ភ្នំពេញ ៖ ពេទ្យធ្មេញម្នាក់ ត្រូវបានឃាតករកាប់សម្លាប់នៅក្នុងបន្ទប់ជួលរបស់ឪពុកមាដែលបើកធ្វើធ្មេញ បង្កការភ្ញាក់ផ្អើលកាលពី វេលាម៉ោងប្រមាណ ៧ និង ៣០ នាទីព្រឹក ថ្ងៃទី ២០ ឧសភានេះ ត្រង់ចំណុចផ្ទះជួលបើកពេទ្យធ្មេញម្តុំផ្សារត្រពាំងព្រាយ ផ្លូវលេខ១៥១ ក្នុងភូមិបឹង សង្កាត់ពញ្ញាពន់ ខណ្ឌព្រែកព្នៅ ដោយមិនទាន់ដឹងពីមូលហេតុ។
នគរបាលមូលដ្ឋាន បានឲ្យដឹងថា យុវជនរងគ្រោះមានឈ្មោះ ធន់ រ៉ាវីន អាយុ១៩ឆ្នាំ មានលំនៅភូមិត្រគួន ឃុំក្រឡា ស្រុកំពង់សៀម ខេត្តកំពង់ចាម ស្នាក់នៅជាមួយឪពុកមាឈ្មោះ មឿ ន សុវត្ថា ជាពេទ្យធ្មេញ នៅចំណុចកើតហេតុខាងលើ ។ នៅព្រឹកថ្ងៃកើតហេតុ មានភ្ញៀវមកធ្វើធ្មេញ និងបានទូរស័ព្ទហៅពេទ្យធ្មេញ ដែលដេកនៅផ្ទះនៅភូមិទួលសង្កាត់ពន្សាំង ខណ្ឌព្រែកព្នៅ ។
នៅពេលដែលឪពុកមាមកដល់ និងបើកទ្វារចូលទៅក្នុង ស្រាប់តែប្រទះឃើញក្មួយដេកស្លាប់ក្នុងថ្លុកឈាមក្បែរគ្រែបាត់ទៅហើយ ក៏រាយការណ៍ប្រាប់នគរបាលបង្កអោយមានការភ្ញាក់ផ្អើលតែម្តង ។ តាមព័ត៌មានអោយដឹងថា នៅវេលាម៉ោងប្រមាណ៧យប់ យុវជន រងគ្រោះបានធ្វើដំណើរទៅហូបការអ្នកភូមិនៅក្បែរនោះជំនួសឪពុកមា ។ លុះនៅវេលាម៉ោងប្រមាណ៩យប់ បាន ត្រឡប់មកផ្ទះវិញ ហើយ និងបានទៅដើរលេងជាមួយសង្សាដល់យប់ជ្រៅទើបបានត្រឡប់ទៅដេកវិញ ។ លុះព្រឹកឡើងក៏ភ្ញាក់ផ្អើលឃើញសម្លាប់តែម្តង។
បើតាមសមត្ថកិច្ចដាក់ការសង្ស័យអាចជារឿងគំនុំ ឬអាចផ្តើមចេញពីស្នេហាត្រីកោណ ។ បើតាមការពិនិត្យកើតហេតុយុវជនរូបនេះ អាចមានការប្រវាយប្រតប់គ្នាជាមួយឃាតករ៕ ដោយ៖កូឡាប
