ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅថ្ងៃទី៥ ខែមករា ឆ្នាំ២០១៨នេះ ចេញសេចក្ដីណែនាំ ស្ដីពីការលុបបំបាត់ប៉ុស្ដិ៍ត្រួតពិនិត្យ នៅផ្ទៃក្នុងប្រទេសកម្ពុជា។
តាមសេចក្ដីណែនាំរបស់សម្ដេចក្រឡាហោម ស ខេង ដែលមាន៥ចំណុចនោះ បានបញ្ជាក់ថា ការដាក់ពង្រាយប៉ុស្តិ៍ត្រួតពិនិត្យផ្លូវគោក ផ្លូវទឹកក្នុងផ្ទៃប្រទេស ដែលសម្រេចអនុញ្ញាតដោយអាជ្ញាធររដ្ឋបាលរាជធានី ខេត្ត ក៏ដូចជាការប្រើប្រាស់លិខិតឧទ្ទេសនាមរបស់ក្រសួង ស្ថាប័នជំនាញ ពាក់ព័ន្ធមួយចំនួនដើម្បីដាក់ប៉ុស្តិ៍ត្រួតពិនិត្យ បានបង្កើតឲ្យមានការត្រួតពិនិត្យច្រើនទីតាំង មានសមត្ថកិច្ចច្រើនមុខជំនាញ ជាកត្តានាំឲ្យកើតមានបញ្ហាប្រឈម ប៉ះពាល់ដល់សិទ្ធិសេរីភាព ផលប្រយោជន៍ និងសតិអារម្មណ៍ប្រជាពលរដ្ឋ។
បើតាមសម្តេចក្រឡាហោម ក្នុងគោលបំណងជំរុញអនុវត្តឲ្យបានសម្រេច នូវគោលនយោបាយ និងការប្តេជ្ញាចិត្តដ៏មុះមុតរបស់រាជរដ្ឋាភិបាល ក្នុងការផ្តល់សេវាបម្រើ ក៏ដូចជាបង្កលក្ខណសម្បត្តិល្អប្រសើរជូនប្រជាពលរដ្ឋ ក្នុងការធ្វើសកម្មភាពប្រកបមុខរបរ លើកស្ទួយជីវភាពប្រចាំថ្ងៃដោយភាពកក់ក្តៅ គ្មានការរំខាន ព្រមទាំងលុបបំបាត់ឲ្យបាននូវអំពើអសកម្មនានា ដែលតែងតែកើតមានឡើងនៅតាមប៉ុស្តិ៍ត្រួតពិនិត្យ ក្រសួងមហាផ្ទៃ ក្នុងនាមគណៈបញ្ជាការដឹកនាំត្រួតពិនិត្យ និងលុបបំបាត់ប៉ុស្តិ៍ត្រួតពិនិត្យអនាធិបតេយ្យតាមផ្លូវគោក និងផ្លូវទឹក ។
សម្ដេចក្រឡាហោម ស ខេង ក៏បានណែនាំឲ្យគណៈបញ្ជាការឯកភាពរដ្ឋបាលរាជធានី-ខេត្ត ត្រូវតែរំសាយ និងបញ្ឈប់ទាំងស្រុង នូវរាល់សកម្មភាពរបស់ប៉ុស្ដិ៍ត្រួតពិនិត្យ ទាំងអស់នៅផ្ទៃក្នុងប្រទេសដែលបានអនុញ្ញាតដោយគណៈបញ្ជាការឯកភាពរដ្ឋបាលរាជធានី ខេត្ត ក្រុង ស្រុក ខណ្ឌ ក៏ដូចជាការអនុញ្ញាតដោយលិខិតឧទ្ទេសនាមក្រសួង ស្ថាប័ន ជំនាញពាក់ព័ន្ធនាពេលកន្លងមក។ ក្នុងករណីមានភាពចាំបាច់ដោយផ្អែកលើស្ថានការណ៍ជាក់ស្តែង ដែលតម្រូវឲ្យមានប៉ុស្តិ៍ត្រួតពិនិត្យ ឈរជើងអចិន្ត្រៃយ៍ ឬប៉ុស្តិ៍ចល័តត្រួតពិនិត្យរបស់ស្ថាប័នជំនាញពាក់ព័ន្ធ នៅក្នុងភូមិសាស្ត្ររាជធានី ខេត្ត នោះ គណៈបញ្ជាការឯកភាពរដ្ឋបាលរាជធានី ខេត្ត ត្រូវធើ្វសំណើសុំការពិនិត្យ សម្រេច ពីប្រធានគណៈបញ្ជាការដឹកនាំត្រួតពិនិត្យនិងលុបបំបាត់ប៉ុស្តិ៍ត្រួតពិនិត្យអនាធិបតេយ្យតាមផ្លូវគោកនិងផ្លូវទឹក ទើបអាចអនុវត្តបាន។ គណៈបញ្ជាការឯកភាពរដ្ឋបាលរាជធានី ខេត្ត មានភារកិច្ចទទួលខុសត្រូវ ក្នុងការដឹកនាំត្រួតពិនិត្យ រាល់សកម្មភាពអនុវត្តរបស់ប៉ុស្តិ៍ត្រួតពិនិត្យដែលត្រូវបានបង្កើត ព្រមទាំង ធានាឲ្យបានដាច់ខាត មិនឲ្យមានអំពើអសកម្មណាមួយកើតឡើង ធ្វើឲ្យប៉ះពាល់គោលនយោបាយដ៏ត្រឹមត្រូវរបស់រាជរដ្ឋាភិបាល ឬប៉ះពាល់ដល់សិទ្ធិសេរីភាព និងផលប្រយោជន៍របស់ប្រជាពលរដ្ឋឡើយ។
សម្តេចក្រឡាហោម បានស្នើឲ្យមានវិធានការទាន់ពេលវេលាចំពោះការលួចដាក់ប៉ុស្តិ៍ ឬសកម្មភាពដាក់ប៉ុស្តិ៍ចល័តខុសពីខ្លឹមសារនៃសេចក្តីណែនាំនេះ ដោយចាត់តាំងកម្លាំងចុះត្រួតពិនិត្យឬធ្វើអន្តរាគមន៍ បង្ក្រាបជាបន្ទាន់តាមស្ថានការណ៍ជាក់ស្តែង៕ ដោយ៖កូឡាប
