ខេត្តសៀមរាប ៖ ឪពុកតិរច្ឆាន បានសារភាពនៅចំពោះមុខសមត្ថកិច្ចនគរបាលថាពិតជាបាន ចាប់រំលោភកូនខ្លួនឯងបានសម្រេច ហើយនៅថ្ងៃទី 26 ខែមេសានេះ កម្លាំងនគរបាលជំនាញ នៃស្រុកស្វាយលើកំពុងរៀបចំសំណុំរឿងនេះ បញ្ជូនមកកាន់ការិយាល័យជំនាញ នៃស្នងការដ្ឋានខេត្តសៀមរាប ដើម្បីចាត់ការបន្តតាមផ្លូវច្បាប់។
នៅព្រឹកថ្ងៃទី២៦ ខែមេសាឆ្នាំ២០១៩នេះ មន្ដ្រីនគរបាល ស្រុកស្វាយលើ បានរាយការណ៍មកថា បានឃាត់ជនសង្ស័យ ជាឪពុកបង្កើត ដែលបានចាប់រំលោភកូនខ្លួនឯង ដែលទើបមានវ័យ១៣ឆ្នាំ បានសម្រេចម្តងហើយ ក្រោយមកចង់ចាប់រំលោភម្តងទៀតហើយក៏បែកការណ៍ដឹងដល់ម្ដាយ ត្រូវបានជនរងគ្រោះប្រាប់ម្តាយឲ្យប្តឹងទៅនគរបាលស្រុកស្វាយលើ ដើម្បីឃាត់ខ្លួនបានជាក់ស្តែងតែម្តង ហេតុការណ៍ឃាត់ខ្លួននេះធ្វើឡើងនៅវេលាម៉ោង១៨ និង ៣០ នាទីថ្ងៃទី២៤ ខែមេសា ឆ្នាំ២០១៩ នៅ ភូមិ ស្រែរបង ឃុំ បឹងមាលា ស្រុកស្វាយលើ ខេត្តសៀមរាប។
ជនសង្ស័យ ឈ្មោះ ហ៊ា ហុន ភេទប្រុស អាយុ ៣៤ ឆ្នាំ មុខរបរកសិករជាឪពុកបង្កើតរបស់ជនរងគ្រោះ ឈ្មោះ អាយុ ១៣ ឆ្នាំ ។
លោកវរសេនីយ៍ឯក ស៊ុន អេង អធិការនគរបាល ស្រុកស្វាយលើ បានឲ្យដឹងថា កងកម្លាំងនគរបាលស្រុកបានទទួលបណ្ដឹងពីម្តាយជនរងគ្រោះ ករណីរំលោភសេពសន្ថវៈ ទាក់ទងនឹងជនរងគ្រោះនៅចំណុចផ្ទះក្មេងរងគ្រោះ។
លោកអធិការនគរបាលបាននិយាយដោយដកស្រង់ ការរៀបរាប់ពីក្មេងរងគ្រោះបានអោយដឹងថា នៅថ្ងៃទី១៨ ខែមេសា ឆ្នាំ ២០១៩ វេលាម៉ោង ១៨និង១០យប់ ឪពុកបង្កើតរបស់ខ្លួនឈ្មោះ ហ៊ា ហុន បានឈ្លោះប្រកែកជាមួយម្ដាយ រហូតដល់យប់ ម្ដាយខ្លួនបានចេញពីផ្ទះ ដោយនាំបងស្រីទៅជាមួយ ក្រោយមកខ្លួនបាននាំប្អូនស្រីភ្លោះ ដើរទៅតាមម្ដាយពីភូមិ ស្រែរបង មកដល់ វត្តបឹងមាលា ស្ថិត ក្នុងភូមិ ទឹកលិច ឃុំបឹងមាលា ស្រុកស្វាយលើហើយសម្រាកនៅទីនោះ លុះព្រឹកឡើងថ្ងៃទី១៩ ខែមេសាឆ្នាំ២០១៩ នៅវត្តបឹងមាលា មានការស្រង់ព្រះឆ្លងឆ្នាំ ខ្លួនក៏បាននៅលេងនៅទីនោះស្របពេលនោះមានក្មេងស្លាប់ផង ក៏ឃើញឪពុកខ្លួនមកចូលរួមពិធីបុណ្យសព នៅយប់នោះ គាត់បានឃើញពួកខ្លួនរហូតដល់ម៉ោងប្រហែល ៣ និង ៣០ នាទី ទៀបភ្លឺ ឪពុកបាននាំខ្លួនទៅផ្ទះវិញ ក្រោយមកក៏បានចាប់រំលោភ បានសម្រេចមួយដងរួចក៏ទៅ ដេកវិញ ដល់ទៀបភ្លឺឪពុកបង្កើតខ្លួនបានដាស់ខ្លួនថាអញយប់មិញដេកមមើលទេ កុំប្រាប់ម៉ែ ប្រយ័ត្នម៉ែប្ដឹងប៉ូលិសចាប់អញ ដាក់គុក ដោយខ្លាចឪពុកខ្លួន ក៏មិនប្រាប់អ្នកណាទេ រហូតដល់ ថ្ងៃទី ២១ ខែមេសា ឆ្នាំ ២០១៩ វេលា ម៉ោង ៤ ទៀបភ្លឺ ឪពុកបានធ្វើសកម្មភាពរំលោភម្ដងទៀតតែ មិនបានសម្រេច ដោយដឹងខ្លួនមុន បែរជានិយាយថា មករកពិលទៅវិញ រួចគាត់បានទៅដេកទៅវិញ លុះដល់ ថ្ងៃទី ២៤ ខែមេសា ឆ្នាំ ២០១៩ ព្រោះតែខ្លាចពីសកម្មភាពឪពុកខ្លួនប្រព្រឹត្តិអំពើដដែលទៀត ក៏បានប្រាប់ម្ដាយខ្លួនតែម្ដងទៅ ហើយម្ដាយក៏រាយការណ៍ប្រាប់សមត្ថកិច្ច ទើបសមត្ថកិច្ចធ្វើការ ឃាត់ខ្លួន ឪពុកខ្លួនសាកសួរតែម្ដងទៅ ។
បន្ទាប់ពីសមត្ថកិច្ចចាប់ខ្លួនជនសង្ស័យយកទៅដល់អធិការដ្ថានស្រុកហើយធ្វើការសាកសួរជនសង្ស័យបានឆ្លើយ សារភាពថា បានប្រព្រឹត្ត រំលោភសេពសន្ថវៈលើកូនស្រីខ្លួនឯងពិតប្រាកដមែន ។
បច្ចុប្បន្នកម្លាំងនគរបាលជំនាញ នៃស្រុកស្វាយលើកំពុងរៀបចំសំណុំរឿងនេះ បញ្ជូនមកកាន់ការិយាល័យជំនាញ នៃស្នងការដ្ឋានខេត្តសៀមរាប ដើម្បីចាត់ការបន្តតាមផ្លូវច្បាប់ ៕ ដោយ៖បញ្ញាស័ក្តិ
