ថៃ ៖ ទាហានថៃព័ទ្ធចាប់ពលករខ្មែរ ៨០ នាក់ ដែលឆ្លងដែនចូលប្រទេសថៃ ដោយខុសច្បាប់ តាមរយៈមេខ្យល់ កាលពីថ្ងៃទី១៥ ខែឧសភា ឆ្នាំ២០១៩នេះ ។ នេះបើយោងតាមការចុះផ្សាយ តាមគេហទំពរ័ក្នុងស្រុករបស់ថៃ(ខាវ សុទ្ធ)កងពលទាហានទី១១ បន្ទាយសម្ដេចព្រះណាំង ក្លៅ ប្រគល់ភារកិច្ចឲ្យកងរក្សាសន្តិសុខ របៀបរៀបរយ បើកប្រតិបត្តិការត្រួតពិនិត្យ និងចាប់ឃុំពលករ ដែលលបលួចចូលប្រទេសថៃ ដោយខុសច្បាប់ បន្ទាប់ពីមានមុខសញ្ញាពីអ្នកផ្ដល់ព័ត៌មានថា មានក្រុមពលករខ្មែរ ចូលមកស្នាក់អាស្រ័យនៅកណ្ដាលព្រៃល្បាស ខាងក្រោយបន្ទប់ជួលលេខ៨ បន្ទប់របស់ស្ត្រីឈ្មោះ អារី ចាន់ថាវ៉ាន់ ផ្ទះលេខ27/1 ភូមិ4 ឃុំស្មេត តាយ ស្រុកបាងក្លា ខេត្តចះឆើងសៅ ។
កម្លាំងទាហាន សហការជាមួយកម្លាំងតម្រួតស្រុកបាងក្លា មន្ត្រីស្រុកបាងក្លា និងអាជ្ញាធរមូលដ្ឋាន ចូលទៅត្រួតពិនិត្យឯកសារធ្វើដំណើរ របស់ពលករខាងលើ បើសិនពិនិត្យទៅឃើញថាខុសច្បាប់ ឲ្យចាប់ឃុំភ្លាមៗ ប៉ុន្តែនៅពេលសមត្ថកិច្ចទៅដល់ ក្រុមពលករដែលស្នាក់នៅ កណ្ដាលព្រៃល្បាស ខាងក្រោយបន្ទប់ជួល បាននាំគ្នារត់បែកខ្ញែកគ្នា ដែលសមត្ថកិច្ចត្រូវបំបែកកម្លាំងគ្នា ចេញតាមចាប់បានមកទាំងអស់ជិត ៨០ នាក់ មានទាំងប្រុសនិងស្រី រួមទាំងក្មេងតូចទៀតផង។ ចំណែកមេខ្យល់បានរត់គេចខ្លួនបាត់។
ក្រុមពលករខ្មែរដែលបានចាប់ខ្លួនរបស់សមត្ថកិច្ច បានសារភាពថា ពួកគេដែលចូលមកស្នាក់នៅនេះប្រាប់ថា កាលពីម៉ោង៣ទៀបភ្លឺ យប់កន្លងទៅ គ្រប់គ្នាត្រូវមកស្នាក់នៅបរិវេណនេះ បន្ទាប់មកនឹងមានរថយន្តមកទទួល ដើម្បីបន្តដំណើរទៅខេត្តផ្សេងៗ ដើម្បីរកការងារធ្វើ ។
ពលករទាំងអស់ត្រូវបានសមត្ថកិច្ចឃុំខ្លួនទាំងអស់ និងបញ្ជូនទៅសាលប្រជុំសាលាស្រុកបាងក្លា ព្រមទាំងទាក់ទងទៅអង្គភាពពាក់ព័ន្ធ ចូលមកត្រួតពិនិត្យលម្អិតម្ដងទៀត ក្រោយពីពិនិត្យជំហ៊ានដំបូង ភាគច្រើនពលករលបលួចឆ្លងដែនតាមរយៈមេខ្យល់ចូលមកដោយខុសច្បាប់ ។
បញ្ហាពលករខ្មែរខាងលើ ដែលសមត្ថកិច្ចថៃចាប់ខ្លួន ក្រុមអ្នកព័ត៌មានយើង មិនអាចទំនាក់ទំនងពីមន្ត្រីកម្ពុជា ប្រចាំប្រទេថៃ ដើម្បីបំភ្លឺបានទេ៕ ដោយ ៖ បញ្ញាស័ក្តិ
