ខេត្តស្វាយរៀង ៖ ក្មេងប្រុស ២នាក់ បានលង់ទឹកស្រះស្លាប់យ៉ាងអាណោចអធ័ម ខណៈដែលយាយបានដាក់អោយចៅដេកលើផ្ទះ ហើយរូបគាត់បានដឹកក្របីទៅប្រលែងនៅវាលស្រែ លុះពេលយាយត្រឡប់មកផ្ទះវិញ ទៅរកចៅមិនឃើញក៏ដើរទៅរកមើលម្តុំស្រះ ស្រាប់តែឃើញចៅទាំង ២នាក់ អណ្តែតក្នុងស្រះទឹកមិនដឹងថាចៅទាំង ២ នាក់ ចុះពីលើផ្ទះដើរចូលស្រះទឹកពីពេលណា ។
ហេតុការណ៍នេះបានកើតឡើងកាលពីវេលាម៉ោង ៦និង៣០នាទីព្រឹក ថ្ងៃទី១០ ខែឧសភា ឆ្នាំ២០១៩ ស្ថិតក្នុងភូមិ ត្រពាំងស្បូវ ឃុំព្រៃតាអី ស្រុកស្វាយទាប ខេត្តស្វាយរៀង ។
បើតាមលោកយាយឈ្មោះ ឡាញ ធឿន ដែលនាំចៅដេកបានប្រាប់អោយដឹងថា៖ នៅមុនពេលកើតរូបគាត់បាននាំចៅទាំង ២ ដេកលើផ្ទះ រួចគាត់ដើរទៅដឹកក្របីយកទៅព្រលែងចោលនៅវាលស្រែ លុះដល់គាត់ត្រឡប់មកពីព្រលែងក្របីវិញ ឡើងលើផ្ទះស្រាប់តែបាត់ចៅទាំងពីរមិនដឹងថាទៅណានោះទេ ។
គាត់ក៏ដើររកតែមិនឃើញសោះសង្ស័យធ្លាក់ទឹកស្រះក៏ដើរទៅរកមើលនៅស្រះទឹក ស្រាប់តែឃើញចៅអណ្តែតទឹកស្រះ ក៏ចុះស្រង់លើកឡើងលើគោក ប៉ុន្តែចៅទាំង ២ បានស្លាប់បាត់បង់ជីវិតទៅហើយ ។
សមត្ថកិច្ចបានឱ្យដឹងថា ៖ សពក្មេងប្រុសទី១.មានឈ្មោះ អុល សម្បត្តិ អាយុ ២ឆ្នាំឪពុកមានឈ្មោះ ណុំ អុល អាយុ ២៩ឆ្នាំ និងម្តាយឈ្មោះ រ័ត្ន ធី អាយុ ២៥ ឆ្នាំ។ សពក្មេងប្រុសទី២.មានឈ្មោះ សុខ រាជពិស័ត្ត អាយុ ២ ឆ្នាំ ឪពុកឈ្មោះ សុខ វ៉ែន អាយុ៣៣ឆ្នាំ និងម្តាយឈ្មោះ អ៊ូ ធីដា អាយុ ៣០ ឆ្នាំ អ្នកទាំងអស់រស់នៅភូមិ ត្រពាំងស្បូវ ឃុំព្រៃតាអី ស្រុកស្វាយទាប ខេត្តស្វាយរៀង ៕ ដោយ ៖ វ៉ៃកូ
