ខេត្តឧត្តរមានជ័យ ៖ អាជ្ញាធរខេត្តឧត្តរមានជ័យបានឲ្យដឹងថា នៅព្រឹកថ្ងៃទី០៣ ខែកញ្ញា ឆ្នាំ២០១៩ លោកឌីរ៉ាដូ អភិបាលរងខេត្តឧត្ដរមានជ័យ បានដឹកនាំមន្ទីរជំនាញពាក់ព័ន្ធជួបប្រជុំជាមួយប្រជាពលរដ្ឋចំនួន៣១គ្រួសារ ដែលតវ៉ាបញ្ហាដីធ្លីនៅចំណុចក្តាន់ធំ ភូមិខ្ទុំ សង្កាត់កូនក្រៀល ក្រុងសំរោង ខេត្តឧត្តរមានជ័យ។ ប្រជាពលរដ្ឋស្នើសុំអាស្រ័យផលលើដីដែលជាទីតាំងបានបែងចែកដីសម្បទានដីសង្គមកិច្ចជូនប្រជាពលរដ្ឋមកពីខេត្តត្បូងឃ្មុំ។ ប្រជាពលរដ្ឋដែលតវ៉ានេះ មួយចំនួនបានទទួលដីគោលនយោបាយ២ហិចតារួចហើយ។
ប៉ុន្តែពួកគាត់បានលើកឡើងថា ដីទីតាំងនោះពុំមានទឹកសម្រាប់ធ្វើកសិកម្ម និងនៅមានយុទ្ធភ័ណ្ឌមិនទាន់ផ្ទុះផងដែរ។ ចំពោះបញ្ហាទាំងពីរនេះ លោកឌី រ៉ាដូ ក្នុងនាមអាជ្ញាធរខេត្តនឹងចាត់មន្ទីរជំនាញពាក់ព័ន្ធឱ្យចុះពិនិត្យ និងដោះស្រាយជូនប្រជាពលរដ្ឋ។
បើតាមការបញ្ជាក់របស់ គឹម គាវិន ប្រធានមន្ទីររៀបចំដែនដីនគរូបនីយកម្មសំណង់និងសុរិយោដីខេត្តឧត្ដរមានជ័យ បានឲ្យដឹងថា កន្លងមកប្រជាពលរដ្ឋ បានទៅប្រកបរបរកសិកម្ម នៅក្នុងដីក្រុមហ៊ុនអង្គរសូហ្គឺ ដែលជាដីរបស់រដ្ឋ។ ក្រោយមកអាជ្ញាធរខេត្តបានបានធ្វើការបែងចែកដីសម្បទារ ឲ្យទៅប្រជាពលរដ្ឋ ចំនួន៤១២គ្រួសារ ដោយក្នុងមួយគ្រួសារទទួល ០២ហិកតា ពួកគាត់ក៏ព្រមទទួលសំណើរនេះដែរ ប្រជាពលរដ្ឋ ៣១គ្រួសារនេះ ក៏មាន១៩គ្រួសារ បានទទួលដីសម្បទានសង្គមកិច្ចនេះដែរ និង ២២គ្រួសារទៀត បានអះអាងគ្មានដីសម្រាប់បង្កបង្កើន សូម ឲ្យអាជ្ញាធររកដីជូនពួកគាត់ផង។ ប្រជាពលរដ្ឋដែលទទួលបានដីសម្បទារសង្គមកិច្ចរួចហើយ តែពួកគាត់ទាមទារ យកដីរបស់ពួកគាត់វិញ (យកទាំងពីរ) ដោយដីទាំងនោះ ត្រូវធ្វើជាដីសម្បទានសង្គមកិច្ចសម្រាប់ប្រជាពលរដ្ឋមកពីស្រុកក្រូចឆ្មាអស់ទៅហើយ ។
យ៉ាងណាមិញ លោកឌី រ៉ាដូ បានមានប្រសាសន៍លើកឡើងថា ករណីប្រជាពលរដ្ឋពុំមានដីសម្រាប់ប្រកបរបរកសិកម្មប្រាកដមែន ស្នើសុំក៏ដូចជាសំណូមពរដល់ប្រជាពលរដ្ឋឱ្យមកដាក់ពាក្យស្នើសុំដីសម្បទានសង្គមកិច្ចតាមរយៈអាជ្ញាធរភូមិ សង្កាត់ ក្រុងមកគណៈកម្មការគ្រប់គ្រងដីរដ្ឋ ៕ ដោយ ៖ កូឡាប
