វិស័យ រួមមាន វិស័យនយោបាយ សេដ្ឋកិច្ច សង្គមកិច្ច បេតិកភណ្ឌ វប្បធម៌ ទេសចរណ៍ និងការទូត។ ទន្ទឹមនឹងការរីកចម្រើនយ៉ាងឆាប់រហ័សបាន នាំឲ្យរាជធានីភ្នំពេញមានបញ្ហាប្រឈមគួរឲ្យកត់សម្គាល់មួយចំនួន បានក្លាយជាកង្វល់សម្រាប់រដ្ឋបាលរាជធានីភ្នំពេញ ពិសេសបញ្ហាការកកស្ទះចរាចរណ៍ សំរាម បរិស្ថាន ធនធានមនុស្ស លូបង្ហូរទឹកស្អុយ ការដឹកជញ្ជូនក្នុងទីក្រុងបញ្ហាសណ្តាប់ធ្នាប់ សន្តិសុខ ក៏កាន់តែប្រឈម ជាមួយនឹងនិន្ននាការចំណាកស្រុកពីជនបទមកទីក្រុងភ្នំពេញ និងបញ្ហាគ្រឿងញៀន ដែលយើងបាននិងកំពុងធ្វើការដោះស្រាយ៕ ដោយ៖កូឡាប