ខេត្តព្រះសីហនុ៖ រដ្ឋបាលខេត្តព្រះសីហនុ បំភ្លឺករណីមានការចុះផ្សាយ របស់បណ្តាញផ្សព្វផ្សាយមួយចំនួនថា មានប្រជាពលរដ្ឋម្នាក់សម្លាប់ខ្លួន នៅលើទីតាំងដីលំនៅដ្ឋាន និងដីធ្លាប់រស់អាស្រ័យផល ស្ថិតក្នុងភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ ក្រោយលំនៅដ្ឋាន របស់គាត់ ត្រូវក្រុមហ៊ុនអេវើហ្គ្រីន និងអាជ្ញាធរ ដាក់កម្លាំងឈូសបំផ្លាញចោលនោះ ថាជារឿងមុនពិតទេ។
ចំពោះករណីខាងលើនេះ លោក ឈិន សេងងួន អភិបាលរងខេត្តព្រះសីហនុ និយាយក្នុងនាមរដ្ឋបាលខេត្តនេះ ក៏បានចេញមកបំភ្លឺព័ត៌មាន នៃការស្លាប់នេះ ជម្រាបជូន សម្តេច ទ្រង់ ឯកឧត្តម លោកជំទាវ លោក លោកស្រី សាធារណជន និងអ្នកសារព័ត៌មាន ឱ្យបានជ្រាបថា៖ កាលពីព្រឹកថ្ងៃទី២២ ខែតុលា ឆ្នាំ២០១៩ មានគេហទំព័រមួយ បានចេញផ្សាយអត្ថបទ របស់ខ្លួនក្រោមចំណងជើងថា “បុរសម្នាក់បានធ្វើអត្តឃាត ក្រោយពីអាជ្ញាធរចុះរុះរើកម្ទេចផ្ទះនៅខេត្តព្រះសីហនុ” ។
ផ្តើមពីបញ្ហានេះ រដ្ឋបាលខេត្តព្រះសីហនុ សូមជម្រាបជូនថា ការចេញផ្សាយ របស់គេហទំព័រមួយស្តីពីករណីខាងលើ គឺមិនមែនជាការពិតនោះឡើយ។ លោកថា បើតាមការចុះពិនិត្យជាក់ស្តែង របស់សមត្ថកិច្ច និងធ្វើការសាកសួរប្រពន្ធជនរងគ្រោះ បានបញ្ជាក់ថា ជនរងគ្រោះ គឺស្លាប់ដោយសារលង់ទឹក ដែលទីតាំងកើតហេតុស្ថិតនៅចំណុចដីក្រុមហ៊ុនអេវឺហ្គ្រីន (ព្រែកត្របែក) ភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ។
លោក ឈុន សេងងួន ឲ្យដឹងដូច្នេះ រួចបញ្ជាក់ថា តាមការបំភ្លឺ របស់ប្រពន្ធជនរងគ្រោះ គឺនៅថ្ងៃទី២២ ខែតុលា ឆ្នាំ២០១៩ វេលាម៉ោង ៣ និង៣០នាទីទៀបភ្លឺ ជនរងគ្រោះមានឈ្មោះ ឡឹង រិន ភេទប្រុស អាយុ៣៤ឆ្នាំ ជនជាតិខ្មែរ មុខរបរចាំដី ស្ថិតក្នុងភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ និងមានស្រុកកំណើតនៅខេត្តកោះកុង។ ហើយថា ជនរងគ្រោះ មានប្រពន្ធឈ្មោះ សុខ ធី អាយុ៤៧ឆ្នាំ ជនជាតិវៀតណាម ហើយជនរងគ្រោះធ្លាប់ជាប់ពន្ធនាគារ នៅខេត្តកោះកុង នៅឆ្នាំ២០១៥ និងចេញពីពន្ធនាគារវិញនៅខែកក្កដា ឆ្នាំ២០១៨ រួចក៏បានមករស់នៅលើទីតាំងកើតហេតុខាងលើនេះ ដោយចាំដីឱ្យ ឈ្មោះ ថាច់ គឹមលាង រហូតមក។
លោក ឈិន សេងងួន អភិបាលរងខេត្តព្រះសីហនុ បញ្ជាក់បន្ថែមថា នៅមុនពេលកើតហេតុ ជនរងគ្រោះឈ្មោះ ឡឹង រិន មានអាការៈចុករោយឆ្អឹងខ្នង ក៏បានឲ្យប្រពន្ធកោសខ្យល់តាំងពីវេលាម៉ោង១ រសៀលថ្ងៃទី២១ ខែតុលា ឆ្នាំ២០១៩ បន្តបន្ទាប់មកជនរងគ្រោះ ក៏បានធ្វើដំណើរទៅដោះរនងដាក់ត្រី និងធ្វើការជួសជុលម៉ាស៊ីន ទូករហូតដល់ម៉ោង ៣ទៀបភ្លឺ ទើបចូលដេក។ លោកបន្តដកស្រង់សម្តី ប្រពន្ធជនរងគ្រោះមកបំភ្លឺថា លុះដល់វេលាកើតហេតុ ជនរងគ្រោះ ក៏បានចេញទៅមើលសន្ទូចរនងដាក់ត្រី។ ប៉ុន្តែរហូតដល់ម៉ោង ៤ និង៣០នាទីទៀបភ្លឺ ទើបគេប្រទះឃើញលង់ទឹកស្លាប់តែម្តង។
លោក ឈិន សេងងួន បញ្ជាក់ថា បច្ចុប្បន្ននេះ សាកសពជនរងគ្រោះ ត្រូវបានកម្លាំងជំនាញ ប្រគល់ជូនក្រុមគ្រួសារសព ដើម្បីយកទៅធ្វើបុណ្យតាមប្រពៃណី បន្ទាប់ពីបានពិនិត្យ និងធ្វើកោសល្យវិច្ឆ័យរួច។
និយាយដល់ត្រង់ចំណុចនេះ លោក ឈិន សេងងួន បំភ្លឺថា អាស្រ័យដូចបានគោរពជម្រាបជូនខាងលើ ក្នុងនាមរដ្ឋបាលខេត្តព្រះសីហនុ សូមសម្តេច ទ្រង់ ឯកឧត្តម លោកជំទាវ លោក លោកស្រី សាធារណជន និងអ្នកសារព័ត៌មាន មេត្តាជ្រាបជាព័ត៌មាន៕ ដោយ៖ ដែន សីមា
