ខេត្តព្រះសីហនុ ៖ មន្ត្រីនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តព្រះសីហនុ បានឲ្យដឹងថា កម្លាំងការិយាល័យនគរបាលចរាចរណ៍ផ្លូវគោក បានបន្តចាត់វិធានការក្តៅ ដើម្បីអនុវត្តច្បាប់ឲ្យមានប្រសិទ្ធភាព ដើម្បីកាត់បន្ថយអត្រាគ្រោះថ្នាក់ចរាចរណ៍, ការពារបរិស្ថាន និងកាត់បន្ថយចរាចរណ៍កកស្ទះ..។
ទាក់ទងបញ្ហានេះ លោក អ៊ី សុខា ស្នងការរងនគរបាលខេត្តព្រះសីហនុ ទទួលផែនចរាចរណ៍ បានឲ្យដឹងនៅថ្ងៃទី២១ ខែឧសភានេះថា កម្លាំងនគរបាល ប្រចាំការនៅគោលដៅ P4 P6 និងគោលដៅផ្សេងៗទៀត នៅក្រុងព្រះសីហនុ បានចុះឃាត់រថយន្តដឹកដីទាំងតូចទាំងធំប្រមាណ ៣៥គ្រឿង យកទៅរក្សាទុកនៅការិយាល័យនគរបាលចរាចរណ៍ផ្លូវគោក ដើម្បីផាកពិន័យតាមច្បាប់ ។
លោកបន្តថា ក្រៅពីនេះ កម្លាំងនគរបាលក៏បានពិន័យ និងណែនាំរថយន្តដឹកដី ឲ្យលាងសម្អាតជុំវិញរថយន្ត, បកកញ្ចក់រថយន្តបិតខ្មៅ, រថយន្តដឹកដីមិនគ្របឲ្យបានត្រឹមត្រូវ និងរថយន្តប្រឡាកដីជាដើម ឲ្យលាងរថយន្ត របស់ខ្លួនឲ្យបានស្អាតជាមុនៗ បើកធ្វើចរាចរណ៍នៅលើដងផ្លូវ ។
លោក អ៊ី សុខា ស្នងការរងនគរបាលខេត្តព្រះសីហនុ បានរំលឹកដល់អ្នកបើកបរយានយន្តគ្រប់ប្រភេទ និងផ្នែកពាក់ព័ន្ធ ឲ្យចូលរួមសហការជាមួយអាជ្ញាធរ ឲ្យបានទាំងអស់គ្នា ដើម្បីរក្សាបរិស្ថានអនាម័យ ក្នុងក្រុង, កាត់បន្ថយការចរាចរណ៍កកស្ទះ និងកាត់បន្ថយអត្រាគ្រោះថ្នាក់ចរាចរណ៍ឲ្យថយចុះចំនួននាខេត្តព្រះសីហនុជាដើម ៕ ដែន សីមា
