(ព្រៃវែង)៖ ថោកែរកស៊ីឈើខុសច្បាប់ដ៏ធំម្នាក់ នៅស្រុកពារាំង ខេត្តព្រៃវែង ដែលតុលាការចេញដីកាកោះហៅឲ្យចូលបំភ្លឺ ចំនួន២លើកមកហើយនោះ តែមេឈ្មួញឈើរូបនេះមិនបានចូលបំភ្លឺ ត្រូវបានកម្លាំងអាវុធហត្ថចាប់ខ្លួន នៅព្រឹកថ្ងៃទី៨ ខែមីនា ឆ្នាំ២០១៩ ។
មន្ត្រីអាវុធហត្ថខេត្តព្រៃវែង បាន ឲ្យដឹងថា ឈ្មួញឈើរូបនោះឈ្មោះ គុយ ហាន ហៅ ហឿនហាន ភេទប្រុស អាយុ៤១ឆ្នាំ មានទីលំនៅភូមិព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង ជាថៅកែរកស៊ីលក់ឈើ ត្រូវបានកម្លាំងអាវុធហត្ថស្រុកពារាំង ខេត្តព្រៃវែង ចាប់ឃាត់ខ្លួន យោងតាមដីការឲ្យចូលខ្លួន លេខ ០០៣ អ.យ /១៩ ដោយលោក សូ សុវិទ្យា តំណាងអយ្យការ អមសាលាដំបូងខេត្តកណ្តាល។ ការចាប់ខ្លួនថៅកែឈើរូបនេះ ដោយសារ មិនព្រមចូលមកបំភ្លឺ ឬបង្ហាញខ្លួន តាមកាលកំណត់តាមដីការកោះ រហូតដល់ទៅ២លើក។ លើកទី១ ចុះនៅថ្ងៃទី២០ ខែវិច្ចិកា ឆ្នាំ២០១៨ និងលើកទី២ ចុះថ្ងៃទី២២ ខែមករា ឆ្នាំ២០១៩ របស់អយ្យការសាលាដំបូងខេត្តកណ្តាល។
ការឃាត់ខ្លួននេះពាក់ព័ន្ធ និងការដឹកឈើខុសច្បាប់ ហើយបច្ចុប្បន្នកម្លាំងអាវុធហត្ថស្រុកពារាំង កំពុងរៀបចំនីតិវិធីធ្វើការបញ្ជូនបន្តទៅតុលាការចាត់ការបន្តទៀត។
សូមបញ្ជាក់ថា លោក គុយ ហាន កន្លងមកតែងតែដឹកឈើ ពីខេត្តកំពង់ធំ ដើម្បីមកដាក់លក់នៅដេប៉ូខ្លួន បើកតាមផ្លូវជាតិលេខ៦ និងផ្លូវជាតិលេខ៨។ ហើយក៏បានបង់លុយឲ្យសមត្ថកិច្ច តាមដងផ្លូវរហូត ជាពិសេសគឺសមត្ថកិច្ចមេព្រៃខេត្តកណ្ដាល និងស្រុកមុខកំពូល។លុះប្រហែលជា ៦ខែមុន លោក គុយ ហាន បានដឹកឈើពីកំពង់ធំមកទៀត ។ ក៏ត្រូវបាន នាយសង្កាត់រដ្ឋបាលព្រៃឈើស្រុកមុខកំពូល ចាប់រថយន្តរបស់លោក នៅជិតគល់ស្ពានព្រែកតាមាក់ទាំងយប់។
ដោយពេលនោះមានព្រះរាជអាជ្ញារងម្នាក់ ចុះចាប់ផ្ទាល់ជាមួយមេព្រៃនិងប៉េអឹម ហើយក៏បានប៉ះទង្គិតពាក្យសម្ដី គ្នារវាងព្រះរាជអាជ្ញានិងលោក ហាន ។ ខណៈលោក ហាន បាននិយាយទៅកាន់ព្រះរាជអាជ្ញាថា៖ ខ្ញុំបង់លុយឲ្យមេព្រៃរាល់លើកគឺក្នុង១ឡាន អស់៧០ម៉ឺនរៀល ក្នុង១ជើងហេតុអីនៅតែចាប់ឡានខ្ញុំទៀត? ។
ជាមួយគ្នានោះលោក គុយ ហាន បានបញ្ជាក់ថា បង់ឲ្យនាយខណ្ឌរដ្ឋបាលព្រៃឈើខេត្តកណ្ដាល ៣០ម៉ឺនរៀល នាយផ្នែក ២០ម៉ឺនរៀល និងនាយសង្កាត់រដ្ឋបាលស្រុកមុខកំពូល ២០ម៉ឺនរៀលជាកំហិត សរុប៧០ម៉ឺនរៀលក្នុង១ជើង។
លោកនិយាយប្រាប់អ្នកកាសែតមុនថ្ងៃចាប់ខ្លួន លោកបានលើកឡើងថា ការដែលមេព្រៃចាប់ឡានខ្ញុំនៅជិតគល់ស្ពានព្រែកតាមាក់នោះ មូលហេតុមកពីលោក និងមេព្រៃស្រុកមុខកំពូល ឈ្លោះគ្នារឿងបង់លុយមុននិងក្រោយ។
ខណៈមេព្រៃគេកំណត់ឲ្យបង់១ជើងម្ដង ប៉ុន្តែលោក ថា បីបួនជើងចាំបង់សរុបទៅ គឺពិបាកណាស់បង់រាល់ជើងមិនស្រួលទេ ហើយក៏មានទំនាស់កុងកាច់គ្នា ទើបឈាន ដល់មេព្រៃដាក់កំលាំង ជាមួយបេអឹមស្រុកមុខកំពូល និងព្រះរាជអាជ្ញា ចុះចាំចាប់ឈើលោក ទាំងយប់តែម្ដង។ ហើយពេលចាប់នោះ គឺមានភាពចំរ៉ូងចម្រាស់ រវាងសមត្ថកិច្ចនិងលោក ហាន ទើបសំណុំរឿងនេះត្រូវបញ្ជូនទៅតុលាការ ខេត្តកណ្ដាលទាំងតក់ក្រហល់៕ ដោយ ៖ កូឡាប