ភ្នំពេញ ៖ រដ្ឋបាលរាជធានីភ្នំពេញសហការជាមួយទីក្រុងប៉ារីសបានបើកសិក្ខាសាលាបច្ចេកទេស ស្តីពីប្លង់អភិវឌ្ឍន៍តំបន់ប៉ែកខាងត្បូងរាជធានីភ្នំពេញ និង គម្រោងសិក្សាកែលម្អតីរវិថីព្រះស៊ីសុវត្ថិឲ្យបានល្អប្រសើរ ទៅតាមកំណើនប្រជាសាស្ត្ររបស់ប្រជាជនទីក្រុង បង្កលក្ខណៈឲ្យពួកគាត់រស់នៅតាមបែបស៊ីវិល័យ នៃទីក្រុងវៃឆ្លាត។
សិក្ខាសាលាដែលបានបើកធ្វើនាព្រឹកថ្ងៃទី៣០មេសានេះ មានការអញ្ជើញ ចូលរួមពីលោកឃួង ស្រេង អភិបាលរាជធានីភ្នំពេញ និងលោក ស្រីអេឡូឌី គូយកា តំណាងទីក្រុងប៉ារីស។
សិក្ខាសាលានេះក្រោមកិច្ចសហការ ទ្វេភាគីលើវិស័យនគរូបនីយកម្មក្នុងន័យជំរុញការគិតគូរអំពីបញ្ហាលំហសាធារណៈ អនាម័យ បរិស្ថាននិងសោភ័ណភាពទីក្រុងដើម្បីឆ្លើយតបទៅនឹងគោលការ នគរូបនីយបញ្ញតិ្ត និងភាពរីកចម្រើនយ៉ាងឆាប់រហ័សរបស់រាជធានីភ្នំពេញ។
លោក ឃួង ស្រេង បានថ្លែងថា៖ ការសិក្សាបច្ចេកទេសនេះគឺធ្វើឡើងបន្តពីការសិក្សាដែលរដ្ឋបាលរាជធានីភ្នំពេញ បានធ្វើឡើងអស់រយៈពេលជាង២ឆ្នាំមកហើយ។ សិក្ខាសាលានេះ ក្នុងគោលបំណងរកធាតុចូល ការចូលរួមផ្ដល់មតិយោបល់ បទពិសោធន៍ បំពេញបន្ថែមផ្នែកបច្ចេកទេស និងគោលការណ៍ច្បាប់ដែលត្រូវលើកយកមកពិភាក្សា។
លោកឃួង ស្រេង បន្តថា៖ ការពិភាក្សាធ្វើឡើងលើ២ចំណុចគឺ៖ ពិភាក្សាទៅលើការកែលម្អ ដងតីរវិថីព្រះស៊ីសុវត្ថិ ដែលក្នុងផ្នែកនេះយើងនឹងពិនិត្យពិភាក្សាលើទិដ្ឋភាពលំហូរចរាចរណ៍ ការសិក្សារៀបចំឲ្យមានការតភ្ជាប់លំហរបៃតង នៅតាមដងទន្លេសាប។ ពិភាក្សាលើការធ្វើសមាហរកម្មគម្រោងអភិវឌ្ឍន៍នៅតំបន់ភាគខាងត្បូងរាជធានីភ្នំពេញដែល ក្នុងផ្នែកនេះយើងក៏នឹងពិនិត្យពិភាក្សាទៅលើទិដ្ឋភាព នៃការសិក្សារៀបចំឲ្យមានចរន្តតភ្ជាប់រវាងបណ្តាញផ្លូវ និងហេដ្ឋារចនាសម្ព័ន្ធនៃគម្រោងអភិវឌ្ឍន៍នានា ដែលនឹងកើតមាននាពេលអនាគត បន្ស៊ីគ្នាទៅនឹងហេដ្ឋារចនាសម្ព័ន្ធមានស្រាប់ និងសិក្សារៀបចំឲ្យមានការតភ្ជាប់រវាងលំហបៃតង និងបណ្តាញការពារទឹកជំនន់រវាងតំបន់ភាគខាងត្បូង និងតំបន់ជុំវិញ។ ធាតុចូលទាំងឡាយដែលទទួលបានតាមរយៈអង្គសិក្ខាសាលាក្នុងពេលនេះ នឹងត្រូវបានប្រើប្រាស់ជាត្រីវិស័យសំរាប់តម្រង់ទិស និងបំពេញបន្ថែមចំណុចខ្វះខាតដើម្បីឲ្យការសិក្សាប្លង់អភិវឌ្ឍន៏តំបន់ប៉ែកខាងត្បូងរាជធានីភ្នំពេញ និងគំរោងសិក្សាកែលម្អ តីរវិថីព្រះស៊ីសុវត្ថឱ្យ កាន់តែមានសុក្រឹត្យភាព គ្រប់ជ្រុងជ្រោយនិងមានសនិទានភាពក្នុងការអនុវត្ត ៕ ដោយ ៖ កូឡាប
