ខេត្តព្រះសីហនុ ៖ អភិបាល នៃគណៈអភិបាលខេត្តព្រះសីហនុ នាឱកាដចូលរួមប្រកាសជាផ្លូវការ សមាសភាព សមាជិកក្រុមប្រឹក្សាស្រុកកំពង់សិលា កាលពីព្រឹកថ្ងៃទី២០ ខែមិថុនា ឆ្នាំ២០១៩ នាសាលាស្រុកកំពង់សិលា។ លោកបានណែនាំដល់សមាជិកក្រុមប្រឹក្សាស្រុកកំពង់សិលា អាណត្តិទី៣ ទាំងអស់ ត្រូវធ្វើខ្លួនជាបុគ្គលនីតិប្រតិបត្តិ បំពេញការងារ ដើម្បីអភិវឌ្ឍន៍មូលដ្ឋាន ជូនប្រជាពលរដ្ឋឱ្យបានល្អ និងមានប្រសិទ្ធភាពខ្ពស់។
នាឱកាសនោះ លោក យន្ត មីន បានក្រើនរំលឹកដល់សមាជិកក្រុមប្រឹក្សាស្រុកកំពង់សិលា ទើបតែងតាំងថ្មីចំនួន ១១រូប ដែលមាន លោក ដឹក ហ៊ួ ជាប្រធានក្រុមប្រឹក្សាស្រុកកំពង់សិលាអាណត្តិទី៣នេះ ត្រូវខិតខំបំពេញការងារបម្រើផលប្រយោជន៍ និងសេចក្តីត្រូវការ របស់ប្រជាពលរដ្ឋក្នុងមូលដ្ឋាន ឱ្យបានស្មើភាព យុត្តិធម៌ និងមិនត្រូវប្រកាន់និន្នាការនយោបាយអ្វីទេ ដើម្បីចូលរួមកសាង និងអភិវឌ្ឍន៍មូលដ្ឋាន របស់ខ្លួន ឱ្យកាន់តែរីកចម្រើនថែមទៀត។
លោកអភិបាលខេត្តពន្យល់ថា ក្រុមប្រឹក្សាស្រុកអាណត្តិទី៣ មានតួនាទីបម្រើប្រជាពលរដ្ឋឱ្យបានដិត ដល់។ ហេតុដូច្នេះសមាជិកក្រុមប្រឹក្សាទាំងអស់ ត្រូវបំពេញតួនាទីឱ្យបានល្អ ជាមួយ គណ:អភិបាលស្រុក មន្ត្រីរាជការ និង កងកម្លាំងមានសមត្ថកិច្ចគ្រប់លំដាប់ថ្នាក់ អង្គការសង្គមស៊ីវិល ដោយឈរលើមូលដ្ឋានលើកកម្ពស់ប្រសិទ្ធភាពការងារ ការគោរពច្បាប់ និងគោលការណ៍នានា របស់រដ្ឋ ថ្វីត្បិតស្រុកកំពង់សិលា មិនទាន់មានបញ្ហាប្រឈម និងបរិស្ថាន កើតឡើងទេ។ ដូច្នេះ ត្រូវបន្តចុះអប់រំផ្សព្វផ្សាយ ឱ្យប្រជាពលរដ្ឋនៅតាមមូលដ្ឋាននីមួយៗ គោរពច្បាប់ និងយកច្បាប់ជាគោល ដើម្បីធានាសុវត្ថិភាព ភាពស្មោះត្រង់ដល់ប្រជាពលរដ្ឋ ក្នុងការដឹកនាំធ្វើជាគំរូល្អ សម្រាប់ទាំងអស់គ្នា។
ឆ្លៀតឱកាសនេះ លោក យន្ត មីន ក៏បានអំពាវនាវដល់សមាជិកក្រុមប្រឹក្សាស្រុកកំពង់សិលា និងផ្នែកពាក់ព័ន្ធ ត្រូវរក្សាព្រៃឈើក្នុងមូលដ្ឋាននេះ កុំឱ្យបាត់បង់ ព្រោះព្រៃឈើអាចជួយកាត់បន្ថយកំដៅ នុងព្យុះភ្លៀងបោកបក់។ ជាពិសេសជាងនេះ ត្រូវបំផុសឱ្យប្រជាពលរដ្ឋចេះស្រឡាញ់ព្រៃឈើ និងដាំដុះព្រៃឈើនៅតាមលំនៅដ្ឋាន និងទីតាំងសមរម្យណាមួយឱ្យបានទាំងអស់គ្នា។
លោក យន្ត មីន បានឱ្យដឹងដូច្នេះ រួចបានរំលឹកដល់សមាជិកក្រុមប្រឹក្សាស្រុកកំពង់សិលាអាណត្តថ្មីនេះ ឱ្យបន្ដថា ការលើកកម្ពស់ការទទួលខុសត្រូវ និងភាពជាម្ចាស់ក្នុងការបំពេញតួនាទី ភារកិច្ច របស់ខ្លួនឱ្យបានល្អ សំដៅអភិវឌ្ឍន៍មូលដ្ឋាន ឆ្លើយបតតាមតម្រូវការនានា របស់ប្រជាពលរដ្ឋ។ ព្រមទាំងលើកកម្ពស់ជីវភាពរស់នៅរបស់ប្រជាពលរដ្ឋប្រកបដោយតម្លាភាព និងគណនេយ្យភាព។
លោកសង្កត់ធ្ងន់ថា សមាជិក សមាជិកាក្រុមប្រឹក្សា ដែលទើបតែងតាំងថ្មី ត្រូវពិនិត្យទៅលើច្បាប់ ស្តីពីការគ្រប់គ្រងក្រុមប្រឹក្សាឃុំ សង្កាត់ ស្រុក ខណ្ឌ និងរាជធានី ខេត្ត ឱ្យយល់ជ្រួតជ្រាប ដើម្បីពង្រឹងការងារទទួលខុសត្រូវ របស់ខ្លួនឱ្យបានល្អ។
ជាពិសេសជាងនេះ ដើម្បីសម្រេចបាននូវកិច្ចការងារចាំបាច់នានា នៅក្នុងមូលដ្ឋានស្រុកកំពង់សិលា គឺចាំបាច់ ត្រូវរួមគ្នាខិតខំពង្រឹងស្មារតីសាមគ្គីភាព ឯកភាពផ្ទៃក្នុង ឱ្យបានល្អនៅក្នុងក្រុមប្រឹក្សា គណៈអភិបាល មន្ត្រីរាជការ និងកងកម្លាំងប្រដាប់អាវុធគ្រប់លំដាប់ថ្នាក់ ដោយឈរលើមូលដ្ឋាន នៃការលើកកម្ពស់ប្រសិទ្ធភាពការងារ គោរពច្បាប់គោរពគោលការណ៍ និងពង្រឹងរបៀបធ្វើការ ដើម្បីលើកកម្ពស់ការទទួលខុសត្រូវ និងភាពជាម្ចាស់របស់មន្ត្រីរាជការ ក្នុងការបំពេញតួនាទីភារកិច្ចការងារ សំដៅអភិវឌ្ឍមូលដ្ឋាន ដើម្បីឆ្លើយតបចំពោះតម្រូវការរបស់ប្រជាពលរដ្ឋ ក្នុងដែនសមត្ថកិច្ចរៀងៗខ្លួន។
លោក យន្ត មីន សង្ឃឹមថាក្រុមប្រឹក្សាគណៈអភិបាល និងមន្ត្រីអ្នកមុខអ្នកការ ព្រមទាំងប្រជាពលរដ្ឋ រស់នៅមូលដ្ឋានស្រុកកំពង់សិលាទាំងអស់ និងខិតខំបំពេញការងាររួមគ្នា ដើម្បីសម្រេចបាននូវសមិទ្ធផលថ្មីៗបន្ថែមទៀតក្នុងរយៈពេល ៥ឆ្នាំខាងមុខទៀតនេះ៕ ដែន សីមា
