ខេត្តមណ្ឌលគិរី៖ ប្រជាពលរដ្ឋពលរដ្ឋជនជាតិដើមភាគតិចព្នងប្រមាណ១៤គ្រួសារ បានចោទលោកឧកញ្ញ៉ា អ៊ឹង ប៊ុនហ៊ៅ ថារំលោភយកដីចំការវិញជុំពួកគាត់ជាង១០០ហិកតា នៅចំណុចភ្នំអូរក្លង (ភាសារជនជាតិដើម) ជិតភ្នំកូលាប ស្ថិតក្នុងសង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។ ហើយទំនាស់នោះ ពួកគាត់បានធ្វើការតវ៉ា កាលពីព្រឹកថ្ងៃទី១០ ខែមីនា ឆ្នាំ២០១៩។
ទីតាំងដីនោះត្រូវបានពួកគាត់អះអាងថា គាត់បានអាស្រ័យផលជាច្រើនឆ្នាំមកហើយៗ ដីនោះជាដីតំណម ដែលពួកគាត់មានជំនឿធ្លាប់រៀបចំសែនព្រេនកាប់គោក្របីលើភ្នំនោះ ជារៀងរាល់ឆ្នាំទៀតផង។
លោក ប្រុង ភើង តំណាងពលរដ្ឋទាំហ១៤គ្រួសារ បានរៀបរាបថា ដីចំណុចខាងលើជាដីចំការវិលជុំ របស់ពួកគាត់ពីដូនតា ដោយមិនមានចុះបញ្ជី ឬប្លង់កម្មសិទ្ធិនោះទេ ព្រោះពួកគាត់ជាជនជាតិភាគតិចព្នង រស់នៅតាមទំលាប់ដូនតា ធ្វើស្រែធ្វើចំការ ដោយមិនសូវដឹងពីការធ្វើ ប្លង់ កម្មសិទ្ធិអ្វីនោះទេ។
ប្រជាពលរដ្ឋបន្តថា ទីតាំងដីនោះ គាត់បាននាំគ្នាធ្វើចំការ របៀបចំការវិលជុំ មានដំណាំហូបផ្លែ ស្រូវ និង បន្លែផ្សេងៗ ដីនេះជាកម្មសិទ្ធិគាត់ចំនួន១៤គ្រួសារ រស់នៅភូមិពូទ្រូ ឃុំ មនោរម្យ ស្រុកអូររាំង មានទំហំសរុប១១០ហិកតា។
ប្រជាពលរដ្ឋពួកគាត់ បានកាន់កាប់ធ្វើចំការតាំងពីឆ្នាំ១៩៩៨មកម្លេះ ហើយបច្ចុប្បន្នមានដំណាំ និងដើមឈើហូបផ្លែរបស់ពួកគាត់មួយចំនួន ត្រូវបានគេលួចកាប់កំទិចចោលអស់ខ្លះហើយ។
ប្រជាពលរដ្ឋបន្តទៀតថា តាមរកអ្នកដែលមកដោះបង្គោលយកដីគាត់២ឆ្នាំមកហើយ តែរកមិនឃើញ ព្រោះមិនស្គាល់ អត្តសញ្ញាណទាល់តែសោះ គឺទើបនៅពេលពួកគាត់ បានដឹកជញ្ជូនឈើមកសាងលំនៅឋាន និងដាក់ស្លាកលេខទូរស័ព្ទ ទើបមានគេទាក់ទងមកពួកគាត់ ហើយគេហាមមិនអោយពួកគាត់សាងសងផ្ទះនៅដីនោះទេ ដោយរង់ចាំដោះស្រាយសិន ។ ក្រុមនោះ បានអះអាងថា ដីនោះគេទិញមានលិខិតស្នាមដឹងឮពីអាជ្ញាធរមូលដ្ឋាន។
តំណាងប្រជាពលរដ្ឋទាំង១៤គ្រួសារបញ្ជាក់ថា អ្នកយកដីពួកគាត់មានឈ្មោះឧកញ្ញ៉ា អ៊ឹង ប៊ុនហ៊ៅ រស់នៅរាជធានីភ្នំពេញ ក្រោយពេលនិយាយទូរស័ព្ទ។
បរុសម្នាក់ដែលមកឃាត់ក្រុមពលរដ្ឋមិនឲ្យសង់ផ្ទះនៅចំណុចដីខាងលើ បានឲ្យដឹងថា គាត់ជាអ្នកចាំដីនោះ បានឲ្យគេ ថា មេរបស់គាត់បានបញ្ជាគាត់ ឃាត់ពលរដ្ឋ មិនឲ្យសាងសងផ្ទះ ដើម្បីដោះស្រាយគ្នាសិន នៅថ្ងៃស្អែក ពីព្រោះមេគាត់ចេញដំណើរមកពីរាជធានីភ្នំពេញហើយ។
ជុំវិញករណីចោទលោក ឧកញ្ញ៉ា អ៊ឹ ប៊ុនហ៊ៅ ថារំលោភយកដីពលរដ្ឋខាងលើនេះ កាលពីព្រឹកថ្ងៃទី១១ ខែមីនា ឆ្នាំ២០១៩ នេះ អាជ្ញាធរក្រុង បានធ្វើការសម្របសម្រួល ប៉ុន្តែនៅមិនទាន់ទទួលបានលទ្ធផលនៅឡើយទេ។
លោក ឃុន អូន អភិបាលរងក្រុងមនោរម្យ បានឲ្យដឹងថា ករណីនេះ ខាងភាគីក្រុមហ៊ុន គេមានប្លង់រឹង ដូចច្នេះវាហួសសម្ថកិច្ច របស់អាជ្ញាធរក្រុង ត្រូវដោះស្រាយ។
ចំណែកពលរដ្ឋទាំង១៤គ្រួសារ មានចម្ងល់ថា អាជ្ញាធរក្រុងពេលហៅពួកគាត់មកធ្វើការសម្របសម្រួលគ្នា ហេតុអ្វីបានជា មិនឲ្យខាងក្រុមហ៊ុនលោក ឧកញ្ញ៉ា អ៊ឹង ប៊ុនហ៊ៅ មកជួបជជែកគ្នា ដោយផ្ទាល់នោះទេ។ ហើយក៏មិនបានបង្ហាញប្លង់ដីនោះដែរ គ្រាន់តែគេមកដល់សាលាក្រុងហើយ ក៏ឡើងជិះឡានទៅវិញ នៅពេលក្រុមអ្នកសារព័ត៌មានមកដល់៕ ដោយ៖ ដែន សីមា
