សៀមរាប៖ មន្រ្តីជាន់ខ្ពស់អគ្គស្នងការនគរបាលជាតិ បានថ្លែងថា កងកម្លាំង ប្រដាប់អាវុធទាំងអស់ត្រូវបង្កើនកិច្ចការពារថែរក្សានូវសន្តិភាព ស្ថេរភាព និងសន្តិសុខសុវត្ថិភាព ការពាររាជរដ្ឋាភិបាលស្របច្បាប់ និងត្រួតពិនិត្យ សហការគ្នាឲ្យបានល្អនៅតាមបណ្តាគោលដៅនីមួយៗ ក្នុងភូមិសាស្ត្រដែលទទួលខុសត្រូវ។
នាព្រឹកថ្ងៃសុក្រ ថ្ងៃទី១៨ ខែតុលា ឆ្នាំ២០១៩ នៅបរិវេណអង្គរឃ្យុងយូខេត្តសៀមរាប លោកនាយឧត្តមសេនីយ៍ ហ៊ូ សាគុណ អគ្គស្នងការរងនគរបាលជាតិ ក្នុងពិធី បិទវគ្គជំនាញអន្តរាគមន៍ពិសេស បង្ក្រាបបាតុកម្ម កូដកម្ម នៃស្នងការដ្ឋាននគរបាលខេត្តសៀមរាប ដែលបានហ្វឹកហាត់ អស់រយៈពេលពីរសប្តាហ៍កន្លងមក ដល់កងកម្លាំងអន្តរាគមន៍ពិសេស នៃស្នងការដ្ឋាននគរបាលខេត្តសៀមរាប ចំនួន៣២០នាក់។
លោក នាយឧត្តមសេនីយ៍ អគ្គស្នងការរងនគរបាលជាតិ បានបញ្ជាក់ថា គោលបំណងក្នុងការហ្វឹកហាត់ គឺដើម្បីពង្រឹងសមត្ថភាពដល់កម្លាំងនគរបាលទាំងអស់ចំណុះស្នងការក្នុងការបង្កើននូវកិច្ចការពារ ធានាសន្តិសុខសុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋភ្ញៀវទេសចរជាតិ និងអន្តរជាតិឲ្យបានកាន់តែល្អប្រសើរទ្វេរឡើងថែមទៀត។
លោកនាយឧត្តមសេនីយ៍អគ្គស្នងការរងនគរបាលជាតិ បានមានប្រសាសន៍ក្រើនរំលឹកដល់ថ្នាក់ដឹកនាំ និងកងកម្លាំងទាំងអស់ត្រូវបង្កើនការយកចិត្តទុកដាក់ប្រមូលផ្តុំកម្លាំងត្រៀមប្រចាំការក្នុងការចេញអន្តរាគមន៍ ជួយប្រជាពលរដ្ឋឲ្យបានទាន់ពេលវេលានៅហេតុការណ៍ មានករណីកើតឡើងជាយថាហេតុណាមួយ។ កងកម្លាំងទាំងអស់ត្រូវបង្កើនកិច្ចការពារថែរក្សានូវសន្តិភាព ស្ថេរភាព និងសន្តិសុខសុវត្ថិភាព ការពាររាជរដ្ឋាភិបាលស្របច្បាប់ ដែលកើតចេញពីការបោះឆ្នោត ត្រឹមត្រូវ និងត្រួតពិនិត្យ សហការគ្នាឲ្យបានល្អនៅតាមបណ្តាគោលដៅនីមួយៗ ក្នុងភូមិសាស្ត្រដែលទទួលខុសត្រូវក្នុងការការពារ និងបង្ការ ទប់ស្កាត់បទល្មើសសំដៅរក្សាការពារ និងធានាសន្តិសុខសុវត្ថិភាពជូនថ្នាក់ដឹកនាំ និងគណៈប្រតិភូជាន់ខ្ពស់ជាតិ អន្តរជាតិ និងប្រជាពលរដ្ឋយកចិត្តទុកដាក់ខ្ពស់ ក្នុងការបម្រើសេវាសាធារណៈ នៅក្នុងមូលដ្ឋានជូនប្រជាពលរដ្ឋ ទាំងស្មារតីនិងសម្ភារសំដៅធានាបាននូវសុវត្ថិភាព ទាំងផ្លូវកាយនិងផ្លូវចិត្ត និងតម្រូវការរបស់ប្រជាពលរដ្ឋ ពិសេសសូមឲ្យកងកម្លាំងត្រូវវិភាគវាយតម្លៃនូវរាល់សភាពការណ៍ សកម្មភាព និងឧបាយកលចិត្តសាស្ត្រនានា ដែលប៉ុនប៉ងបំផ្លិចបំផ្លាញ ឬការបង្កចលាចលណាមួយដែលធ្វើឲ្យបាត់សណ្តាប់ធ្នាប់របៀបរៀបរយ ក្នុងសង្គមហើយត្រូវមានវិធានការម្ចាស់ការ ដើម្បីវាយបកទប់ស្កាត់និងដោះស្រាយឲ្យបានទាន់ពេលវេលា និងមានប្រសិទ្ធភាព។
លោកបានបន្ថែមថា ដើម្បីឆ្លើយតបទៅនិងតួនាទីភារកិច្ច ដែលបានកំណត់ខាងលើ កងកម្លាំងនគរបាលជាតិទាំងអស់ ត្រូវមានសាមគ្គីភាពឯកភាពផ្ទៃក្នុង និងកិច្ចសហប្រតិបត្តិការគ្នាល្អ ជាមួយអង្គភាពពាក់ព័ន្ធ ពិសេសដឹកនាំនិងបំផុសចលនាបងប្អូនប្រជាការពារក្នុងមូលដ្ឋាន ចូលរួមចំណែកក្នុងកិច្ចការពារ ដើម្បីឈានទៅសម្រេចបានស្នាដៃធំៗ បន្ថែមទៀតក្នុងការការពារសន្តិសុខសុវត្ថិភាព និងសណ្តាប់ធ្នាប់សាធារណៈ ជូនប្រជាពលរដ្ឋ អង្គភាពនិងជូនជាតិមាតុភូមិយើង ៕ ដោយ៖កូឡាប
