នាយករដ្ឋមន្ត្រីម៉ាឡេស៊ី Mahathir Mohamad បានធ្វើការសន្យាថានឹងបន្តការស្វែងរកយន្តហោះ MH370 ទោះវាបាត់ខ្លួនអស់រយៈពេល ៥ឆ្នាំក៏ហើយក្តៅ។
លោកបានថ្លែងប្រាប់ CNN ថា “ដរាបណានៅមានសង្ឃឹម យើងនឹងបន្តគិតរិះរកវិធីសាស្ត្រដើម្បីស្វែងរកពីជោគវាសនារបស់យន្តហោះនោះ”។
យន្តហោះ MH370 របស់ម៉ាឡេស៊ី ដែលបានផ្ទុកអ្នកដំណើរទាំងអស់ចំនួន ២៣៩នាក់ បានបាត់ខ្លួន កាលពីឆ្នាំ ២០១៤ នៅពេលវាកំពុងហោះហើរពីទីក្រុងកូឡាឡាំពួរ ប្រទេសម៉ាឡេស៊ី ទៅកាន់ទីក្រុងប៉េកាំង ប្រទេសចិន។ វាគឺជាការបាត់ខ្លួនដ៏អាថ៌កំបាំងបំផុតនៅក្នុងពិភពលោក។
នាយករដ្ឋមន្ត្រីម៉ាឡេស៊ីថ្លែងថា “ការបាត់យន្តហោះគឺជារឿងមួយ ប៉ុន្តែការបាត់មនុស្សគឺជារឿងមួយផ្សេងទៀត។ អ្នកមិនអាចគេងគិតពីអ្វីដែលបានកើតឡើងដោយ ហើយអ្នកនឹងនៅតែសួរខ្លួនឯងពីសំនួរនោះ ប៉ុន្តែអ្នកមិនដែលដឹងចំលើយឡើយ”។
សូមបញ្ជាក់ថា ការរុករកយន្តហោះ MH370 ត្រូវបានធ្វើឡើងជាច្រើនដងមកហើយ ប៉ុន្តែមិនមានលទ្ធផលអ្វីសោះ។ ការស្វែងរកយន្តហោះនោះ ដែលធ្វើឡើងដោយប្រទេសចិន ម៉ាឡេស៊ី និងអូស្ត្រាលីត្រូវបានបញ្ចប់ក្នុងឆ្នាំ ២០១៧ ដោយចំណាយទឹកប្រាក់អស់ ១៥០លានដុល្លា។
ចំណែកការរុករកលើកទី ២ ដែលធ្វើឡើងដោយក្រុមហ៊ុនអាមេរិច Ocean Infinity ក៏បានបញ្ចប់កាលពីឆ្នាំមុនផងដែរ ប៉ុន្តែការរុករករយៈពេល ៩០ថ្ងៃនោះនៅមហាសមុទ្រឥណ្ឌាភាគខាងត្បូង មិនទទួលបានផ្លែផ្កាឡើយ។
ក្រុមហ៊ុន Ocean Infinity បាននិយាយថា ការរុករករបស់ខ្លួនគ្រប់ដណ្តប់លើផ្ទៃដី ១១២.០០០គីឡូម៉ែត្រការ៉េ ប៉ុន្តែមិនរកឃើញអ្វីឡើយ។ ក្រុមហ៊ុននេះរ៉ាបរងស្វែងរក ដោយមិនគិតថ្លៃឡើយ ក្នុងករណីរកមិនឃើញ៕ ដោយ ៖ សុភ័ក្ត្រ
ប្រភព៖ CNN