ខេត្តព្រះសីហនុ ៖ មន្ត្រីគយចល័ត បានសហការជាមួយ កម្លាំងកងរាជអាវុធហត្ថក្រុង ព្រះសីហនុ បានបន្តសកម្មភាពចុះបង្ក្រាបម៉ូតូសេរីទំនើបៗ ដែលឈ្មួញនាំចូលអត់បង់ពន្ធ មកដាក់តាំងលក់ នៅតាមហាងលក់ម៉ូតូមួយចំនួននាខេត្តព្រះសីហនុ។
កម្លាំងកងរាជអាវុធហត្ថ ក្រុងព្រះសីហនុ ឲ្យដឹងថា កាលពីម៉ោងប្រមាណ ១០ និង៣០នាទី ព្រឹក ថ្ងៃពុធ ទី២០ ខែធ្នូ ឆ្នាំ២០១៧ កម្លាំងកងរាជអាវុធហត្ថក្រុងចំនួន ២នាក់ បានរួមសហការ ជាមួយកម្លាំងគយចល័ត ខេត្តព្រះសីហនុ បានចុះត្រួតពិនិត្យម៉ូតូ ដែលដាក់តាំងលក់ក្នុងហាងយីហោ យក់ កក្កដា មានទីតាំងនៅមុខផ្សារចិន ម្តុំអូរ១ ស្ថិតក្នុងភូមិ១ សង្កាត់៤ ក្រុង-ខេត្តព្រះសីហនុ។ ជាលទ្ធផល បានរកឃើញ និងដកហូតម៉ូតូ អត់បង់ពន្ធអាករនាំចូលចំនួន ១៤គ្រឿង យកទៅរក្សាទុកនៅសាខាគយ និងរដ្ឋាករ ខេត្តព្រះសីហនុ នោះរួមមាន៖
១-ម៉ូតូម៉ាក ViSion ចំនួន ៤គ្រឿង-
២-ម៉ូតូម៉ាក AirBlade. ចំនួន ៦គ្រឿង-
៣-ម៉ូតូម៉ាក Zoomer ចំនួន ១គ្រឿង-
៤-ម៉ូតូម៉ាក Scopy ចំនួន២គ្រឿង-
៥- ម៉ូតូម៉ាក Honda Wave ចំនួន ១គ្រឿង។
មន្ត្រីគយ និងរដ្ឋាករ បានឲ្យដឹងថា ម៉ូតូអត់បង់ពន្ធចំនួន ១៤គ្រឿង ត្រូវបាននាំយកទៅរក្សាទុក នៅសាខាគយ និងរដ្ឋាករ ខេត្តព្រះសីហនុ ដើម្បីមានវិធានការតាមផ្លូវច្បាប់អោយបានធ្ងន់ធ្ងរ។
ទាក់ទិនបញ្ហានេះ មន្ត្រីឃ្លាំមើលផែនការអភិវឌ្ឍ សង្គម បានស្នើដល់មន្ត្រីថ្នាក់ជាតិ អោយជួយពិនិត្យសកម្មភាពការងារមន្ត្រីគយ និងរដ្ឋាករ នាខេត្តព្រះសីហនុ អោយបន្តសកម្មភាព អនុវត្តការងារអោយបានត្រឹមត្រូវ និងស្របតាមច្បាប់៕ ដែន សីមា