មនុស្សយ៉ាងហោចណាស់ចំនួន ១២នាក់បានស្លាប់ក្នុងភ្លើង បន្ទាប់ពីអគ្គិភ័យបានឆាបឆេះអគារស្នាក់នៅមួយកន្លែងកំពស់ ៥ជាន់ ស្ថិតក្នុងតំបន់ Bronx borough ទីក្រុងញូវយ៉ក។
អភិបាលទីក្រុងញូវយ៉ក លោក Bill de Blasio បាននិយាយថា កុមារអាយុ ១ឆ្នាំក៏បានស្លាប់នៅក្នុងហេតុការណ៍នោះផងដែរ ចំណែកមនុស្ស ៤នាក់បានរងរបួសធ្ងន់ធ្ងរ។
គាត់និយាយថា នេះគឺជាអគ្គិភ័យដ៏គ្រោះថ្នាក់ខ្លាំងបំផុតនៅក្នុងទីក្រុងក្នុងរយៈពេល ២៥ឆ្នាំចុងក្រោយ។ គេពុំទាន់ដឹងពីមូលហេតុនៃអគ្គិភ័យនោះនៅឡើយទេ។
អ្នកពន្លត់អគ្គិភ័យជាង ១៦០នាក់ បានធ្វើប្រតិបត្តិការពន្លត់វា។
មន្ត្រីពន្លត់អគ្គិភ័យបានបញ្ជាក់ថា ឧបករណ៏អគ្គិភ័យបានបន្លឺសម្លេងនៅអាគារនៅម៉ោង ៧នាទីយប់ (ម៉ោងនៅកន្លែងកើតហេតុ ដែលត្រូវនឹងម៉ោង ៧ព្រឹក ម៉ោងនៅភ្នំពេញ)។
អាគារស្នាក់នៅដែលត្រូវភ្លើងឆាបឆេះ មានបន្ទប់ច្រើនជាង ២០ និងត្រូវបានសាងសង់ជាង ១០០ឆ្នាំមកហើយ៕ សុភ័ក្ត្រ
