កំពង់ធំ៖ សមត្ថកិច្ចមូលដ្ឋានបានឲ្យដឹងថា គ្រោះថ្នាក់ចរាចរណ៍កើតឡើងរវាងរថយន្តម៉ាកហ៊ីយ៉ាន់ដាយ ប្រភេទយីឌុប បុកជាមួយរថយន្តតូយូតាហាយឡែនឌ័រ ក្នុងទិសដៅបញ្ច្រាសគ្នា ចំពីមុខបុកគ្នាពេញទំហឹង បណ្តាលឲ្យអ្នកជិះរថយន្ត ហាយឡែនឌ័រស្លាប់ទាំងពីរនាក់ភ្លាមៗ នៅតាមបណ្តោយផ្លូវជាតិលេខ៦ ចំណុចស្ថិតភូមិសំណាក ឃុំកកោះ ស្រុកសន្ទុក ខេត្តកំពង់ធំ នាព្រឹកថ្ងៃទី៥ខែមករាឆ្នាំ២០១៨ ។
ប្រភពឲ្យដឹងថា ជនរងគ្រោះមានឈ្មោះ អៀង ភ័ណ្ឌ ភេទប្រុស ជាវេជ្ជបណ្ឌិត នៅមន្ទីរពេទ្យកាល់ម៉ែត ជិះរថយន្តតូយូតាហាយឡែនឌ័រពណ៌ស ស្លាកលេខ ភ្នំពេញ 2AF-3504។ ចំណែកជនរងគ្រោះម្នាក់ទៀតមិនទាន់ស្គាល់អត្តសញ្ញាណនៅឡើយទេ។
លោក ស៊ីវ វណ្ណា អធិការរងចរាចណ៍ស្រុកសន្ទុក បានបញ្ជាក់ថា មុនពេលកើតហេតុ គេឃើញរថយន្តហាយឡែនឌ័រ ធ្វើដំណើរពីជើងទៅត្បូង ជិះបញ្ច្រាសទិសគ្នាជាមួយរថយន្តហ៊ីយ៉ាន់ដាយប្រភេទយីឌុប៤ភ្លៅ លុះមកដល់កន្លែងកើតហេតុ រថយន្តហាឡែនឌ័រ បានរេចង្កូតចូលខាងចំណែកផ្លូវរថយន្តយីឌុប ចំពីមុខ បុកគ្នាពេញទំហឹង បណ្តាលឲ្យអ្នកជិះរថយន្តហាយឡែនឌ័រស្លាប់ទាំងពីរនាក់តែម្តង៕ ដោយ៖បញ្ញាស័ក្តិ
