ខេត្តបាត់ដំបង ៖ ស្នងការនគរបាលខេត្តបាត់ដំបង បានឲ្យដឹងថា នគរបាលខេត្តបាត់ដំបង បង្ក្រាបករណីឃាតកម្ម ប្តីកាប់ម្លាប់ប្រពន្ធ នៅស្រុកបាណន់ ដោយឃាត់ខ្លួនបុរសម្នាក់ ជាមួយនឹងវត្ថុតាងកាំបិតខ្វែវមួយ។
នៅព្រឹកថ្ងៃទី ២១ ខែ ឧសភា ឆ្នាំ ២០១៩ នេះអនុវត្តតាមបទបញ្ជារបស់លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង លោកឧត្តមសេនីយ៍ត្រី ជេត វណ្ណនី ស្នងការរងផែនការងារព្រហ្មទណ្ឌនៃស្នងការដ្ឋាននគរបាលខេត្តបាត់ដំបង សហការណ៍ជាមួយកម្លាំងនគរបាលស្រុកបាណន់ ដែលមានលោកវរសេនីយ៍ឯក ប៉ាន់ វណ្ណនី ជាអធិការនគរបាលស្រុក បង្ក្រាបឃាត់ខ្លួនបុរសម្នាក់ឈ្មោះ យឿត រឿត អាយុ ៣៣ ឆ្នាំ រស់នៅភូមិចំការអូរ ឃុំកន្ទឺរ២ ស្រុកបាណន់ ខេត្តបាត់ដំបង ដែលជាជនដៃដល់ក្នុង (ការប្រើប្រាស់កាំបិត)កាប់ទៅលើប្រពន្ធរបស់ខ្លួនឈ្មោះ ម៉ាន់ សុភា អាយុ ៣៧ ឆ្នាំ បណ្តាលឲ្យស្លាប់បាត់បង់ជីវិត នៅបរិវេណលំនៅដ្ឋានខាងលើ កាលពីវេលាម៉ោង ៦និង៥០ នាទីព្រឹកព្រឹលឹមថ្ងៃទី ២១ ខែឧសភា ឆ្នាំ២០១៩ នេះ ។
ចំពោះមូលហេតុពិតប្រាកដនាំឈានទៅដល់ករណីឃាតកម្មមួយនេះ សមត្ថកិច្ចនគរបាលជំនាញកំពុងធ្វើការ ស្រាវជ្រាវយ៉ាងយកចិត្តទុកដាក់បំផុត ។ ជនដៃដល់ឈ្មោះ យឿត រឿត និងវត្ថុតាងបាននិងកំពុងស្ថិតក្នុងដៃ សមត្ថកិច្ចធ្វើការស្រាវជ្រាវ រីឯសាកសពជនរងគ្រោះបានប្រគល់ជូនក្រុមគ្រួសារធ្វើបុណ្យតាមប្រពៃណីក្រោយពេលពិនិត្យ និងធ្វើកោសល្យវិច័យរួច៕ ដោយ៖កូឡាប