ភ្នំពេញ ៖ លោកស្រីស៊ លីណា ចៅក្រមសាលាដំបូងរាជធានីភ្នំពេញ នៅថ្ងៃទី ២៥ធ្នូ ឆ្នាំ២០១៧នេះបានលើកយកសំណុំរឿងបង្ករបួសដោយអចេតនាលើកុមារីអាយុ១០ខែម្នាក់មកបើកសវនាការនៅចំពោះមុខជនជាប់ចោទ ។
ជនត្រូវចោទឈ្មោះ ថូ ចាន់ណា ភេទ ស្រី អាយុ ៣៦ ឆ្នាំ ជនជាតិ ខ្មែរ ទីលំនៅផ្ទះលេខ ៤៨១ ផ្លូវលំ ភូមិ ឬស្សី សង្កាត់ ស្ទឹងមានជ័យ ខណ្ឌមានជ័យ រាជធានី ភ្នំពេញ មុខរបរជាអ្នកសុីឈ្នួលមើលកូនតួចអោយគេ ។
ក្នុងសវនាការជនជាប់ចោទបានសារភាពថា ខ្លួនពិតជាបានធ្វើអោយក្មេងស្រីរងគ្រោះរបួសត្រង់ប្រដាប់ភេទដោយអចេតនា តែនៅពេលកើតហេតុភ្លាមខ្លួនមិនហ៊ាននិយាយប្រាប់ឪពុកម្ដាយក្មេងស្រីភ្លាមៗទេព្រោះខ្លាចគេស្ដីបន្ទោស ក្រោយមកទើបនាងហ៊ានប្រាប់។ ជនជាប់ចោទបានអោយដឹងទៀតថា នៅថ្ងៃកើតហេតុ ឪពុករបស់ក្មេងស្រីរងគ្រោះបានពរកូនស្រីឈ្មោះ អែម រចនា អាយុ១០ខែ មកអោយនាងមើលថែ ព្រោះនាងបានមើលថែកូនស្រីនេះតាំងពីអាយុ៣ខែមកម្ល៉េះ ដោយក្នុងមួយខែនាងបានទទួលប្រាក់កំរ៉ៃ៤០ដុល្លារ ។ លុះពេលឪពុកក្មេងស្រីចេញទៅធ្វើការក្មេងស្រីតូចនោះបានបត់ជើងធំ ហើយនាងក៏បានយកក្មេងស្រីទៅបន្ទប់ទឹកលាងសម្អាតដោយប្រើសាប៊ូ ចៃដន្យអីពេលនាងកំពុងលាងសម្អាតស្រាប់តែក្មេងស្រីបានរអិលសាប៊ូដួលបណ្ដាលអោយក្រចកដៃរបស់នាងដែលកំពុងលាងសម្អាតគូទក្មេងស្រីមុតត្រង់ប្រដាប់ភេទហូរឈាមមិនឈប់ រហូតដល់ម៉ោងហែល១០ព្រឹក ទើបនាងទូរស័ព្ទម្ដាយក្មេងស្រីអោយដឹងហើយយកកូនទៅពេទ្យ រហូតដល់ថ្ងៃទី ២០ កក្ដដាឆ្នាំ២០១៧ ស្រាប់តែប៉លីសមកចាប់នាងតែម្ដង ។
នៅក្នុងរឿងក្ដីនេះម្ដាយក្មេងស្រីរងគ្រោះបានទាមទារសំណងដល់ទៅ៥ពាន់ដុល្លារ ប៉ុន្តែនៅក្នុងសវនាការជនជាប់ចោទបានប្រាប់ចៅក្រមតុលាការថា នាងមិនមានធនធានដើម្បីសងជំងឺចិត្តដល់ឪពុកម្ដាយក្មេងស្រីរងគ្រោះទេ ។
ចៅក្រមតុលាការបានកំណត់បនរកាសសាលក្រមរឿងក្ដីនេះនៅថ្ងៃទី ០៥ មករា ឆ្នាំ២០១៨ វេលាម៉ោង១៤រសៀល ។
មន្ត្រីប៉ូលីសស្ទឹងមានជ័យបានអោយដឹងថា កាលពីថ្ងៃទី ១៨ ខែ កក្កដា ឆ្នាំ ២០១៧ វេលាម៉ោង ០៧ ម៉ ០០ នាទី ឈ្មោះ ពៅ សៅ (ត្រូវជាឪពុកបង្កើត)បានយកកូនស្រីឈ្មោះ អែម រចនា អាយុ០១ឆ្នាំ ទៅឲ្យជនសង្ស័យឈ្មោះ ថូ ចាន់ណា មើលថែ នៅផ្ទះ៤៨១ ផ្លូវលំ ភូមិ ឬស្សី សង្កាត់ ស្ទឹងមានជ័យ ខណ្ឌមានជ័យ រាជធានី ភ្នំពេញ (ផ្ទះរបស់ជនសង្ស័យ) ដោយគិតប្រាក់ឈ្នួល ក្នុង០១ខែ៤០ដុល្លារ លុះមកដល់វេលាម៉ោង១០ម៉០០នាទីថ្ងៃទី១៨-០៧-២០១៧ ស្រាប់តែ ឈ្មោះ ថូ ចាន់ណា បានទូរស័ព្ទប្រាប់ឈ្មោះ ស៊ាន រតនា ត្រូវជាម្តាយបង្កើតកុមារីរងគ្រោះឈ្មោះ អែម រចនា ឲ្យមកមើលកូនស្រីដែល មានហូរឈាមចេញពី ប្រដាប់ ភេទ ភ្លាមនោះឈ្មោះ ស៊ាន រតនា បានមកមើល ហើយ បញ្ជូន កូនស្រីឈ្មោះ អែម រចនា ទៅពិនិត្យព្យាបាលនៅមន្ទីរពេទ្យគន្ធបុប្ឆាទី៤ គ្រូពេទ្យបានប្រាប់ទើបដឹងថាកុមារីរងគ្រោះ ឈ្មោះ អែម រចនា មាន របួសដាច់រលាត់ប្រដាប់ភេទ ។ លុះមកដល់ថ្ងៃទី១៩-០៧-២០១៧ វេលាម៉ោង០៨ម៉០០ នាទី ទើបម្តាយកុមារីរង គ្រោះ ឈ្មោះ ស៊ាន រតនា បានមកដាក់ពាក្យបណ្តឹងនៅប៉ុស្តិ៍នគរ បាលរដ្ឋបាលស្ទឹងមានជ័យ ឲ្យសមត្ថកិច្ច យើង ចាត់ ការតាមច្បាប់ ភ្លាមនោះសមត្ថកិច្ចនគរបាលប៉ុស្តិ៍បានចុះទៅនាំខ្លួនជនសង្ស័យឈ្មោះ ថូ ចាន់ណា និង ប្តីឈ្មោះ ព្រំ វីរៈ យកមកសាកសួរនៅស្នាក់ការប៉ុស្តិ៍នគរបាលរដ្ឋបាលស្ទឹងមានជ័យ រហូតដល់វេលា ម៉ោង១៧ម៉៣០នាទីថ្ងៃទី១៩-០៧-២០១៧ សមកិច្ចយើងបានសម្រេចឃាត់ខ្លួនជនសង្ស័យឈ្មោះ ថូ ចាន់ណា ដើម្បី ចាត់ការតាមផ្លូវច្បាប់ ចំណែកប្តីឈ្មោះ ព្រំ វិរៈ បានអនុញ្ញាតឲ្យត្រឡប់ទៅលំនៅដ្ឋានវិញ ដោយបានការ ឯកភាព ពីលោកស្រី វ៉ា សក្តា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។
បច្ចុប្បន្នជន សង្ស័យ ឈ្មោះ ថូ ចាន់ណា ឃាត់ខ្លួន នៅអធិការ ដ្ឋាន ដើម្បីកសាងសំណុំរឿងបញ្ជូនមកតុលាកសរឃុំខ្លួនរហូតដល់ថ្ងៃកាត់ទោសនេះ៕ ដោយ ៖ បញ្ញាស័ក្តិ