ភ្នំពេញ ៖ ដើម្បីឲ្យដំណើរការនៃការបោះឆ្នោតអសកលនាថ្ងៃទី២៦ ខែឧសភាខាងមុខនេះដំណើរការទៅបានជោគជ័យនិងមានសន្តិសុខពេញបរិបូណ៌អភិបាលនៃគណៈអភិបាលរាជធានីភ្នំពេញលោកឃួងស្រេងនារសៀលថ្ងៃទី២៣ឧសភានេះបានបើកកិច្ចប្រជុំមួយជាមួយអាជ្ញាធរនិងកងកម្លាំងប្រដាប់អាវុធដើម្បីពង្រឹងឲ្យបាននូវសន្តិសុខសណ្តាប់ធ្នាប់នាឱកាសបោះឆ្នោតអសកលខាងលើនេះ។
លោកឃួងស្រេងបានមានប្រសាសន៍ថាដើម្បីអោយដំណើរការនៃការបោះឆ្នោតនេះដំណើរទៅបានល្អមានយុត្តិធម៌មានតម្លាភាពនិងប្រជាធិបតេយ្យដាច់ខាតយើងត្រូវពង្រឹងលើការងារសន្តិសុខនេះហើយ។ ដូច្នេះទេកងកម្លាំងប្រដាប់អាវុធចំណុះអោយគណៈបញ្ជាការឯកភាពរាជធានីភ្នំពេញនិងអាជ្ញាធរទាំង១៤ខណ្ឌ ត្រូវតែពង្រឹងសន្តិសុខសម្រាប់ការបោះឆ្នោតនេះអោយបានល្អប្រើសើរ។
គួរបញ្ជាក់ថាការឃោសនាបោះឆ្នោតជ្រើសរើសក្រុមប្រឹក្សារាជធានី,ក្រុមប្រឹក្សាខណ្ឌអាណត្តិទី៣ បានបើកយុទ្ធនាកាលពីព្រឹកថ្ងៃទី១៧ ឧសភា នៅមជ្ឈមណ្ឌលសន្និបាតកោះពេជ្រតាមកាលបរិច្ឆេទរបស់គ.ជ.បហើយការឃោសនាបោះឆ្នោតជ្រើសរើសក្រុមប្រឹក្សាអាណត្តិទី ៣នេះ ត្រូវធ្វើឡើងរយៈពេល៨ថ្ងៃជាប់ៗគ្នា តាមប្រតិទិនរបស់គ.ជ.បកំណត់ដែលនឹងត្រូវបញ្ចប់ ២៤ម៉ោងមុនថ្ងៃបោះឆ្នោត។ ការឃោសនាបោះឆ្នោតអាចធ្វើជារួមនៅថ្នាក់រាជធានីឬតាមខណ្ឌ(តាមការជាក់ស្តែង)ដែលគោលដៅសំខាន់គឺឆ្ពោះទៅរកក្រុមប្រឹក្សាសង្កាត់ដែលជាអង្គបោះឆ្នោត។
គួរបញ្ជាក់ទៀតថា បើតាមការឲ្យដឹងពីគណៈកម្មការរៀបចំការបោះឆ្នោតរាជធានីភ្នំពេញបញ្ជាក់ថានៅរាជធានីភ្នំពេញមានគណបក្សនយោបាយចំនួន៦បានចុះឈ្មោះជាផ្លូវការក្នុងការចូលរួមប្រកួតប្រជែងសំរាប់ការបោះឆ្នោតក្រុមប្រឹក្សាអាណត្តិទី៣នេះ។
គណបក្សទាំង៦នោះរួមមានគណបក្សប្រជាជនកម្ពុជា,គណបក្សយុវជនកម្ពុជា,គណបក្សឆន្ទៈខ្មែរ,គណបក្សខ្មែររួបរួមជាតិ,គណបក្សហ្វ៊ុន ស៊ីនប៉ិច,គណបក្សសញ្ជាតិកម្ពុជា។តាមការចុះបញ្ជីគណបក្សនយោបាយនិងបេក្ខជនឈរឈ្មោះបោះឆ្នោតក្នុងនោះមណ្ឌលរាជធានីភ្នំពេញមានបេក្ខជនសរុបចំនួន២៧៤រូប ស្រីចំនួន១១៥រូប និងមណ្ឌលខណ្ឌទាំង ១៤ មានបេក្ខជនសរុបចំនួន១.៣៤៣ រូបស្រី ៥៣៧រូប។ ក្រោយពីមានការជួបជុំនៅកោះពេជ្រអង្គមិទ្ទិញក៏បានបំបែកគ្នាដង្ហែរក្បួនទៅតាមខណ្ឌរៀងៗខ្លួនតាមកម្មវិធីដែលបានគ្រោងទុក៕ ដោយ៖កូឡាប
