តាកែវ ៖ បើយោងតាមការឲ្យដឹងពី លោក ភួន ឈីម អភិបាលស្រុកបាទី បានបញ្ជាក់ថា វេលាម៉ោងជាង៤រសៀលថ្ងៃទី០៤ ខែឧសភា ឆ្នាំ២០១៩ កំម្លាំងនគរបាលក្រសួងមហាផ្ទៃ សហការជាមួយ កំម្លាំងនគរបាលស្នងការដ្ឋាននគរបាលខេត្ត តាកែវ ដឹកនាំបញ្ជាផ្ទាល់ដោយ លោកឧត្តមសេនីយ៍ទោ សុខ សំណាង ស្នងការនគរបាលខេត្ត ចុះបង្ក្រាបករណីជួញដូរគ្រឿងញៀនទ្រុងទ្រាយធំ នៅភូមិក្រាំងក្រចាង ខាងជើងវត្តពោធិ ឃុំពារាម ស្រុកបាទី ខេត្តតាកែវ។
ដោយកំម្លាំងជំនាញបានប្រើប្រាស់គ្រប់មធ្យោបាយ ខណៈនេះយើងធ្វើការបង្ក្រាបបានហើយ ធ្វើការឃាតខ្លួនជនសង្ស័យបាន ២នាក់ ឈ្មោះយឹម វន្នី (ហៅក្រៅលិ) ភូមិដូង ឃុំដូង ស្រុកបាទី ខេត្តតាកែវ រួមនឹងដកហូតវត្ថុតាងមាន កាំភ្លើងខ្លី១ដើម ដាវសាម៉ូរៃ២ដើម ទូរស័ព្ទ៤គ្រឿង ស្នាប់ដៃ១ នឹងដកហូតបានថ្នាំញៀនមួយចំនួន។
បច្ចុប្បន្នកំម្លាំងជំនាញកំពុងនាំខ្លួនជនសង្ស័យមកកាន់ស្នងការនគរបាលខេត្ត ដើម្បីកសាងសំណុំរឿងបញ្ជូនទៅកាន់សាលាដំបូងខេត្ត ចាត់ការបន្តទៅតាមនីតិវិធីច្បាប់។
ស្នងការនគរបាលខេត្តតាកែវ លោកឧត្តមសេនីយ៍ទោ សុខ សំណាង បានប្រាប់ដល់ក្រុមអ្នកសារព័ត៌មាន ឲ្យដឹងថា ពេលប្រតិបត្តិការបង្ក្រាប ស្រាប់តែក្រុមជនល្មើសមានកាំភ្លើងហើយបាញ់ប្រហារមកលើកម្លាំងសមត្ថកិច្ច ហើយកម្លាំងសមត្ថកិច្ចក៍បានបាញ់ឡើងលើជាច្រើនគ្រាប់ដើម្បីគំរាមដល់ក្រុមជនល្មើសផងដែរ។
ក្រោយមានការបាញ់តដៃជាមួយកម្លាំងនគរបាលខេត្តតាកែវ នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ បានបញ្ជាឲ្យកម្លាំងអន្ដរាគមន៍ពិសេស ចេញជួយអន្ដរាគមន៍ភ្លាមៗ និងឈានដល់ការបង្ក្រាបបានជនដៃដល់ម្នាក់ ក្នុងចំណោមបក្ខពួក២នាក់ ដែលរត់គេចខ្លួន។
លោកឧត្តមសេនីយ៍ស្នងការ បានបញ្ជាក់ថា កម្លាំងនគរបាលជំនាញបានប្រើប្រាស់វិធានការចរចារ ជាមួយក្រុមជនល្មើសអស់ប្រមាណជាង៣ម៉ោងកន្លះ ទើបចាប់បានជនសង្ស័យម្នាក់ឈ្មោះ យឹម វណ្ណឌី អាយុ ២២ឆ្នាំ ស្រុកកំណើត ភូមិដូង ឃុំដូង ស្រុកបាទី ខេត្តតាកែវ និងដកហូតបានកាំភ្លើងខ្លីម៉ាក Glock មួយដើម ដាវចំនួន២ និងថ្នាំញៀនមួយចំនួន។
បច្ចុប្បន្នកម្លាំង ជំនាញ កំពុងកសាងសំណុំរឿង ដើម្បីចាត់ការបន្តនីតិវិធី និង ច្បាប់៕ ដោយ ៖ កូឡាប
