ខេត្តស្វាយរៀងៈ បុរសចំណាស់ម្នាក់ បានស្លាប់ ដោយសារមងដាក់ត្រី រុំជើង បណ្តាលឱ្យលង់ទឹកបឹង ដែលហេតុការណ៍នេះ បានកើតឡើងវេលាម៉ោង13 និង 20 នាទីរសៀលថ្ងៃទី 23 ខែតុលាឆ្នាំ 2019។
សមត្ថកិច្ចបានឱ្យដឹងថាៈ ជនរងគ្រោះមានឈ្មោះទូច ឃិន អាយុ 72ឆ្នាំ មុខរបរកសិករ មានទីលំនៅភូមិត្រពាំងពិការ ឃុំអំពិល ស្រុករមាសហែក ខេត្តស្វាយរៀង ។
ប្រភពខាងលើបានឱ្យដឹងទៀតថាៈ នៅមុនពេលកើតហេតុ ជនរងគ្រោះបានយកមង ទៅចងនៅបឹងកំពឹសខាងត្បូងផ្ទះ ចម្ងាយ 1500 ម៉ែត្រ លុះពេលប្រពន្ធបាត់ប្ដីយូរពេក មិនឃើញត្រឡប់មកផ្ទះវិញ គាត់ក៏បានរកបងប្អូនក្នុងភូមិទៅតាមរកនៅបឹងកន្លែងគាត់ធ្លាប់ចងមង ពេលដល់កន្លែងនៅម៉ោង 17និង៣០ព្រលប់ បានឃើញកន្រ្តកដាក់មងអណ្ដែតលើទឹក ពេលនោះបងប្អូនចុះរាវរកក៏ប្រទះឃើញឈ្មោះទូច ឃិន ត្រូវបានមងរុំព័ទ្ធដៃ ជើង និងខ្លួនស្លាប់បាត់បង់ជីវិតទៅហើយ ពេលនោះបងប្អូនដែលទៅជួយតាមរក បានលើកគាត់ឡើងលើគោក រួចហើយរាយការណ៍ជូនសមត្ថកិច្ចប៉ុស្តិ៍ ទៅពិនិត្យឃើញថា គាត់ពិតជាស្លាប់ដោយសាមងរុំលង់ទឹកស្លាប់មែន រួចហើយបានឲ្យយកសព មកផ្ទះធ្វើបុណ្យតាមប្រពៃណី៕ ដោយ៖វ៉ៃកូ
