ខេត្តព្រះសីហនុ៖ សមត្ថកិច្ចនគរបាលខេត្តព្រះសីហនុ បានឲ្យដឹងថា កាលពីរសៀលម៉ោង១២:៣០នាទី ថ្ងៃទី២៦ ខែធ្នូ ឆ្នាំ២០១៧ មានរថយន្តឡង់គ្រីស័រសេរីពាក់ស្លាកលេខ ខ .ម ១គ្រឿង បានបើក បុកម៉ូតូនៅផ្លូវជាតិលេខ៤ ចន្លោះគីឡូម៉ែត្រ ១២៧-១២៨ នៅភូមិវាល ឃុំកំពង់សិលា ស្រុកកំពង់សិលា ខេត្តព្រះសីហនុ។
សមត្ថកិច្ច ឲ្យដឹងថា រថយន្តម៉ាក LAND CRIUSER ពណ៌ ខ្មៅ ពាក់ផ្លាកលេខ ខេមរភូមិន្ទ 2-5355 បើកបរដោយឈ្មោះ ស្រេង សុខលី ភេទ ប្រុស អាយុ ២៤ឆ្នាំ មានទីលំនៅដ្ឋាន នៅភ្នំពេញ មានទិសដៅពីភ្នំពេញមក ខេត្តព្រះសីហនុ លុះដល់ចំណុចខាងលើក៏បានបុកម៉ូតូ ១គ្រឿង ម៉ាក HONDA WAVE ពណ៌ ក្រហម គ្មានផ្លាកលេខ បើកបរដោយឈ្មោះ មាស សុខា ភេទ ប្រុស អាយុ ២៤ឆ្នាំ មានទីលំនៅ ស្រុករមាសហែក ខេត្តស្វាយរៀង បើកបរឆ្លងកាត់ផ្លូវ ពីកើត ទៅលិច។
គ្រោះថ្នាក់នេះបណ្ដាលឲ្យ ឈ្មោះមាស សុខា រងរបួសធ្ងន់ បានបញ្ជូនទៅព្យាបាល នៅមណ្ឌលសុខភាព ស្រុកកំពង់សិលា។
ចំណែក រថយន្ត និង ម៉ូតូ បានយកមករក្សាទុកនៅអធិការដ្ឋាននគរបាលស្រុកកំពង់សិលា ដើម្បីរង់ចាំដោះស្រាយបន្ត៕ ដែន សីមា
