កំពង់ធំ ៖ ស្នងការនគរបាលខេត្តកំពង់ធំបានអះអាងថា ៖ ការលាក់បាំងនូវបទល្មើស ពិសេសល្បែងស៊ីសងខុសច្បាប់ បៀរ អាប៉ោង ជល់មាន់ ចាក់កូនសត្វ ។ល។ ដើម្បីផលប្រយោជន៍ផ្ទាល់ខ្លួន វាមិនមែនជាការល្អឡើយ។
នៅព្រឹកថ្ងៃទី ០៨ ឧសភា ២០១៩ លោកវរសេនីយ៍ឯក ហុង គឹមហឿន អធិការនគរបាលស្រុកមេមត់ បានដឹកនាំកិច្ចប្រជុំមួយនៅសាលប្រជុំនៃអធិការដ្ឋាននគរបាលស្រុកមេមត់ ដើម្បីពិក្សាគ្នានៅលើចំណុចខ្លាំង ចំណុចខ្សោយ និងចំណុចខ្វះចន្លោះក្នុងការងារប្រចាំថ្ងៃ នឹងរកឲ្យឃើញចំពោះការងារដែលកំពុងអនុវត្តជួបបញ្ហាប្រឈមជាមួយអធិការរងទទួលផែនជំនាញ នាយ-នាយរងផ្នែក និងនាយប៉ុស្តិ៍ទាំង១៤ ។
ក្នុងឱកាសនោះលោកបានសង្គត់ធ្ងន់ចំពោះកម្លាំងនគរបាលប៉ុស្តិ៍រដ្ឋបាលដែលធ្វើការនៅមូលដ្ឋានភូមិ-ឃុំ ដែលនៅគៀកជាមួយបងប្អូនប្រជាពលរដ្ឋ ហើយកំពុងមានការជួយលាក់បាំងជូនពួកគាត់នូវបញ្ហាល្បែងស៊ីសងខុសច្បាប់ បៀរ អាប៉ោង ជល់មាន់ ចាក់កូនសត្វទាំង១២ ។ល។ ដើម្បីទទួលនូវសំណូកប្រចាំថ្ងៃ ឬខែ បម្រើឲ្យផលប្រយោជន៍ខ្លួនឯងផ្ទាល់នោះត្រូវកែតម្រូវឡើងវិញជាបន្ទាន់។
លោកអធិការក៏បានបញ្ជាក់ថា ៖ បើកម្លាំងនគរបាលប៉ុស្តិ៍រដ្ឋបាលទាំងអស់ចុះទៅធ្វើការណែនាំដល់ប្រជាពលរដ្ឋនៅមូលដ្ឋានខ្លួនគ្រប់គ្រងឲ្យពួកគាត់អំពីច្បាប់ផ្សេងៗ និងពិសេសឲ្យពួកគាត់បានយល់អ្វីហៅថាច្បាប់ល្បែងស៊ីសងខុសច្បាប់នោះវាការល្អបំផុតសម្រាប់ភូមិ-ឃុំ-ស្រុកយើង ។ ទាំងនោះហើយដែលអាចបង្ហាញឲ្យឃើញថានៅមានការចូលរួមអនុវត្តនូវគោលនយោបាយភូមិ.ឃុំសុវត្ថិភាពបានល្អប្រសើរ ។
ប៉ុន្តែបើសិនជាពួកគាត់មិនស្តាប់ការអប់រំណែនាំដោយបន្តផ្គើនជាមួយសមត្ថកិច្ច និងល្មើសជាមួយច្បាប់មិនរៀងចាលជាមួយយើងជានគរបាលប៉ុស្តិ៍រដ្ឋបាលទេនោះ ត្រូវចាត់តាមវិធានការច្បាប់ល្បែងស៊ីសងខុសច្បាប់ដោយមិនមានការយោគយល់ ដោយថតរូបពួគាត់បង្ហោះលើទំព័រហ្វេសប៊ុកផេក អធិការដ្ឋាននគរបាលស្រុកមេមត់យើងផ្ទាល់តែម្តង ៕ ដោយ៖កូឡាប