តាកែវ ៖ លោកស្រី ឆាយ គឹមសុទ្ធាវី ប្រធាននាយកដ្ឋានសុខភាពសិក្សា បានជំរុញអោយគ្រប់អង្គភាពពាក់ព័ន្ធទាំងអស់ត្រូវចូលរួមគ្នាទប់ស្កាត់ការលក់ចំណីអាហារ នៅតាមគ្រឹសដ្ឋាសិក្សាសាលារៀនទាំងអស់ ព្រោះកន្លងមកមានករណីសិស្សជាច្រើន បានពុលអាហារ ដែលបង្ករឡើងដោយសារតែការលក់ដូរអាហារមួយចំនួន កង្វះអនាម័យ ជាប្រភេទអាហារវេចខ្ចប់ និងចំណីអាហារខ្លះមានហួសកាលបរិច្ឆេទច្រើន ដែលចំណុចទាំងនេះហើយសុទ្ធសឹងតែជាកត្តារួមមួយបណ្តាលអោយប៉ះពាល់សុខភាពដល់សិស្សានុសិស្ស ធ្វើអោយមានការអាក់ខានដល់ការរៀនសូត្ររបស់ពួកគេ ដូច្នេះគ្រប់អង្គភាពពាក់ព័ន្ធ ត្រូវតែពង្រឹងចំណេះដឹង និងបរិស្ថានសិក្សា លើកកម្ពស់សុវត្ថិភាព និងសុខុមាលភាពចំណីអាហារនៅតាមសាលារៀន ។
ថ្លែងបែបនេះក្នុងពេលដែលលោកស្រីប្រធាននាយកដ្ឋានសុខភាពសិក្សា សហការជាមួយនិងអង្គការសុខភាពពិភពលោកប្រចាំនៅកម្ពុជា និងមន្ទីរអប់រំខេត្ត ចូលរួមក្នុងពីធីបើកសិក្ខាសាលាពិគ្រោះយោបល់ស្តីពីសុវត្ថិភាព និងសុខុមាលភាពចំណីអាហារនៅតាមសាលារៀន នៅសាលប្រជុំអាលីសវីឡា ឋិតនៅក្រុងដូនកែវ ខេត្តតាកែវ នាព្រឹកថ្ងៃទី ២០ ខែមិថុនា ឆ្នាំ២០១៩ ដោយសមាសភាពចូលរួមពីគ្រប់អង្គភាពពាក់ព័ន្ធទាំងអស់ចំនួន ៥៦រូប នៅក្នុងខេត្ត ។
លោក គីម សំអាត ប្រធានអង្គការសុខភាពពិភពលោកប្រចាំនៅកម្ពុជា បានបង្ហាញនៅមតិចាប់អារម្មណ៏ថា សិក្ខាសាលានេះពិតជា មានសារៈសំខាន់ខ្លាំងណាស់ក្នុងការជួយដល់ សិស្សានុសិស្ស ពាក់ព័ន្ធជាមួយសុខុមាលភាពរបស់ពួកគេ ហើយចំពោះសេចក្តីណែនាំលេខ១៨ អយក.សណន ចុះថ្ងៃទី ០២ ខែឧសភា ឆ្នាំ២០១៩ ស្តីពីការពង្រឹងវិធានការអនុវត្តការលើកកម្ពស់សុវតិ្តភាព និងសុខុមាលភាពចំណីអាហារនៅតាមគ្រឹះស្ថានសិក្សាចំណេះទូទៅនេះ វាពិតជាបានធ្វើអោយក្មេងៗដែលជាសិស្សានុសិស្ស មានសុខភាពល្អ មានឱកាសច្រើនក្នុងការសិក្សា រៀនសូត្រក្រេបយកចំណេះវិជ្ជា ដែលជួយអោយកម្ពុជា សំបូរទៅដោយធនធានមនុស្សដែលមានសមត្ថភាព ក្នុងការងារជួយដល់សង្គមជាតិ ។
ចំណែកឯលោកស្រី សារី ផល្លី អនុប្រធានមន្ទីរអប់រំយុវជន និងកីឡាខេត្តតាកែវ បានលើកឡើងថា លោកស្រី និងផ្សព្វផ្សាយពីសេចក្តីណែនាំនេះ ទៅដល់គ្រប់គ្រឹះស្ថានសិក្សាទាំង អស់ដែលមាននៅក្នុងខេត្ត ហើយនិងជំរុញអោយលោកគ្រូ នាយកសាលានីមួយៗ ត្រួតពីនិត្យមើល នៅតាមស្តង់លក់ចំណីអាហារនៅតាមសាលារៀន ធ្វើការអប់រំដល់អ្នកលក់ និងបញ្ជ្រៀបការយល់ដឹងមួយចំនួន អំពីផលប៉ពាល់សុខភាព ដែលបណ្តាលមកពីការហូបចំណីអាហារទៅដល់សិស្សទាំងអស់ ៕ ដោយ ៖ តាកែវ
