ភ្នំពេញ៖ លោកឃួង ស្រេង អភិបាលរាជធានីភ្នំពេញបានមានប្រសាសន៍ថា ការប្រមូលពន្ធពីអ្នកជាប់ពន្ធមិនមែនជាការងាយនោះទេ យកលុយពីគេមិនស្រួលប៉ុន្មានទេ តែដោយសារវាជាតាតព្វកិច្ចរបស់ពួកគាត់ ទើបពួកគាត់បង្ខំចិត្តទៅបង់ពន្ធ ។ដូច្នេះទេ អភិបាលខណ្ឌ ទាំង១២ សង្កាត់ទាំង១០៥ ត្រូវចូលរួមសហការគ្នាជាមួយសាខាពន្ធដើម្បីប្រមូលពន្ធចូលរដ្ឋអោយបានល្អប្រសើរទៅតាមផែនការដែលបានដាក់ចុះ ។
ការជម្រុញបែបនេះលោកឃួង ស្រេង បានធ្វើឡើងការពីរសៀលថ្ងៃទី២១ ធ្នូ នៅសាលារាជធានីភ្នំពេញ ក្នុងពិធីប្រកាសតែងតាំង សម្រួលភារកិច្ចនិងប្រកាសតែងតាំងតំណាងប្រធានសេខាខណ្ឌឫស្សីកែវ ដូនពេញ មានជ័យ ចំការមន ពោធិ៍សែនជ័យ ។
លោកឃួង ស្រេងបន្តថា ដោយកន្លងមកនេះមានប្រជាជនមួយចំនួនមិនសូវជាខ្វល់ជាមួយនឹងការបង់ពន្ធទេ តែដល់ពេលជិតបិទលែងអោយបង់ទើបនាំគ្នាសម្រុកទៅបង់ពន្ធ ដែលជាបញ្ហា ដោយសារពួកគាត់សម្រុកទៅបង់ពន្ធច្រើនគ្នាពេក ធ្វើអោយមន្ត្រីពន្ធដារបំរើសេវាបង់ពន្ធជូនមិនបានល្អ។ លោកថា ក្នុងនាមអាជ្ញាធរមូលដ្ឋានត្រូវបំផុសនិងប្រកាសអោយពួកគាត់ទៅបង់ពន្ធ ដោយវាជាកាតព្វកិច្ចជៀសមិនផុតទេ។
លោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានមានប្រសាសន៍ថា យើងនឹងបង្កើតសាខាទាំង៩នៃអគ្គនាយកដ្ឋានពន្ធដារ នៅរាជធានីភ្នំពេញ ។ ការបង្កើតអោយមានអង្គភាពមួយនេះ គឺដើម្បីសម្រួលការងារនៅរាជធានីភ្នំពេញ ស្របពេលដែលរាជធានីភ្នំពេញមានចំណូលច្រើនពីការប្រមូលពន្ធនេះ។
លោកបានបញ្ជាក់ថា ក្នុងឆ្នាំ២០១៧នេះ ការប្រមូលពន្ធនៅថ្នាក់ក្រោមជាតិដូចជា ពន្ធប្រថាប់ត្រា ជាដើមនោះបានជាង១៧១លានដុល្លារ ជាចំណូលថវិកាក្រោមជាតិរកបាន ដែលអាចបំរើអោយប្រជាពលរដ្ឋក្នុងការអភិវឌ្ឍមូលដ្ឋាននៅថ្នាក់ក្រោមជាតិ។ចំណែកពន្ធដារថ្នាក់ជាតិវិញនៅក្នុងឆ្នាំ២០១៧នេះ គិតក្នុងរយៈពេល១១ខែ យើងមានលើសផែនការ៦,៥ភាគរយ ខណៈបើតាមផែនការត្រូវប្រមូលមានចំនួន ១៧១៥លានដុល្លារ តែត្រឹម១១ខែសោះយើង ប្រមូលបានរហូតដល់១៨២៨លានដុល្លារ អញ្ចឹងទេ វានឹងអាចលើសផែនការជាង១០ភាគរយ ពោលគឺការប្រមូលពន្ធដានៅឆ្នាំ២០១៧នេះ ថវិកាដែលនឹងត្រូវប្រមូលបានលើសផែនការ មិនតិចជាង១០០លានដុល្លារទេ ដើម្បីអោយរដ្ឋប្រើប្រាស់។ ការប្រមូលពន្ធបានលើសផែនការជាបន្តបន្ទាប់នេះក៏ដោយសារការកៀងគរ ការចុះបញ្ជីបានល្អ ។
លោកបញ្ជាក់ថា ដើម្បីអោយការងារនេះកាន់តែល្អប្រសើរថែមទៀតនោះ នៅពេលដ៏ខ្លីខាងមុខនេះយើងនឹងចេញវិក័យបត្រពន្ធដារនេះអោយ ដូចការចេញវិក័យបត្រទឹក ភ្លើងអញ្ចឹងដែរ ដែលការងារនេះចាំបាច់ត្រូវប្រើធនធានមនុស្ស។ដោយកន្លងមកដាក់មនុស្សខុសពីជំនាញ ដូច្នេះការផ្ទេរធនធាមមនុស្សវាជារឿងសំខាន់ ។ការបង់ពន្ធត្រូវបានធ្វើជាទំនើបកម្ម ដោយយើងបានចាប់ដៃជាមួយធនាគារឯកជនជាច្រើន ដែលប្រជាពលរដ្ឋអាចបង់ពន្ធតាមអនឡាញក៏បានស្រួល។
លោកបញ្ជាក់ថា នៅដើមឆ្នាំ២០១៨នេះ យើងបានជ្រើសរើសមន្ត្រីជាប់កិច្ចសន្យារួចហើយ ដើម្បីធ្វើការងារលើវិស័យពន្ធដារនេះ លោកនឹងអោយមន្ត្រីរបស់យើងចុះដល់ផ្ទះប្រជាពលរដ្ឋ អោយលិខិតទៅពួកគាត់មើល អោយមន្ត្រីចុះទៅធ្វើបច្ចុប្បន្នភាព មិនអាចយកដីវីឡាចាស់ទៅបង់ពន្ធ ខណៈវីឡានោះរុះរើទៅធ្វើជាខុនដូច្រើនជាន់ហើយនោះ ទេ។
លោកសូមអោយអាជ្ញាធររាជធានីសហការជាមួយពន្ធដារ ដើម្បីធ្វើការងារលើការប្រមូលពន្ធនេះ ។លោកបញ្ជាល់ថា ការសុំអោយសហការនេះគឺចង់អោយមន្ត្រីរបស់លោកចុះមូលដ្ឋានដើម្បីប្រកាស់ប្រាប់ប្រជាពលរដ្ឋ ថាផ្ទះណាជាប់ពន្ធនិងផ្ទះណាមិនជាប់ពន្ធ ។យើងត្រូវជៀសវាងអោយបាននូវបញ្ហាដែលជាកង្វល់របស់ប្រជាពលរដ្ឋ ដូចជាពួកគាត់មិនបានទទួលព័ត៌មានថាផ្ទះគាត់ត្រូវជាប់ពន្ធទេ លុះពេលគាត់ផ្ទេរឬលក់ផ្ទះលក់មិនបានដោយត្រូវបង់ពន្ធហើយត្រូវផាកពិន័យថែមទៀតនោះ។
លោកឃួង ស្រេង ក៏ដូចជាលោក គង់ វិបុល បានមានប្រសាសន៍ហើយថា ការប្រមូលពន្ធពីអ្នកជាប់ពន្ធមិនមែនជាការងាយស្រួល យកលុយពីគេមិនស្រួលប៉ុន្មានទេ តែដោយសារវាជាតាតព្វកិច្ចរបស់ប្រជាពលរដ្ឋ ពួកគាត់បង្ខំចិត្តទៅបង់ពន្ធ ។ប៉ុន្តែអ្វីដែលជាទង្វើរមិនល្អរបស់មន្ត្រីពន្ធដារនោះ គឺធ្វើឬកពារដូចស្តេច ធ្វើមើលតែអ្នកទៅបង់ពន្ធចូលរដ្ឋនោះ ទៅសុំបាយមន្ត្រីអស់ហ្នឹងស៊ីអញ្ចឹងដែរ ។
ប្រជាពលរដ្ឋរស់នៅខណ្ឌពោធិសែនជ័យ ក៏ដូចជាពលរដ្ឋរស់នៅខណ្ឌ៧មករា ខណ្ឌច្បារអំពៅជាដើម បានបង្ហាញពីទង្វើរមិនល្អរបស់មន្ត្រីពន្ធដារនៅតាមខណ្ឌនីមួយៗថា ក្នុងនាមជាប្រជាពលរដ្ឋពួកគាត់មានកាតព្វកិច្ចត្រូវបង់ពន្ធផ្លូវសម្រាប់រថយន្តមួយឆ្នាំ១ដង តែនៅពេលទៅដល់ទីស្នាក់ការបង់ពន្ធ ទោះបីមានអ្នកទៅបង់ពន្ធនោះត្រឹម២ទៅ៣នាក់ក៏ដោយ ក៏មន្ត្រីទាំងនោះ បំរើជូនអ្នកទៅបង់ពន្ធមិនល្អដែរ ដូចជាការប្រើសំដីមិនសមរម្យ អោយប្រជាពលរដ្ឋរត់ទៅកូពីឯកសារនៅឆ្ងាយពីទីស្នាក់ការ បើទោះបីនៅក្នុងស្នាក់ការពន្ធដានោះមានម៉ាស៊ីនកូពីជាច្រើនគ្រឿងក៏ដោយ ។ទង្វើបែបនេះបានធ្វើអោយប្រជាពលរដ្ឋរិះគន់ព្រមទាំងលួចជេរបញ្ចោរផងដែរ ហើយមានប្រពលរដ្ឋខ្លះនិយាយថា ឈប់មកបង់ពន្ធនៅស្នាក់ការពន្ធដារទាំងនេះទៀតទៅ បើមិនចង់អោយខាតបង់ពេលវេលានិងក្តៅក្រហយក្នុងចិត្តដោយសារមន្ត្រីអស់នេះនោះ នាំគ្នាទៅបង់ពន្ធនៅធនាគារជាដៃគូវិញទៅ ៕ ដោយ ៖ កូឡាប
