ភ្នំពេញ៖ ក្រសួងការបរទេសនិងសហប្រតិបត្តិការអន្តរជាតិ បានប្រកាសពីលទ្ធផល នៃទស្សនកិច្ចរបស់សម្តេចតេជោនាយករដ្ឋមន្ត្រី ហ៊ុន សែន នៅប្រទេសហុងគ្រី នៅថ្ងៃទី ១៥ ខែតុលា ឆ្នាំ ២០១៩។
ក្រសួងការបរទេស បានបញ្ជាក់ថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា បានបញ្ចប់ទស្សនកិច្ចដោយជោគជ័យនៅប្រទេសហុងគ្រី ជាកន្លែងដែលសម្តេចតេជោបានអញ្ជើញចូលរួមកិច្ចប្រជុំកំពូលប៊ុយដាប៉ែសស្តីពីទឹក លើកទី៣ (3″d BWS) នៅថ្ងៃទី ១៥ ខែតុលា នៅទីក្រុងប៊ុយដាប៉ែស។
រៀបចំឡើងក្រោមប្រធានបទ “ការទប់ស្កាត់វិបត្តិទឹក” កិច្ចប្រជុំកំពូលប៊ុយដាប៉ែសស្តីពីទឹក លើកទី៣ត្រូវបាន ថ្លែងបើកដោយលោក យ៉ាណូស អាឌ័រ ប្រធានាធិបតីហុងគ្រី ។
ថ្លែងនៅក្នុងពិធីបើកកិច្ចប្រជុំកំពូល 3rd BWS សម្តេចតេជោនាយករដ្ឋមន្ត្រី បានគូសបញ្ជាក់ថា កម្ពុជាចាត់ទុកទឹកជា “មាសស” ដែលជាកាតាលីករយុទ្ធសាស្ត្រសម្រាប់ការអភិវឌ្ឍសេដ្ឋកិច្ចប្រកបដោយចីរភាព។
សម្តេចតេជោបានបញ្ជាក់បន្ថែមថា រាជរដ្ឋាភិបាលកម្ពុជា បានដាក់ចេញជាបន្តបន្ទាប់នូវយុទ្ធសាស្ត្រ
ចតុកោណដែលផ្តោតលើវិស័យអាទិភាពចំនួនបួនគឺ៖ មនុស្ស ទឹក ភ្លើង និងថ្នល់។ ជាងនេះទៅទៀត កម្ពុជា
បានចូលរួមយ៉ាងសកម្ម ទាំងក្នុងក្របខ័ណ្ឌតំបន់ និងអន្តរជាតិ ចំពោះការគ្រប់គ្រងធនធានទឹក និងសកម្មភាពនានាដើម្បីការពារបរិស្ថាន រួមទាំងការទប់ស្កាត់នូវវិបត្តិទឹកផងដែរ។
សម្តេចតេជោនាយករដ្ឋមន្ត្រី បានសង្កត់ធ្ងន់ថា កម្ពុជាបានប្តេជ្ញាចិត្តយ៉ាងមុតមាំក្នុងការការពារនិងទប់
ស្កាត់នូវវិបត្តិទឹក តាមរយៈការអនុវត្តនូវផែនការយុទ្ធសាស្ត្រ និងសកម្មភាពនានាដូចបង្ហាញជូនខាងក្រោម៖
ទីមួយ បន្តពង្រឹងការអនុវត្តច្បាប់ លិខិតបទដ្ឋានគតិយុត្តិ គោលនយោបាយ និងផែនការមេស្តីពីការគ្រប់គ្រងធនធានទឹកឲ្យកាន់តែមានប្រសិទ្ធភាពខ្ពស់។
ទីពីរ បង្កើតនិងពង្រឹងយន្តការគ្រប់គ្រងធនធានទឹកតាមអាងទន្លេ-ស្ទឹង ទាំងនៅថ្នាក់ជាតិនិងថ្នាក់ក្រោមជាតិ ដោយរៀបចំនិងអនុវត្តផែនការគ្រប់គ្រងធនធានទឹក និងអាងទន្លេ រួមមាន ការគ្រប់គ្រងធនធានទឹកបម្រើឲ្យគ្រប់វិស័យពាក់ព័ន្ធ ប្រកបដោយតុល្យភាពនិងសមធម៌ ការរៀបចំផែនទីស្ដីពីជំនន់ និងទឹកក្រោមដី ការកសាងអាងស្តុកទឹក ទំនប់ការពារទឹកជំនន់ ការពារទឹកប្រែ ប្រព័ន្ធទឹក និងឈានជាបណ្តើរៗក្នុងការធ្វើទំនើបកម្មគ្រប់ជ្រុងជ្រោយ។
ទីបី កសាងមូលដ្ឋានបច្ចេកទេស ធនធានមនុស្ស និងឈានទៅបង្កើតមជ្ឈមណ្ឌលគ្រប់គ្រងទិន្នន័យដែលប្រមូលផ្តុំទាំងទឹក ទាំងអាកាសធាតុ ដើម្បីវិភាគ ធ្វើអាជីវកម្ម និងផ្សព្វផ្សាយ បម្រើដល់គ្រប់វិស័យពាក់ព័ន្ធទាំងកម្រិតជាតិនិងអន្តរជាតិ ជាពិសេសបម្រើការគ្រប់គ្រង និងការអភិវឌ្ឍធនធានទឹក ការបន្តវាយតម្លៃសក្តានុពល និងតម្រូវការទឹក ទាំងបរិមាណ និងគុណភាព ដើម្បីឆ្លើយតបទៅនឹងការអភិវឌ្ឍ។
ទីបួន ជំរុញ និងលើកទឹកចិត្តដល់វិស័យឯកជន ឲ្យចូលរួមក្នុងការអភិវឌ្ឍវិស័យធនធានទឹក ព្រមទាំងបង្កើនថវិកាជាតិ និងកៀរគរជំនួយពីស្ថាប័នហិរញ្ញវត្ថុអន្តរជាតិ និងប្រទេសជាដៃគូដើម្បីអភិវឌ្ឍវិស័យធនធានទឹក ធានាដល់តម្រូវការទឹកក្នុងគ្រប់វិស័យពាក់ព័ន្ធ ប្រកបដោយប្រសិទ្ធភាព និងចីរភាព។
សម្តេចតេជោនាយករដ្ឋមន្ត្រី បានចូលជួបសម្តែងការគួរសមជាមួយលោកយ៉ាណូស អាឌ័រប្រធានាធិបតីហុងគ្រី។ លោកប្រធានាធិបតី នឹងអញ្ជើញមកបំពេញទស្សនកិច្ចនៅប្រទេសកម្ពុជានៅចុងខែនេះ តបតាមការអញ្ជើញរបស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។
នៅក្រៅកិច្ចប្រជុំកំពូល 3d BWs សម្តេចតេជោនាយករដ្ឋមន្ត្រី បានអនុញ្ញាតឲ្យលោក លី យ៉ុង អគ្គនាយកអង្គការអភិវឌ្ឍឧស្សាហកម្មសហប្រជាជាតិ (UNIDO) ចូលជួបសម្តែងការគួរសម ដែលក្នុងអំឡុងពេលនោះ សម្តេចតេជោបានស្នើសុំឲ្យអង្គការ UNIDO ជួយគាំទ្រទៅលើវិស័យគោលនយោបាយចំនួនពីរគឺ ៖
(១)គោលនយោបាយនាំចេញអង្ករ និង (២) គោលនយោបាយឧស្សាហកម្មឆ្នាំ ២០១៥-២០២៥៕ ដោយ៖កូឡាប
