ខេត្តព្រះសីហនុ ៖ ស្នងការរដ្ឋាននគរបាលខេត្តព្រះសីហនុ សហការជាមួយមន្ទីរសាធារណៈការ និងដឹកជញ្ជូនខេត្ត បានចុះពង្រឹងការអប់រំច្បាប់ចរាចរណ៍ផ្លូវគោក ដល់ប្រជាពលរដ្ឋ ជាពិសេសអ្នកធ្វើដំណើរតាមម៉ូតូ អំពីសារៈសំខាន់ នៃការពាក់មួកការពារសុវត្ថិភាពបានទៀងទាត់។
លោក ឧត្តមសេនីយ៍ត្រី អ៊ី សុខា ស្នងការរងនគរបាលខេត្តព្រះសីហនុ ទទួលផែនសណ្ដាប់ធ្នាប់ បានឲ្យអ្នកយកព័ត៌មាន CEN.COM.KH ដឹងថា នៅព្រឹកថ្ងៃពុធ ទី២០ ខែធ្នូ ឆ្នាំ ២០១៧ លើផ្លូវវិថីឯករាជ្យ ត្រង់ចំណុច មុខមន្ទីរពេទ្យបង្អែកខេត្តព្រះសីហនុ ស្ថិតនៅភូមិ៤ សង្កាត់លេខ៤ ក្រុង-ខេត្តព្រះសីហនុ។ លោកបានដឹកនាំកម្លាំងនគរបាលចរាចរណ៍ផ្លូវគោកចំនួន ១៥នាក់ ដើម្បីចូលរួមសហការក្នុងកម្មពិធីចែកមួកសុវត្ថិភាពចំនួន ១០០មួក និង ផ្សព្វផ្សាយអប់រំច្បាប់ស្ដីពីចរាចរណ៍ផ្លូវគោក ជូនប្រជាពលរដ្ឋអ្នកបើកបរ និងអ្នករួមដំណើរតាមទោចក្រយានយន្ត សរុបចំនួន ១០០នាក់។
លោកបន្តថា ការចុះអប់រំច្បាប់ចរាចរណ៍នេះ លោកស្រី មីន មាណវី រដ្ឋលេខាធិការក្រសួងសាធារណៈការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក ក៏បានបង្ហាញវត្តមាន ក្នុងពិធីចុះអប់រំផ្សព្វផ្សាយ ច្បាប់ចរាចរណ៍ផ្លូវគោក និងចែកមួកការពារសុវត្ថិភាព ជូនដល់អ្នកធ្វើដំណើរតាមផ្លូវសាធារណៈនេះដែរ។
លោកឧត្តមសេនីយ៍ត្រី អ៊ី សុខា បញ្ជាក់ថា សមាសភាពចូលរួម ចុះផ្សព្វផ្សាយច្បាប់ចរាចរណ៍ផ្លូវគោក និងចែកមួកការពារសុវត្ថិភាព ជូនប្រជាពលរដ្ឋ ធ្វើដំណើរតាមម៉ូតូ មានទីតាំងនៅទល់មុខមន្ទីរពេទ្យបង្អែក ខេត្តព្រះសីហនុ កាលពីព្រឹកថ្ងៃទី២០ ខែធ្នូ រួមមាន៖ មន្ត្រីអគ្គនាយករងអគ្គនាយកដ្ឋានដឹកជញ្ជូនផ្លូវគោក។ ប្រធាននាយកដ្ឋានសុវត្ថិភាពចរាចរណ៍ផ្លូវគោក។ លោក ណុប ហេង ប្រធានមន្ទីរសាធារណៈការ និងដឹកជញ្ជូនខេត្តព្រះសីហនុ។ លោក អ៊ី សុខឡេង អភិបាល ក្រុងព្រះសីហនុ ព្រមទាំងមន្ត្រីស្ថាប័នជំនាញពាក់ព័ន្ធមួយចំនួនទៀត នៃរដ្ឋបាលខេត្តព្រះសីហនុ បានចូលរួម។
ឆ្លៀតឱកាសនោះ លោក អ៊ី សុខា ស្នងការរងនគរបាលខេត្តព្រះសីហនុ បានអំពាវនាវដល់ប្រជាពលរដ្ឋ ពិសេសអ្នកប្រើប្រាស់ផ្លូវទាំងអស់ ទាំងមធ្យោបាយរថយន្ត និងម៉ូតូ ត្រូវចូលរួមគោរពច្បាប់ចរាចរណ៍ផ្លូវគោក ឲ្យបានជាប្រចាំ ទោះចម្ងាយផ្លូវជិត ឬឆ្ងាយបែបណាក្តី ដើម្បីការពារអាយុជីវិតខ្លួនឯង និងក្រុមគ្រួសារនីមួយៗ បង្កដោយគ្រោះថ្នាក់ចរាចរណ៍នាថ្ងៃអនាគត។
លោកសង្កត់ធ្ងន់ថា ដើម្បីកាត់បន្ថយអត្រាគ្រោះថ្នាក់ចរាចរណ៍នៅខេត្តព្រះសីហនុ ក៏ដូចជានៅទូទាំងប្រទេសកម្ពុជា អ្នកបើកបរម៉ូតូ និងអ្នករួមដំណើរទាំងអស់ ដាច់ខាតត្រូវតែពាក់មួកការពារសុវត្ថិភាព ឲ្យបានជាប្រចាំ ហើយអ្នកបើកបររថយន្តគ្រប់ប្រភេទ ត្រូវតែពាក់ខ្សែក្រវ៉ាត់ការពារសុវត្ថិភាព ឲ្យបានគ្រប់គ្នា និងជាប្រចាំ មិនថាចម្ងាយផ្លូវធ្វើដំណើរជិត ឬឆ្ងាយនោះទេ៕ ដែន សីមា