ភ្នំពេញ ៖ កិច្ចប្រជុំពិភាក្សា រវាងក្រុមប្រឹក្សាពីគ្រោះនិងផ្ដល់យោបល់ជាមួយក្រសួងពាណិជ្ជកម្មស្តីអំពី ការផ្សព្វផ្សាយគ្រឿងស្រវឹងហួសហេតុពេកបានកាលពីព្រឹកថ្ងៃទី 11 ខែមេសាឆ្នាំ 2019។
លោកពេជ្រ ស្រស់ ជាប្រធានគណបក្សយុវជនកម្ពុជានិងជាសមាជិក ឧត្តមក្រុមប្រឹក្សាពិគ្រោះនិងផ្ដល់យោបល់ បានសរសេរនៅលើ facebook របស់លោកថា ឆ្លើយតបភ្លាមៗ គឺឯកឧត្តមរដ្ឋមន្ត្រីក្រសួងពាណិជ្ជកម្ម បានទទួលសំណើររបស់ប្រតិភូគណបក្សយុវជនកម្ពុជា ដើម្បីចេញប្រកាសក្នុងការលុបបំបាត់ការផ្សព្វផ្សាយនូវគ្រឿងស្រវឹងដែលមានផ្តល់រង្វាន់ និងការប្រគំតន្ត្រីផ្សព្វផ្សាយគ្រឿងស្រវឹងនៅតាម ឃុំ ស្រុក ខេត្ត ហើយការធ្វើប្រកាសនេះនឹងចេញឆាប់ៗ ក្រោយពីប្រជុំអន្តរក្រសួងរួចរាល់នៅថ្ងៃខាងមុខនេះ។
ក្នុងកិច្ចប្រជុំនោះលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានទទួលយកសំណើរបស់ប្រតិភូគណបក្សយុវជនកម្ពុជា
ដើម្បីចេញអនុក្រឹត្យ ហាមឃាត់ការផ្សាយពាណិជ្ជកម្មគ្រឿងស្រវឹងតាមកញ្ចក់ទូរទស្សន៍ វិទ្យុ និងតាមទីសាធារណៈនានា ដោយឃោសនាផ្តល់រង្វាន់ និងការប្រគុំតន្ត្រីផ្សព្វផ្សាយគ្រឿងស្រវឹង នៅតាមមូលដ្ឋាន។
លោក ពេជ្រ ស្រស់ ប្រធានគណបក្សយុវជនកម្ពុជា បានឲ្យដឹងថា នៅក្នុងកិច្ចប្រជុំនៅវិមានសន្តិភាព ឯកឧត្តមរដ្ឋមន្ត្រីបានសន្យារៀបចំប្រជុំអន្តរក្រសួង ដើម្បីព្រាងអនុក្រឹត្យនេះឲ្យបានចេញឆាប់ៗខាងមុខនេះ។
កន្លងមកក្រសួងសុខាភិបាលធ្លាប់បានតាក់តែសេចក្តីព្រៀងច្បាប់ស្តីពីការត្រួតពិនិត្យផលិតផលគ្រឿងស្រវឹង ដែលមាន១១ជំពូក និងមាន៣៩មាត្រា ប៉ុន្តែច្បាប់នេះនៅជាប់គាំងមិនទាន់បានចេញរួចនៅឡើយទេ ដូច្នេះខ្ញុំនឹងតាមរឿងធ្វើច្បាប់នេះឲ្យដល់ទីបញ្ចប់ ដើម្បីការពារអាយុជីវិតរបស់ប្រជាពលរដ្ឋខ្មែរយើង»។
លោកបានបញ្ជាក់ទៀតថា ច្បាប់នេះត្រូវបានក្រសួងសុខាភិបាលតាក់តែងតាំងពីឆ្នាំ២០១៥មកម្លេះ ហើយនៅពេលនេះ លោកបានសំណូមពរឲ្យក្រសួងពាណិជ្ជកម្មដឹកនាំធ្វើបន្ត ដើម្បីបានចប់សព្វគ្រប់ នាពេលខាងមុខ។
សូមរំលឹកថា កាលពីថ្មីៗនេះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ធ្លាប់បានណែនាំម្ចាស់ស្ថានីយ៍វិទ្យុ ទូរទស្សន៍ និងម្ចាស់ផលិតកម្មភាពយន្ត វីដេអូ ឲ្យបញ្ឈប់ការផលិត និងចាក់ផ្សាយវីដេអូ ឬចម្រៀងដែលយកគ្រឿងស្រវឹងធ្វើជាការដោះស្រាយវិបត្តិ។ តាមសេចក្ដីជូនដំណឹងមួយហាមអ្នកពាក់ព័ន្ធមិនឲ្យផលិត និងចាក់ផ្សាយវីដេអូដែលបង្ហាញពីការប្រើប្រាស់គ្រឿងស្រវឹងដើម្បីបំបាត់ទុក្ខ ដោយថា ជាការធ្វើឲ្យប៉ះពាល់ដល់សីលធម៌ និងសណ្ដាប់ធ្នាប់សង្គម។
សេចក្ដីជូនដំណឹង ដែលចេញដោយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានណែនាំថា ការផលិតខ្សែភាពយន្ត ឬវីដេអូខារ៉ាអូខេ ដែលជ្រើសយកគ្រឿងស្រវឹងជាគុណសម្បត្តិក្នុងការដោះស្រាយបញ្ហាវិបត្តិស្នេហា ឬទុក្ខកង្វល់ផ្សេងៗ បាននាំឲ្យយុវជនដែលពុំទាន់មានមូលដ្ឋានក្នុងការពិចារណា មានការភាន់ច្រឡំ និងយកតម្រាប់តាម។ ការយល់ច្រឡំ និងយកតម្រាប់តាមរបស់យុវជន បានធ្វើឲ្យពួកគេប្រើប្រាស់គ្រឿងស្រវឹងរហូតបាត់បង់សតិ ឈានទៅរកការប្រើប្រាស់គ្រឿងញៀន និងការប្រព្រឹត្តអំពើហិង្សា ដែលធ្វើឲ្យប៉ះពាល់ដល់កិត្តិយស សេចក្ដីថ្លៃថ្នូរ និងសណ្ដាប់ធ្នាប់សង្គម។ ដើម្បីជៀសវាងផលអវិជ្ជមានខាងលើ ក្រសួងព័ត៌មានសូមធ្វើការណែនាំដល់ម្ចាស់ស្ថានីយ៍វិទ្យុ ទូរទស្សន៍ និងម្ចាស់ផលិតកម្មភាពយន្ត វីដេអូ ដែលតែងនិពន្ធបទចម្រៀង ឬភាពយន្ត វីដេអូ សាច់រឿងតួអង្គមានវិបត្តិផ្លូវចិត្ត សូមបង្ហាញនូវវិធីដោះស្រាយសមស្រប ឬការអប់រំផ្លូវចិត្ត ឬការតាំងសមាធិធ្វើជាមធ្យោបាយដោះស្រាយបញ្ហា ប្រសើរជាងការបង្ហាញរូបភាពប្រើប្រាស់គ្រឿងស្រវឹង ដើម្បីដោះស្រាយបញ្ហាបំបាត់ទុក្ខសោករបស់តួអង្គ។
ខាងក្រោម គឺជាសំណើររបស់ប្រតិភូគណបក្សយុវជន៖ ប្រតិភូរបស់គណបក្សយុវជនកម្ពុជាបានស្នើដល់រដ្ឋមន្ត្រីក្រសួងពាណិជ្ជកម្មបន្ទាន់មួយ ដើម្បីចេញ្រឿ ប្រកាសក្នុងការលុបបំបាត់ពីការផ្សព្វផ្សាយគង ស្រវឹងហួសហេតុពេក (ការផ្តល់រង្វាន់) និងការធ្វើ ប្រគំតន្ត្រីផ្សព្វផ្សាយគ្រឿងស្រវឹងតាម ឃុំ ស្រុក ខេត្តនៅទូទាំងប្រទេសកម្ពុជាដើម្បីការពារនូវអាយុ ជីវិតរបស់ប្រជាពលរដ្ឋខ្មែរយើង ដូច្នេះឆន្ទៈយើងខ្ញុំ្វ ចង់បានការរឹតបន្តឹងនិងការលុបបំបាត់ការផ្សពផ្សាយ គ្រឿងស្រវឹងគ្រប់រូបភាព។
បន្ទាប់ពីបញ្ចប់កិច្ចប្រជុំក៏បានចេញលទ្ធផលសង្ខេប អំពីកិច្ចប្រជុំជាមួយក្រសួងពាណិជ្ជកម្មស្តីពីការរឹតបន្តឹងនូវការផ្សព្វផ្សាយគ្រឿង ស្រវឹងមានលក្ខណៈយ៉ាងអនាធិបតេយ្យគឺសម្រេចចេញជាលទ្ធផលដូចតទៅ ៖
១. ប្រតិភូក្រសួងពាណិជ្ជកម្មបានប្តេជ្ញាចំពោះមុខសមាជិកឧត្តមក្រុមប្រឹក្សាពិគ្រោះ និងផ្តល់យោបល់ ក្នុងកិច្ចការរឹតបន្តឹងនូវការ ផ្សព្វផ្សាយគ្រឿងស្រវឹងគ្រប់រូបភាពឲ្យថយចុះ ដើម្បីទប់ស្កាត់ការគ្រោះថ្នាក់ចរាចរណ៍និងការប្រព្រឹត្តអំពើខុសច្បាប់ផ្សេងៗនៅក្នុងសង្គមកម្ពុជាដែលកើតចេញពីការសេពគ្រឿងស្រវឹង ដោយមិនមានការទទួលខុសត្រូវក្រោយពីទទួលទាននូវគ្រឿងស្រវឹង ។
២. ប្រតិភូក្រសួងពាណិជ្ជកម្មនឹងពន្លឿនច្បាប់គ្រប់គ្រងនូវគុណភាពអាហារ និងច្បាប់ការពារអ្នកផឹកនិងទប់ស្កាត់អ្នកផឹកគ្រឿងស្រវឹងដើម្បីធានាឲ្យបានការទទួលខុសត្រូវចំពោះមុខច្បាប់ និងកំណត់អត្តសញ្ញាណអ្នកផឹក ។
៣. ប្រតិភូក្រសួងពាណិជ្ជកម្មបានទទួលសំណើររបស់ប្រតិភូគណបក្សយុវជនកម្ពុជា ដើម្បី ចេញនូវសេចក្តីប្រកាសរួមមួយក្នុងការលុបបំបាត់នូវការផ្សព្វផ្សាយ អំពីគ្រឿងស្រវឹងដែលដាក់រង្វាន់និងតាមបណ្តាទីប្រជុំជន និងការប្រគុំតន្ត្រីផ្សព្វផ្សាយគ្រឿងស្រវឹងនៅតាមឃុំស្រុក ខេត្តយ៉ាងអនាធិបតេយ្យ ដើម្បីទប់ស្កាត់នូវអំពើអសីលធម៌ទាំងឡាយក្នុងសង្គមជាតិ ជាពិសេស គឺការកាត់បន្ថយគ្រោះថ្នាក់ចរាចរណ៍នៅប្រទេសកម្ពុជា។
៤. កិច្ចប្រជុំរវាងប្រតិភូក្រសួងពាណិជ្ជកម្មនិងប្រតិភូសមាជិកឧត្តមក្រុមប្រឹក្សាពិគ្រោះ និងផ្តល់យោបល់បានបញ្ចប់ទៅដោយក្រោមស្មារតីរួមគ្នាលុបបបាត់អំពើអសីលធម៌និងការកាត់បន្ថយគ្រោះថ្នាក់ចរាចរណ៍តាមរយៈការលុបបំបាត់នូវការផ្សព្វផ្សាយគ្រឿងស្រវឹងមានលក្ខណៈលើកទឹកចិត្តដល់អ្នកផឹក និង រឹតបន្តឹងអំពីការផ្សព្វផ្សាយគ្រឿងស្រវឹងគ្រប់រូបភាពនៅតាមប្រព័ន្ធផ្សព្វផ្សាយនានា និងនៅតាមទីប្រជុំជនផងដែរ ជាពិសេសគឺការប្រគុំតន្ត្រីតែម្តង…..។
បញ្ជាក់៖ ប្រតិភូគណបក្សយុវជនកម្ពុជា នឹងបន្តធ្វើកិច្ចការជាមួយភាគីដទៃទៀត អំពីការផ្សព្វផ្សាយនូវគ្រឿងស្រវឹងមានលក្ខណៈលើកទឹកចិត្តអ្នកផឹក ដើម្បីកាត់បន្ថយនូវគ្រោះថ្នាក់ចរាចរណ៍ និងលុបបំបាត់អំពើអសីលធម៌នានានៅក្នុងសង្គមជាតិខ្មែរយើងជាពិសេសគឺទប់ស្កាត់យុវជនប្រព្រឹត្តនូវអំពើអបាយមុខជាហេតុនាំឲ្យយុវជនខូចអនាគត៕ ដោយ៖កូឡាប
