ខេត្តព្រះសីហនុ៖ អ្នកឃ្លាំមើលផែនការអភិវឌ្ឍសង្គម និងប្រជាពលរដ្ឋ រស់នៅខេត្តព្រះសីហនុ បានអះអាងថា សកម្មភាពសង់សំណង់រឹងមាំរំលោភដីចំណីឆ្នេរសមុទ្រ នាខេត្តព្រះសីហនុ បានបន្តកើតមានយ៉ាងអនាធិបតេយ្យ ប៉ុន្តែគ្មានអាជ្ញាធរពីស្ថាប័នពាក់ព័ន្ធណាមួយ នៃរដ្ឋបាលខេត្តព្រះសីហនុ ពិសេសរាជរដ្ឋាភិបាល ចេញមុខហាមឃាត់ទេ។
មន្ត្រីអង្គការក្រៅរដ្ឋាភិបាលមួយចំនួន នាខេត្តព្រះសីហនុ បានរិះគន់រដ្ឋបាលខេត្តព្រះសីហនុ ពិសេសថ្នាក់ដឹកនាំគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជាថា អនុវត្តច្បាប់មិនបានស្មើភាព រវាងប្រជាពលរដ្ឋក្រីក្រ មន្ត្រីមានអំណាច ឬមានយសស័ក្តិខ្ពស់ និងឈ្មួញមានទ្រព្យមានងារជាឧកញ៉ានោះទេ។
អ្នកឃ្លាំមើលសង្គមមួយចំនួន បានកត់សម្គាល់ថា រាល់ថ្ងៃនេះ ឆ្នេរសមុទ្រ ឬដីចំណីឆ្នេរសមុទ្រ នៅតាមតំបន់ខ្លះ នាខេត្តព្រះសីហនុ ជាពិសេសតំបន់ពយកំពេញ ស្ថិតក្នុងសង្កាត់លេខ៣ ក្រុង-ខេត្តព្រះសីហនុជាដើម ត្រូវឈ្មួញមានទ្រព្យមានងារជាឧកញ៉ា និងមន្ត្រីមានអំណាចមួយចំនួន អាចមានសិទ្ធិសង់សំណង់រឹងមាំ នៅលើដីចំណីឆ្នេរសមុទ្រ ឬជាប់ឆ្នេរសមុទ្រ ដោយគ្មានមន្ត្រីពីស្ថាប័នពាក់ព័ន្ធណាមួយ នៃរដ្ឋបាលខេត្តព្រះសីហនុ ពិសេសរដ្ឋាភិបាលចេញមុខទប់ស្កាត់ទេ។
បញ្ហានេះដែរ អ្នកឃ្លាំមើលសង្គម មន្ត្រីរាជការ និងពលរដ្ឋមានជីវភាពក្រីក្រ រស់នៅខេត្តព្រះសីហនុ ក៏បានរិះគន់ ថ្នាក់ដឹកនាំគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ដឹកនាំដោយ លោក ជា សុផារ៉ា ថា ខ្វះលទ្ធភាព ឬមានភាពកម្សោយទៅលើការងារគ្រប់គ្រងឆ្នេរសមុទ្រខេត្តព្រះសីហនុ ឲ្យបានត្រឹមត្រូវស្របតាមច្បាប់កំណត់នោះទេ។
ត្រង់ចំណុចនេះ ពួកគេចោទថា រាល់សកម្មភាពចុះអនុវត្តច្បាប់ របស់មន្ត្រីក្រសួងស្ថាប័នពាក់ព័ន្ធ នៃរាជរដ្ឋាភិបាលកម្ពុជា និងរដ្ឋបាលខេត្តព្រះសីហនុ គឺមិនបានស្មើភាពគ្នា រវាងពលរដ្ឋក្រីក្រ មន្ត្រីមានអំណាច និងឈ្មួញមានទ្រព្យឡើយ។ អ្នកឃ្លាំមើលសង្គម និងពលរដ្ឋខ្លះ បានអះអាងថា រាល់ថ្ងៃនេះឈ្មួញមានទ្រព្យ និងមន្ត្រីមានអំណាច អាចធ្វើសកម្មភាពសង់សំណង់រឹងមាំនៅលើដីចំណីឆ្នេរសមុទ្រនាខេត្តព្រះសីហនុ ដោយគ្មានការហាមឃាត់ ឬឈានទៅមានច្បាប់អនុញ្ញាតឲ្យសាងសង់សំណង់រឹងមាំស្របច្បាប់ថែមទៀត ប៉ុន្តែបើពលរដ្ឋក្រីក្រ ឬមន្ត្រីរាជកាមានបុណ្យស័ក្តិទាប គឺមិនមានសិទ្ធិទេ។
ប្រជាពលរដ្ឋ អះអាងថា ដីចំណីឆ្នេរសមុទ្រ ដែលត្រូវឈ្មួញ និងមន្ត្រីមានអំណាច កំពុងសង់សំណឹងរឹងមាំ ដោយគ្មានការហាមឃាត់ពីមន្ត្រីស្ថានប័នជំនាញពាក់ព័ន្ធរាល់ថ្ងៃនេះ គឺមានទីតាំងនៅតំបន់ពយកំពេញ ស្ថិតក្នុងសង្កាត់លេខ៣ ក្រុង-ខេត្តព្រះសីហនុជាដើម។
មន្ត្រីសង្គមស៊ីវិល និងប្រជាពលរដ្ឋភាគច្រើន រស់នៅខេត្តព្រះសីហនុ បានអះអាងថា សកម្មភាពហ៊ុំព័ទ្ធរបងថ្ម និងសង់សំណង់រឹងមាំជាបឹងកាឡូ ឬជាផ្ទះថ្មលំហែកាយ បានបន្តសកម្មភាពរាល់ថ្ងៃនៅតំបន់ពយកំពេញ ដោយរាល់ថ្ងៃនេះ សកម្មភាពសង់សំណង់រឹងមាំមួយចំនួន កំពុងសង់នៅជាប់ឆ្នេរសមុទ្រ ដោយគ្មានអាជ្ញាធរពីស្ថាប័នណាមួយចេញមុខទប់ស្កាត់ទេ។
ភាពអនាធិបតេយ្យ នៃសកម្មភាពហ៊ុំព័ទ្ធរបងថ្ម និងសង់ផ្ទះ រំលោភយកដីចំណីឆ្នេរសមុទ្រអនាធិបតេយ្យ ដែលកំពុងកើតមាននៅខេត្តព្រះសីហនុរាល់ថ្ងៃនេះ ទាំងមន្ត្រីសង្គមស៊ីវិល មន្ត្រីរាជការ និងប្រជាពលរដ្ឋភាគច្រើន រស់នៅខេត្តនេះ បានសំណូមពរដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឲ្យជួយសង្គ្រោះឆ្នេរសមុទ្រខេត្តព្រះសីហនុឲ្យបានគង់វង្ស។ ព្រោះរាល់ថ្ងៃនេះ មានមន្ត្រីមានងារជាឯកឧត្តម និងឈ្មួញមានទ្រព្យមានងារជាឧកញ៉ា ព្រមទាំងមានមន្ត្រីខ្លះកំពុងធ្វើការនៅក្នុងស្ថាប័នរដ្ឋ ក្រោមឱវាទរដ្ឋបាលខេត្តព្រះសីហនុ បានធ្វើសកម្មភាពហ៊ុំព័ទ្ធរបងថ្ម និងសង់ផ្ទះរំលោភយកដីចំណីឆ្នេរសមុទ្រ មានទីតាំងនៅតំបន់ពយកំពេញ ស្ថិតក្នុងសង្កាត់លេខ៣ ក្រុង-ខេត្តព្រះសីហនុកំពុងបន្តកើតមានរាល់ថ្ងៃ និងគ្មានអាជ្ញាធរហាមឃាត់ទេ។
ឆ្លើយតបបញ្ហានេះ លោក យន្ត មីន អភិបាលខេត្តព្រះសីហនុ បានផ្តល់សម្ភាសដល់អ្នកយកព័ត៌មាន cen.com.kh ប្រចាំខេត្តព្រះសីហនុ នៅថ្ងៃសុក្រ ទី៥ ខែមករា ឆ្នាំ២០១៨ថា មិនទាន់ទទួលបានព័ត៌មាន នៃសកម្មភាពសង់ផ្ទះ និងហ៊ុំព័ទ្ធរបងថ្មរឹងមាំរំលោភដីចំណីឆ្នេរសមុទ្រ នៅតំបន់ពយកំពេញ សង្កាត់លេខ៣ ក្រុង-ខេត្តព្រះសីហនុនោះទេ។ ប៉ុន្តែលោកថា បើសំណង់សង់ខុសច្បាប់ ឬគ្មានច្បាប់អនុញ្ញាត ហើយបានប៉ះពាល់ដល់ដីចំណីឆ្នេរសមុទ្រ រដ្ឋបាលខេត្តនឹងមានវិធានការតាមផ្លូវច្បាប់ ឬផ្អាកមិនឲ្យបន្តសកម្មភាពសាង់សង់ទៀតទេ។ ហើយករណីនេះ លោកថា នឹងបញ្ជូនមន្ត្រីជំនាញទទួលខុសត្រូវលើការងារគ្រប់គ្រងឆ្នេរ ឬដីធ្លី ដឹកនាំដោយ លោក ស្រ៊ុន ស្រ៊ន់ អភិបាលរងខេត្តព្រះសីហនុ និងលោក នួន ប៉ុក ប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដី ខេត្តព្រះសីហនុ ចុះត្រួតពិនិត្យការងារនេះ ឲ្យ បានត្រឹមត្រូវជាថ្មីឡើងវិញ។
យ៉ាងនេះក្តី ប្រជាពលរដ្ឋភាគច្រើន រស់នៅខេត្តព្រះសីហនុ បានសំណូមពរដល់ សម្តេចនាយករដ្ឋមន្ត្រី ហ៊ុន សែន មេត្តាជួយមានវិធានការទប់ស្កាត់សំណឹងរឹងមាំ ដែលកំពុងសង់រំលោភយកដីចំណីឆ្នេរសមុទ្រ នាតំបន់ពយកំពេញ ស្ថិតក្នុងសង្កាត់លេខ៣ ក្រុង-ខេត្តព្រះសីហនុជាបន្ទាន់ ព្រោះទំនងជាអាចមានការឃុបឃិតគ្នាជាលក្ខណៈប្រព័ន្ធ ឬមានបក្សពួកនិយម ទើបសំណង់រឹងមាំអាចសង់នៅលើឆ្នេរសមុទ្រ ត្រង់ចំណុចតំបន់ពយកំពេញ ក្រុង-ខេត្តព្រះសីហនុ បានដោយរលូនបែបនេះ។
ចំណុចនេះ ក្រុមប្រជាពលរដ្ឋ អះអាងថា ម្ចាស់សំណឹងរឹងមាំ និងហ៊ុំព័ទ្ធរបងរំលោភយកដីចំណីឆ្នេរសមុទ្រ ដែលកំពុងកើតមានអនាធិបតេយ្យនាខេត្តព្រះសីហនុ ពិសេសនៅតំបន់ពយកំពេញ គឺជាមន្ត្រីមានអំណាចខ្ពស់ កំពុងបំរើការងារនៅថ្នាក់ជាតិ និងមានមន្ត្រីខ្លះទៀត កំពុងបំរើការងារនៅក្នុងស្ថាប័នខ្លះ ក្រោមឱវាទរដ្ឋបាលខេត្តព្រះសីហនុ។
ក្រសួងទេសចរណ៍បង្ហាញថា ឆ្នេរសមុទ្រខេត្តព្រះសីហនុ មានប្រវែងជាង ១៧១គីឡូម៉ែត្រ (១៧១.៣៥គីឡូម៉ែត្រ) និងមានកោះចំនួន ៣២ មានជីវចម្រុះធម្មជាតិស្រស់ស្អាតដែលជាសក្ដានុពលក្នុងការអភិវឌ្ឍពង្រីកវិស័យទេសចរណ៍នាមូលដ្ឋានខេត្តព្រះសីហនុ នាថ្ងៃអនាគត៕ ដែន សីមា
